ءدال سول كۇنى اسپاندا اي قورالاندى. ونى بالكىم ەشكىم كورمەگەن دە شىعار. بىراق مەنىڭ ىشكى جانارىما ايدىڭ بەتىندە «ايجورعا*» ءبيىن بيلەگەن سۇلبا ايپاراداي انىق كورىندى. ول ىشكى ءبىر الەمنەن وزىنە عانا ەستىلىپ تۇرعان تىلسىم اۋەنگە ەلتىپ، باياۋ قوزعالىپ، ۇزاق بيلەدى...بۇل باقيلىق ساپارعا اتتانعاننان سوڭ، 70 كۇننەن كەيىن دەنەسى جەر انانىڭ قۇشاعىنا تابىستالعان مايكل دجەكسوننىڭ ازاتتىق العان رۋحىنىڭ ءبيى ەدى.

بىردە ءوزىم ەرەكشە قۇرمەتتەيتىن اعام ءامىرحان بالقىبەكتىڭ ماعان: «سەن وسى بىلەسىڭ بە، تەمۋچين اقىن بولعان عوي؟..» - دەگەنى بار. مەن ونىڭ پىكىرىن بىردەن قۇپتاعانىم ەسىمدە. سەبەبى، تەمۋچين بولۋ ءۇشىن شىڭعىسحان ءبىرىنشى كەزەكتە اقىن بولۋى كەرەك-ءتى. ءبىر قاراعاندا اكەسىنەن ەرتە ايىرىلىپ، تۋىس-تۋعانىنان ءزابىر-زاپا شەگىپ، قۋدالاۋدان كوز اشپاعان قاۋقارسىز تەمۋچين: «تۇبىندە مەن دۇنيەجۇزىن جاۋلاپ الاتىن سەندەردىڭ قاعاندارىڭ بولامىن!» - دەگەندە دالادا ماڭىپ جۇرگەن موڭعولدار ونى ەسى اۋىسقان بالا دەپ ويلاعان دا شىعار. مۇمكىن تەمۋچين جۇرەكتىڭ تۇبىندەگى ۇلى ارمانىن ەشكىمگە جاريا قىلماعان دا بولار. قالاي دەسەكتە تەمۋچيننىڭ تابيعاتىنان رومانتيك ادام بولعانى داۋسىز. وسە كەلە ول قيالدىڭ قۇدىرەتتىلىگىن بارشا ادامزاتقا مويىنداتتى. شىڭعىسحاننىڭ اقىندىق-رومانتيكالىق جان-دۇنيەسىن تۇيسىنگەن ءامىر اعام تۇگىلى، جۇمىرباستى ءبىر پەندە دە تەمۋچيننىڭ جازعان ولەڭدەرىن ارينە وقىعان جوق. ەسەسىنە، شىڭعىسحان ادامزات بالاسىنا «ۇلى موڭعول يمپەرياسى» اتتى ۇلى داستاندى قالدىرىپ كەتتى.

ءدال سول كۇنى اسپاندا اي قورالاندى. ونى بالكىم ەشكىم كورمەگەن دە شىعار. بىراق مەنىڭ ىشكى جانارىما ايدىڭ بەتىندە «ايجورعا*» ءبيىن بيلەگەن سۇلبا ايپاراداي انىق كورىندى. ول ىشكى ءبىر الەمنەن وزىنە عانا ەستىلىپ تۇرعان تىلسىم اۋەنگە ەلتىپ، باياۋ قوزعالىپ، ۇزاق بيلەدى...بۇل باقيلىق ساپارعا اتتانعاننان سوڭ، 70 كۇننەن كەيىن دەنەسى جەر انانىڭ قۇشاعىنا تابىستالعان مايكل دجەكسوننىڭ ازاتتىق العان رۋحىنىڭ ءبيى ەدى.

بىردە ءوزىم ەرەكشە قۇرمەتتەيتىن اعام ءامىرحان بالقىبەكتىڭ ماعان: «سەن وسى بىلەسىڭ بە، تەمۋچين اقىن بولعان عوي؟..» - دەگەنى بار. مەن ونىڭ پىكىرىن بىردەن قۇپتاعانىم ەسىمدە. سەبەبى، تەمۋچين بولۋ ءۇشىن شىڭعىسحان ءبىرىنشى كەزەكتە اقىن بولۋى كەرەك-ءتى. ءبىر قاراعاندا اكەسىنەن ەرتە ايىرىلىپ، تۋىس-تۋعانىنان ءزابىر-زاپا شەگىپ، قۋدالاۋدان كوز اشپاعان قاۋقارسىز تەمۋچين: «تۇبىندە مەن دۇنيەجۇزىن جاۋلاپ الاتىن سەندەردىڭ قاعاندارىڭ بولامىن!» - دەگەندە دالادا ماڭىپ جۇرگەن موڭعولدار ونى ەسى اۋىسقان بالا دەپ ويلاعان دا شىعار. مۇمكىن تەمۋچين جۇرەكتىڭ تۇبىندەگى ۇلى ارمانىن ەشكىمگە جاريا قىلماعان دا بولار. قالاي دەسەكتە تەمۋچيننىڭ تابيعاتىنان رومانتيك ادام بولعانى داۋسىز. وسە كەلە ول قيالدىڭ قۇدىرەتتىلىگىن بارشا ادامزاتقا مويىنداتتى. شىڭعىسحاننىڭ اقىندىق-رومانتيكالىق جان-دۇنيەسىن تۇيسىنگەن ءامىر اعام تۇگىلى، جۇمىرباستى ءبىر پەندە دە تەمۋچيننىڭ جازعان ولەڭدەرىن ارينە وقىعان جوق. ەسەسىنە، شىڭعىسحان ادامزات بالاسىنا «ۇلى موڭعول يمپەرياسى» اتتى ۇلى داستاندى قالدىرىپ كەتتى.

جيىرماسىنشى عاسىردىڭ بەلورتاسىندا جاھاندى داۋىس پەن ءبيدىڭ  قۇدىرەتىمەن جاۋلاپ الۋ ءۇشىن مايكل دجەكسون اتتى قۇبىلىس دۇنيەگە كەلدى. مايكل دجوزەف دجەكسون دا كوت-د'يۆۋارداعى سانۆي اتتى پاتشالىق اۋەلەتتىڭ تۇقىمى. وسىنى ەسكەرگەن كوت-د'يۆۋارلىقتار 1992 جىلى مايكلعا سول ەلدىڭ حانزاداسى اتاعىن رەسمي تۇردە بەرگەن بولاتىن. بۇل جەردە ءبىزدىڭ تەكتىلىكتى مەڭزەپ وتىرعانىمىزدى وقىرمانىمىز قاپىسىز ءتۇسىندى دەي الامىز.

توعىز بالانىڭ جەتىنشىسى بولىپ جارىق دۇنيەنىڭ ەسىگىن اشقان مايكل ءوز شاڭىراعىندا بوتەن بالاداي ءجۇرىپ ەرجەتتى. سەگىز بالاسىنان ەرەكشە بولىپ تۋعان مايكلدىڭ دارا دارىنىن ءبىرىنشى بولىپ ءوز اكەسى قىزعانعانى - بارشاعا بەلگىلى جاعىمسىز ءجايت. بۇل جاعداي كەيىنىرەك بوزبالا مايكلعا جالعىزدىق جولىن تاڭداۋعا اسەر ەتكەنى دە بەلگىلى. ونىڭ جىگىتكە اينالعان شاعىندا ءبىرىنشى البومىنان تۇسكەن قاراجاتقا سالىنعان ءۇيىن كىشى ديسنەيلەندكە اينالدىرعانىن، 20 جاستاعى ەرەسەكتىڭ ويىنشىققا تولى سارايداي ۇيىندە كىشكەنتاي بۇلدىرشىندەرمەن      اسىر سالىپ ويناعانىن دا ءبىز جاقسى بىلەمىز. مايكلدىڭ باقىتسىز بالالىق شاقتى قايتا وتكىزۋ ارەكەتىنەن كەيىن قانشاما داۋ-دامايعا قالعانىنان دا حاباردارمىز. ويتكەنى مۇنداي «جاڭالىقتاردى» ءبىز قالت جىبەرمەيتىن ادامزات قوعامىمىز عوي. الايدا، ءبىز بۇگىن مايكل دجەكسون ءومىرىنىڭ بەلگىلى جاقتارىن اقتارىپ، وقىرماندى مەزى ەتپەيمىز. ءبىز بۇگىن ىشىندە ماڭگىلىك بالا بولىپ قالعان ءھام ەرتە قارتايعان تاريحي تۇلعانىڭ بەلگىسىز جاقتارىن اشىپ كورسەتۋدى ماقسات تۇتىپ وتىرمىز.

ءبىزدىڭ كەيىپكەر تاعدىر تالايى سىيعا تارتقان اۋىرتپاشىلىقتارىنان ەش كۇيرەگەن جوق. ول ءار قادام سايىن بيىكتەي بەردى، ءار قادام سايىن ارمانىنا جاقىنداي ءتۇستى.

ءبىرىنشى قادام ارقىلى ول تۋعان وتباسىنان بەزدى، ەكىنشى قادام ارقىلى ول دوستارىنان ايىرىلدى، ءۇشىنشى قادام ارقىلى ول ماحاببات پەن باقىتقا دەگەن ۇمىتىمەن قوش ايتىستى. قانشا قادام ارقىلى ول وليمپكە شىققانى بىزگە بەيماعلۇم. دەگەنمەن، جالقى بولۋدى تاڭداۋ ارقىلى مايكل دجەكسون جالعىزدىققا ۇيرەندى جانە وزىنەن باسقا ەشكىمدى سۇيمەيۋدى ادامزاتقا ۇيرەتىپ كەتتى. مايكل دجەكسون تاريحتا جالعىز جانە قايتالانباس ءانشى ەكەنىن بۇگىن ءسىز بەن ءبىز ىشتەي مويىنداپ وتىرمىز.

پوپ-مۋزىكانىڭ پاتشاسى اتانعان مايكلدىڭ ءومىرى ساۋلەلى شاقتاردان گورى وكىنىش پەن مۇڭعا، باقىتسىز بالالىق شاقتان باستالعان جان كۇيزەلتەر جالعىزدىقتىڭ اششى ساتتەرىنە تولى بولدى. بۇل بارلىق ۇلى ادامداردىڭ باسىندا بولاتىن تاعدىر. ودان قۇتىلۋ استە مۇمكىن ەمەس. تۇبىندە جالعىزدىق ادامدى فيلوسوفيالىق ويلارعا جەتەلەيتىنى انىق. تۇبىندە جالعىزدىق - ادامنىڭ تىلسىمدى سەزە الاتىن التىنشى سەزىم كوزىن اشاتىنى بار. تۇبىندە جالعىزدىق ادامدى اقىنعا اينالدىراتىنى دا زاڭدىلىق. جالعىزدىق سوسىن اقىننىڭ فانيدەگى جالعىز سەرىگى بولىپ قالا بەرەدى. اقىننىڭ تابيعاتىن اشاتىن بۇل تۇجىرىمنىڭ مايكل دجەكسونعا قانداي قاتىسى بار دەيسىز عوي؟

بىلايعى جۇرت ونىڭ كەرەمەت ءانشى، عاجايىپ ءبيشى ەكەندىگىن عانا بىلەدى. ال، جانى نازىك مايكلدىڭ اقىندىعىنان ونىڭ ميللياردتاعان تىندارمانىنىڭ كوبىسى بەيحابار. «ارماندى بيگە شاقىرۋ» اتتى دجەكسوننىڭ كىتابىندا ونىڭ جالعىزدىق تۋرالى جانە جالعان دۇنيەنى قابىلداۋعا ارنالعان 20 شاقتى ولەڭدەرى توپتاستىرىلعان ەكەن.

وسى ءبىر جۇمباقتاپ جازىلعان كىتابىندا مايكل عارىشتى ءتاڭىردىڭ بيىنەن جاراتىلىپ، سودان بەرى ول ۇزدىكسىز ۇيلەسىمدى قوزعالىستا ءومىر ءسۇرىپ كەلەدى دەپ سيپاتتايدى. قاي انشىدەن ءسىز مۇنداي وي ەستىپ ەدىڭىز؟ نەمەسە ءبىر ولەڭىندە: «...عايىپ بولعان تايپالاردىڭ بيلەرى مەن زامانالار كۇيلەرىنە تولى مەنىڭ جۇرەگىم» - دەيدى.

مىڭجىلدىقتار بويى اۋەدە قالىقتاپ جۇرگەن اۋەندەردى جالعىزدىقتان جاپا شەككەن جۇرەگىنە توعىستىرىپ، وزەگىنەن ءان كەيپىندەگى جالىن اتقان، مىڭجىلدىقتار بويى الەمنىڭ ءار قيىرىنان ونىڭ عانا كەۋدەسىنە تۇسكەن باقسىلار ءبيىنىڭ كولەڭكەسىن جاڭا تۇردە ومىرگە الىپ كەلگەن دە - وسى مارقۇم مايكل دجەكسون.

«مەنسىز ۇشقان قاناتتار» اتتى وي-تولعامىندا مايكل دجەكسون بىلاي دەيدى: «تامىز ايى ەدى. مەن كوكتە قالىقتاپ ۇشىپ جۇرگەن قىراندى كوردىم. ول اۋادا اينالىپ-اينالىپ جوعالىپ كەتتى. مەن ءوزىمدى تاستاندى جەتىم سياقتى سەزىندىم. نەگە مەنى ءبارى تاستاپ كەتە بەرەدى دەپ قاتتى قايعىردىم. سول كەزدە مەنىڭ جانىم: سەن قىراننان دا جوعارى ۇشا الاسىڭ، ەڭ باستىسى ءوزىڭدى وي ەركىندىگىنە تاربيەلە دەدى. مەن قيالىممەن كوكسەڭگىرگە قاراي شارىقتادىم. بىراق مەنىڭ جالعىزدىعىمنىڭ دەرتى اسپاندا ودان ءارى ۇدەي ءتۇستى. سەن مەنسىز قانات قاقتىڭ! - دەدى جۇرەگىم. ماحابباتسىز - ەركىندىك تۇل دەدى ول. سول كەزدە مەن بەسىكتە جاتقان بالاقايعا بەسىك جىرىن ايتىپ بەردىم. كەنەت مەنىڭ جۇرەگىم اۋاعا كوتەرىلىپ مەنى شات-شادىمان ەتتى. سەن مەنسىز قانات قاقتىڭ! - دەدى ءتانىم. سول كەزدە مەن تاريحقا جۇگىنىپ، قۇستاي ۇشا الاتىن اۋليەلەر جايلى كىتاپتارعا دەن قويدىم. ءۇندىستان، قىتاي مەن يراندا جاساعان امبيەلەردىڭ تاعدىرى مەنى شابىتتاندىردى. سودان كەيىن مەن قىران بولىپ كوككە ۇمتىلعان اۋليە بالاعا اينالدىم».

مىنا ءبىر قىسقا اڭگىمەدەن ءبىز مايكل دجەكسوننىڭ تالانتى مەن ونىڭ شىققان بيىگىنىڭ ارتىندا ادامزات قوعامىمەن ەلەنە بەرمەيتىن جۇمباق ادامنىڭ تۇرعاندىعىن سەزىنە الامىز. وسى جەردە ۇلى ابايدىڭ «...مەن ءبىر جۇمباق اداممىن، ونى دا ويلا» دەگەن سوزدەرى ەركسىز ويعا ورالاتىنى تاعى بار.

«ءومىر ءبيى» دەگەن اق ولەڭىندە مايكل دجەكسون مىنانداي ويلار ايتادى: «جۇلدىزدىڭ جارىعى بىتكەن كەزدە ولەتىن شىعار؟ - دەپ ويلاۋىم مۇڭ ەكەن، مەنىڭ ىشىمدەگى ءبىر داۋىس: جۇلدىز ەشقاشان ولمەيدى. ول كۇلكى بولىپ شاشىلىپ، عارىشتىق مۋزىكانىڭ ىشىنە ەنىپ كەتەدى، ال، ونىڭ كىشكەنتاي ۇشقىندارى سول ساتتە ءومىردىڭ بيىنە ۇلاسىپ جاتادى - دەدى. بۇل مەن جانارىم ءسونىپ بارا جاتقاندا ەستىپ ۇلگىرگەن عاجايىپ جاۋاپ. مىنە، مەن دە سىڭعىر كۇلكى بوپ شاشىلىپ، مۋزىكانىڭ ىشىنە ەنىپ بارا جاتىرمىن...». بۇل جولداردى ءانشى وسىدان 17 جىل بۇرىن جازىپتى.

ۇلى ادامدار ءوزىنىڭ عۇمىرى نەمەن جانە نەدەن اياقتالاتىنىن بىلگەن دەيدى كارى تاريح. مايكل دجەكسون 14 جىل بۇرىن ءوزىنىڭ روك-ن-رولل پاتشاسى ەلۆيس پرەسلي سياقتى دۇنيە سالاتىنىن بولجاعان دەسەدى. ەلۆيس پرەسلي دە اۋرۋدى سەزدىرمەيتىن ءدارى-دارمەكتەردى شامادان تىس قابىلداعاننىڭ ارقاسىندا قايتىس بولعانى وقىرماندارىمىزدىڭ ەسىندە بولار.

مايكل دجەكسون اتاقتى ەلۆيس پرەسليدىڭ قىزىنا ۇيلەنگەن بولاتىن.  لايزا-ماريا پرەسليدىڭ ەستەلىگىنە سۇيەنسەك، مايكل دجەكسون سوڭعى كەزدە ەلۆيستىڭ قالاي ولگەندىگى جونىندە سۇراستىرا بەرگەنگە ۇقسايدى. جارىنىڭ اڭگىمەسىن مۇقيات تىڭداپ العان ءانشى: «مەن تۋرا ەلۆيس سياقتى ولەتىن شىعارمىن» - دەگەن ەكەن.

ءتىرى اتا-اناسى تۇرىپ اكە مەن شەشەنى اڭساۋ، قاسىندا جۇرگەن اعا-قارىنداستارىنا كوڭىلى تولماي باۋىر ىزدەۋ سەزىمدەرى ۇلى ءانشىنى ءتىرى جەتىمگە اينالدىردى. ادام جانى جىلىلىق پەن مەيىرىمنەن ادا بولعان كەزدە ۇلكەن ماقساتتارعا تىستەنە، تىرمىسا جەتەتىنىن ءومىر تاعى دا مايكلدىڭ تاعدىرى ارقىلى دالەلدەپ بەردى. مايكلعا دەيىنگى ونەر تاريحىندا قالعان ساڭلاقتار ىشىندە قىزعانشاقتار دا، مەنمەنشىل تالانتتار دا، پاسىقتار مەن جاسىقتار دا بولعان. الايدا، ونەر تاريحىندا ءوز جەتىستىگىنە نەمقۇرايدى قارايتىن، اتاق پەن داڭقتى وزىنە قۇل قىپ تاستاعان مايكل دجەكسون عانا قالدى. وسىنداي بيىككە كوتەرىلگەن مايكلدىڭ جانى بىراق ولە - ولگەنشە بايىز تاپپاي كەتتى.

ءومىرىنىڭ بىردە ءبىر سەكۋندىنا دەيىن ول قاراپايىم ادام بولعان جوق. ونى ميلليوناعان ادام ءبىر ساتتە ءسۇيىپ، ميلليونداعان ادام ءبىر ساتتە جەك كورە الاتىن. ول باقىتسىز ءھام ەشكىمگە ۇقسامايتىن عۇمىر كەشتى.

ۇستىمىزدەگى جىلدىڭ 3 قىركۇيەگىندە مايكل دجەكسوننىڭ دەنەسى لوس-اندجەلەس قالاسىنىڭ Glendale Forest Lawn زيراتىنا  جەرلەندى.

بىرنەشە ۇرپاقتى ءوز تۇلعاسىمەن تاربيەلەگەن، ءوزىنىڭ جىپتىكتەي سۇلباسىنا تابىندىرعان مايكل شىنىمەن دە ءتاڭىردىڭ ۇلى شىعارمالارىنىڭ ءبىرى بولىپ قالا بەرمەك. ايگىلى مايكلدىڭ ءولىمى الەمگە دىبىستىڭ جىلدامدىعىنان تەز تارالىپ كەتتى. ءار ادام ءوزىنىڭ قيماس ادامىنىڭ ءولىمىن ەستىگەندەي ەسەڭگىرەپ قالدى. سەبەبى، ول ءبىزدىڭ سانامىز بەن جۇرەگىمىزدى جاۋلاپ العان بولاتىن.

بۇگىن ايدىڭ بەتىن ساحنا قىلىپ اپ، مايكل ساۋلەلەر سيمفونياسىنا «ايجورعا» ءبيىن بيلەپ ءجۇر. ءبىر وكىنىشتىسى - ونى پەندەلەر كورە المايدى. ول و دۇنيەگە ماڭگىلىك گاسترولگە كەتىپ قالدى.

--------------------------------------------------------------------------------------

* «ايجورعا» - مايكل دجەكسوننىڭ اتاقتى «لۋنوحود» اتتى ءبيى.