جۇما, 21 ماۋسىم 2024
انە، كوردىڭ بە؟ 1979 2 پىكىر 11 قاڭتار, 2024 ساعات 13:30

قازاقفيلمنىڭ ءحالى مۇشكىل مە؟!

وتكەن جىلعى ۇلتتىق قۇرىلتايدا كينو سالاسىنىڭ تولعاقتى ماسەلەلەرىن كوتەرىپ، كوزگە تۇسكەن ازامات ساتىبالدى كوپ وتپەي قازاقفيلم كينو ستۋدياسىنا پرەزيدەنت بولىپ سايلانعان ەدى. جاڭا باسشىعا قىزمەتكەرلەرىنىڭ كوڭىلى تولمايدى ەكەن.

كينو ورداسىندا 12 جىل اكتەر بولىپ قىزمەت ەتتىم دەگەن قۋاندىق دۇيسەنباەۆ الەۋمەتتىك جەلىدەگى پاراقشالارىندا بىلدەي ءبىر ۇلتتىق كومپانيا پرەزيدەنتىنىڭ سوڭعى كەزدە قىتايدىڭ ەلكتروماشينالارىن جارنامالاۋعا بەلسەنە كىرىسىپ كەتكەنىنە نالىپ، بەينە جازبا جاريالادى.

ءىستىڭ انىق-قانىعىن بىلمەك بولىپ بارعان «كتك» تەلەارناسىنىڭ تىلشىلەرى ستۋديا اۋلاسىندا قاز-قاتار ءتىزىلىپ تۇرعان قىتايدىڭ 100-گە جۋىق جەڭىل ماشيناسىن كورگەن. ولاردى باستاپ جۇرگەن اكتەر قۋاندىق دۇيسەمباەۆ ازامات ساتىبالدىنىڭ جاڭا جۇمىس ورنىنا ءوز كومانداسىمەن كەلگەنىن، كينودان حابارى جوق ايەل ادامدى ورىنباسار پرەزيدەنت سايلاعانىن، بۇرىننان كەلە جاتقان قىزمەتكەرلەردىڭ 30 پايىزعا جۋىعىن اقىسىز دەمالىسقا جىبەرگەنىن ايتادى.

تەلەارنا تىلشىلەرىنە سۇحبات بەرگەن ازامات ساتىبالدى ءوز ارەكەتىنىنەن ەشقانداي ابەستىك كورىپ تۇرماعانىن، كومپانياداعى 170 قىزمەتكەردىڭ ايلىعىن تاۋىپ بەرۋ ءۇشىن بارلىق قادامعا بارىپ جاتقانىن، ءوزىن ساتىپ اقشا تاپسا دا، ءوز ەركى ەكەنىن جەتكىزىپتى.

ونى سان ساققا جۇگىرتكەن جۇرت «پرەزيدەنتتىڭ مىندەتى كينو ءوندىرىسىن جانداندىرۋ، سول ارقىلى جاعدايىن تۇزەپ، الەۋەتىن ارتتىرۋ ەمەس پە؟! كينوفيلم اۋماعىن قىتايلارعا جالعا بەرىپ، جان باعۋدان باسقا جول قالماعان با؟!» دەپ جازىپ جاتىر.

سوناۋ قازاقتى الەمگە تانىتادى دەگەن «كوشپەندىلەر» فيلمىنەن باستاپ قازاقفيلمنىڭ باسىنان داۋ ارىلماي كەلەدى.

وتكەن جىلى قاراشانىڭ 15-كۇنى انتيكور شاكەن ايمانوۆ اتىنداعى قازاقفيلمنىڭ بۇرىنعى پرەزيدەنتىنىڭ قىلمىستىق ارەكەتىن اشكەرەلەنگەنىن جاريا ەتكەن ەدى.

«2017 جىلى الماتى وبلىسىنىڭ ىلە وزەن جاعاسىنداعى «كوشپەندى» كينوجوباسى اياسىندا سالىنعان جاساندى «تۇركىستان» بەكىنىسى مادەنيەت جانە سپورت مينيسترلىگىنىڭ بۇرىنعى باسشىلىعىمەن ۇلەستەس كوممەرتسيالىق ۇيىمنىڭ نارىقتىق قۇنىنان 44 ەسە تومەن باعامەن ساتىلعان.قازىرگى ۋاقىتتا وسى اكتيۆتى جانە جەر ۋچاسكەسىن مەملەكەتكە قايتارۋ بويىنشا شارالار قابىلدانۋدا»، – دەلىنگەن مالىمدەمەدە.

2015-2019 جىلدار ارالىعىندا قازافيلمدى باقىت قايىربەكوۆ باسقارعان.
قاراشانىڭ سوڭىندا الماتى پروكۋراتۋراسى دا قازاقفيلمگە بيۋدجەتتەن بولىنگەن 400 ملن تەڭگەنىڭ قولدى بولعانىن انىقتاعانىن جاريالاعان. بۇل ءىس كينو ستۋدياانى اقان ساتاەۆ باسقارىپ تۇرعان كەزدەگى جوباعا قاتىستى.

Abai.kz

2 پىكىر