29 جەلتوقسان ساعات 11:00-دە «استانا وپەرا» مەملەكەتتىك وپەرا جانە بالەت تەاترىندا (قوناەۆ ك-ءسى، 1) قازاقستان رەسپۋبليكاسى پرەزيدەنتىنىڭ اتىنان «جاڭا جىل رەسپۋبليكا تورىندە» اتتى رەسپۋبليكالىق شىرشا وتەدى.

جاڭا جىلدىق مەرەكەگە ەلىمىزدىڭ بارلىق وڭىرىنەن 8 بەن 12 جاس ارالىعىنداعى 100-دەن استام مەكتەپ وقۋشىلارى شاقىرىلدى. ولار وقۋدا، سونداي-اق، شىعارماشىلىق، ينتەللەكتۋالدىق جانە سپورتتىق سايىستاردا جەتىستىكتەرىمەن ۇزدىك شىققان بالالار.

شىرشا سالتاناتىنا قاتىسۋشىلاردىڭ ىشىندە ون جاسار ماليكا مۇحامەدجانوۆا دا بار. سولتۇستىك قازاقستان وبلىسى اققايىن اۋدانى سميرنوۆو اۋىلىنداعى №2 مەكتەپ-گيمنازياسىنىڭ وقۋشىسى بۇل شارا ءۇشىن ارنايى ءوز قولىمەن 100 ءتىرى راۋشان گۇلىنەن ءساندى كويلەك تىگىپتى.

سالتاناتتى شاراعا قازاقستان رەسپۋبليكاسىنىڭ وقۋ-اعارتۋ ءمينيسترى عاني بەيسەمباەۆ قاتىسادى. 

ەلوردانىڭ ۇزدىك شىعارماشىلىق ۇجىمدارىنىڭ 400-دەن استام ارتىستەرى مەن «استانا وپەرا» مەملەكەتتىك وپەرا جانە بالەت تەاترىنىڭ سوليستەرى بالالارعا جاڭا جىلدىق قويىلىمدارىن ۇسىنادى. سونداي-اق بەلگىلى قازاقستاندىق ارتىستەر مارجان اراپباەۆا، قاراقات ءابىلدينا، ەرجان ماكسيم ءان شىرقاپ، بالالار شىرشانى اينالادى.

ۇمىتىلماس مەرەكەگە قاتىسۋشىلاردىڭ بارلىعىنا پرەزيدەنتتىڭ قۇتتىقتاۋى مەن باعالى سىيلىقتارى بار جاڭا جىلدىق تىلەكحات تابىستالادى.

ايتا كەتۋ كەرەك، ەلوردانىڭ كىشكەنتاي قوناقتارى ءۇشىن 27-29 جەلتوقسان ارالىعىندا ءۇش كۇن بويى قالانىڭ ەڭ كورىكتى جەرلەرىنە ەكسكۋرسيا ۇيىمداستىرىلدى.

Abai.kz