6 قىركۇيەك ۇقك سولتۇستىك كيپردەن ەلدوس قوسپاەۆتى تۇتقىنداپ، ەلگە جەتكىزدى. ەلىمىزدە بۇل مارقاسقا بولات نازارباەۆتىڭ وڭ قولى بولىپ تابىلادى. ءارى تالاي كاسىپكەردى زارلاتىپ، رەيدەرلىكپەن بيزنەسىن تارتىپ الۋدىڭ نەبىر سوراقىسىن ىستەگەندەردىڭ سەركەسى ەلگە قولى كىسەندەلىپ ورالدى. قازىر تەمىر توردىڭ ار جاعىندا 11 ادامدىق «قوسپاەۆتار بانداسى» قىلمىستىق توبىنىڭ مۇشەلەرى ەلدوس قوسپاەۆ، ايدوس قوسپاەۆ، ايبەك قوسپاەۆ، وكسانا كۋدرياشەۆا، الەكسەي كۋزنەتسوۆ، رۋسلان شالين جانە ەرلان يماشەۆتار تەرگەلىپ جاتىر.

وسى تەرگەۋدەن قىلمىستىق توپتىڭ وكىل اكەسىن «وتىرىك اۋرۋ» قۇتقارىپ قالا الا ما دەگەن ساۋال قازاق جۇرتشىلىعىن تولعاندىرا باستادى.
2022 جىلدىڭ جازىندا وتاندىق باق ەكس-پرەزيدەنت نۇرسۇلتان نازارباەۆتىڭ ءىنىسى بولات نازارباەۆتىڭ «ۇزاق جىلدان بەرى ناۋقاس ەكەنىن» ايتىپ، ارباعا تاڭىلعان بەينەبايانىن جاريالاپ ەلدى ءدۇر سىلكىندىرگەنتىن. بۇل بەينەبايان بولات نازارباەۆتىڭ يميدجىنە اينالىپ ۇلگەردى. تاپ سول كەزدەن باستاپ كەيبىر ساراپشىلار «تۋىستارى ناۋقاس بولاتتى كورسەتۋ ارقىلى قوعامنىڭ ايانىشىن تۋعىزعىسى كەلەدى، ويتكەنى ونىڭ ۇستىنەن ءىس قوزعالۋى مۇمكىن» دەپ بولجام جاسادى.

بارىمىزگە بەلگىلى قاسىرەتتى قاڭتار» وقيعاسىنان كەيىن بۇرىنعى پرەزيدەنت پەن ونىڭ تۋىستارىنىڭ ىقپالى السىرەگەن سوڭ، قوعامدا نازارباەۆتىڭ تۋىستارى، ولاردىڭ بايلىعى توڭىرەگىندە ءسوز قوزعالا باستادى. كەزىندە بولات نازارباەۆتان بىرقاتار كاسىپكەرلەر قىسىم كورىپ، رەيدەرلىك شابۋىلعا ۇشىراعانىن باق اشىق مالىمدەي باستادى. تىقىر تايانعان ساتتە ارباعا تاڭىلعان بولات وبرازى قىلاڭ بەردى. بولات نازارباەۆ جانە باسقالاردىڭ كەزىندەگى بيزنەس جالماۋىزدىعىنا قاتىستى سوتتار وتە باستادى. باستى ايىپكەر بولات نازارباەۆ ادۆوكاتتان ەمەس، اربادان قولداۋ تاپتى.
ءالى ولەدى، مىنە ولەدىمەن بولەكەڭ ەلىمىزدەگى ەڭ قاستەرلى ناۋقاسقا اينالدى.
قازاقستاندىق بىرقاتار اقپارات قۇرالدارى ەكس-پرەزيدەنتتىڭ ءىنىسى بولات نازارباەۆ بۇيرەك جەتىسپەۋشىلىگى بەلگىلەرى دە بايقالىپ، اۋىر حالدە اۋرۋحاناعا تۇسكەنىن جازدى. الماتى قالالىق كلينيكاسى كەيىن اقپاراتتى راستادى. اتالعان مەكەمە “مەديتسينالىق قۇپيانى” العا تارتىپ، ناۋقاستىڭ جاعدايى مەن دياگنوزىن ايتۋدان باس تارتىپ، جاعدايى تۋرالى اقپارات بەرمەدى.

قازتاگ اگەنتتىگى دە، 365info سايتى دا بولات نازارباەۆ 3 قاراشادا كەشكە ميوكارد ينفاركتى كۇدىگىمەن الماتى كلينيكالىق اۋرۋحاناسىنا جاتقىزىلعانىن جازدى.

Orda.kz سايتى ارنايى جىبەرگەن ءتىلشىسىن الماتى كلينيكالىق اۋرۋحاناسىنىڭ اۋماعىنا كىرگىزبەگەنىن، بىراق ول اۋرۋحانا اۋلاسىنان بروندى ءدجيپتى كورگەنىن حابارلادى.

بولاتتىڭ بۇل اۋرۋى «قوسپاەۆتار بانداسىنا» قاتىستى پالەنىڭ الدىن الۋ دەيدى كەيبىر ساراپشىلار.

Abai.kz