قوعامدى سالافيزم، ارابيزم دەرتىنەن ساقتاۋ كەرەك دەپ, دەپۋتات مىرزالار كۇپىنىپ جاتقاندا، ەلباسيزمنىڭ جارقىن تۇلعاسى, سانتەحنيكتەن ميلليونەرگە دەيىن كوتەرىلىپ، قازاق رەيدەرلىگىنىڭ كولەڭكەدەگى اتاسى اتانعان بولات نازارباەۆ ومىردەن ءوتتى.

بۇل وقيعا وتكەن اپتادا بۇكىل ەلىمىزدىڭ اقپارات كەڭەستىگىنىڭ باستى تاقىرىبى بولدى. بىرەۋى – مارقۇمنىڭ اقشاسىن ساناسا، ەكىنشىلەرى – توقالدارىن سانامالادى، ۇشىنشىلەرى – ارتىندا قالعان بالا-شاعاسىنىڭ ءتىزىمىن تۇگەندەدى. قالعاندارى – بۇرىنعى پرەزيدەنتتىڭ باۋىرىنىڭ سويقاندى ىستەرىن جىپكە ءتىزدى. ەشكىمدە «جاقسى ادامنان قاپىدا ايىرىلدىق» دەگەن جىلى ءسوزدى بولاتتىڭ اتىنا قيماۋىنىڭ استارىندا نە جاتىر؟!

سۋرەت: nazarbayev.kz

بىراق بارشا ارىپتەستەرىمىز مارقۇمنىڭ جەرلەۋىنە، جەتىسىنە كىمدەر قاتىسقانىن، نەگە قاتىسقانىن جازعاندا پىكىرلەرى ءبىر جەردەن شىقتى. سونىمەن، نازارباەۆ بيلىگى كەزىندە بۇرىنعى كوشەدەگى پاقىردى ءبىر كۇندە جارتى پاتشا قىلعان ءداۋىردىڭ ءىرى تۇلعاسىن سول كەزەڭدە جىلىكتىڭ مايلى باسىن ۇستاعانداردىڭ ءبارى ازا تۇتتى.

نۇرسۇلتان نازارباەۆ 18 قاراشادا استانادا قايتىس بولعان ءىنىسى بولات نازارباەۆقا ارناپ اس بەردى. اتالعان اسقا 1989-2018 ارالىعىنداعى نۇرەكەڭنىڭ شاپاعاتىن كورگەندەر ءتورت كوزدەرى تۇگەل جينالدى. تەك قاجىگەلدين مەن ءابىليازوۆتىڭ بولماعانى عانا وكىنىشتى. نۇرەكەڭنىڭ جاقسىلىعىن تەز ەستەرىنەن شىعارىپ الاتىن ءوزى بولعان سوڭ، يەسىن بالاعىنان قاباتىندار ساۋساقپەن سانارلىق.

يەسىن بالاعىنان قاپپايتىندار جينالعان بۇل اس – ەلباسيزمنىڭ سوڭعى سيەزى سياقتى. «ەسكى قازاقستان» اتانعان بۇرىنعى شەنەۋنىكتەر جينالعان كەرەمەت ءبىر ساحنالىق قويىلىم بولدى. ول قويىلىمىنىڭ باستى قاتىسۋشىلارىن قالام ۇشىنا ىلىكتىرسەك: ۇلكەن قىز داريعا نازارباەۆا، بۇرىنعى وبلىس اكىمدەرى گۇلشارا ابدىقالىقوۆا مەن دانيال احمەتوۆ، ەكس-پرەزيدەنتتىڭ كۇيەۋ بالالارى تيمۋر قۇلىباەۆ پەن قايرات شارىپباەۆ، ءانيپا نازارباەۆا، بەلگىلى ادامداردان قىرىمبەك كوشەرباەۆ، قايرات ءمامي، ەرلان تۇرعىمباەۆ، قالمۇحامەنبەت قاسىموۆ، نۇرتاي ابىقاەۆ، قايرات قوجامجاروۆ، ەرمۇحامەت ەرتىسباەۆ، احمەتجان ەسىموۆ، ومىرزاق شوكەەۆ، مىرزاتاي جولداسبەكوۆ، بۇركىت اياعان.

استانانىڭ باس مەشىتىندە وتكەن بولات نازارباەۆتىڭ اسىنا ءماجىلىس دەپۋتاتى ەرلان سايروۆ نازار اۋدارىپ، ەكس-پرەزيدەنتتىڭ ءسوزى جايلى ويىن:

«وسى استا نۇرسۇلتان نازارباەۆ ساياسي مالىمدەمە جاسادى. «مەن ومىردەگى بارلىق پارىزىمدى ورىندادىم. سودان كەيىن بيلىكتەن كەتتىم», دەدى. ال شىن مانىندە، نۇرسۇلتان نازارباەۆتىڭ، ونىڭ تۋىستارىنىڭ، جورا-جولداستارىنىڭ قازاق حالقىنىڭ الدىندا ۇلكەن قارىزى بار! ول – 30 جىل ىشىندە جۇلىم-جۇلىم بولعان قازاقتىڭ بۇكىل بايلىعىن قايتادان ەلگە قايتارىپ بەرۋى كەرەك»، - دەپ ءبىلدىردى.

ودان ارى ەرلان سايروۆ: «بىراق شەكارانى شەگەندەدىم ەكەن دەپ، بۇكىل بايلىقتىڭ ءبارىن تۋىستارىنا، وزىنە تاراتىپ بەرۋ – ساياسي تۇرعىدا ادىلەتتىلىككە جاتپايدى. مەملەكەتتى باسقارعان ازاماتتاردىڭ ءبىر-اق كاپيتالى بولادى. ول – حالىقتىڭ سىي-قۇرمەتى. سوندىقتان بۇگىنگى تاڭداعى ەڭ نەگىزگى قارىز – بۇكىل بايلىقتىڭ ءبارىن حالىققا قايتارىپ بەرۋ»، - دەپ تۇيىندەدى.

وسىلايشا اعاسى باردىڭ جاعاسى بار دەگەن پرينتسيپپەن ءومىر سۇرگەن جان وزىمەن بىرگە ءبىر ءداۋىردىڭ بۇكىل جاماندىعىن الا كەتتى. اعاسى بولسا ءىنىسى ءۇشىن اقتالىپ: «مەن ومىردەگى بارلىق پارىزىمدى ورىندادىم. سودان كەيىن بيلىكتەن كەتتىم»، - دەپ جان سىرىن جايىپ سالدى.

سوندا نازارباەۆتىڭ كوزى تىرىسىندە بيلىكتەن كەتكەنى شىعارىپ سالما «ومىردەگى بارلىق پارىزىن» ورىنداپ بولعانى ەمەس، كەرىسىنشە «تۋىستارىنىڭ قۇلقىنىن تيۋ» ءۇشىن جاسالدى ما دەگەن ساۋالدىڭ باسى قىلتيادى. نە بولماسا نازارباەۆتىڭ پارىزى تۋىستارىن باي-باعىلان ەتۋدى ماقسات تۇتقان جەكە باستىق پەندەشىلىكتىڭ قازاقي كورىنىس مە دەگەن سۇعاناق ويعا قالدىرادى.

Abai.kz