استانا قالاسىنىڭ مادەنيەت باسقارماسى رەسەيلىك ءارتىس ماكسيم گالكيننىڭ قازاقستانداعى كونتسەرتتەرىن وتكىزۋدە كەدەرگىگە تاپ بولعانى جايلى بەينەۇندەۋىنە قاتىستى مالىمدەمە جاسادى، دەپ حابارلايدى Ulysmedia.kz.

«بيىلعى 1 ناۋرىزدا استانا قالاسىنىڭ مادەنيەت باسقارماسىنا 8 قازاندا روزا باعلانوۆا اتىنداعى «قازاقستان» ورتالىق كونتسەرت زالىندا ماكسيم گالكيننىڭ كەشىن وتكىزۋ جونىندە حات كەلدى. ونى جولداعان - «TopBilet» جك ديرەكتورى ر. اسلانوۆ. حات ءنومىرى - № 271. 8 قازاندا مۇعالىمدەر كۇنىنە ارنالعان كونتسەرت وتكىزىلەتىندىكتەن كەشتى ۇيىمداستىرۋشىلارعا باسقا كۇندى نەمەسە باسقا عيماراتتى تاڭداۋ ۇسىنىلدى. ۇيىمداستىرۋشىلاردان بۇدان باسقا حات تۇسكەن جوق»، – دەلىنگەن حابارلامادا.

دەسە دە، باسقارماداعىلار ماكسيم گالكينگە كومەككە كەلۋگە دايىن.

«ۇستازدار كۇنىنە ارنالعان كونتسەرتتى باسقا كونتسەرتتىك زالدا وتكىزۋ جوسپارلانعانىن ەسكەرە وتىرىپ، ۇيىمداستىرۋشىلار قايتا جۇگىنگەن جاعدايدا ءتيىستى زاڭناماعا سايكەس ماكسيم گالكيننىڭ كەشىن وتكىزۋ مۇمكىندىگىن قاراستىرۋعا دايىنبىز»، –  دەيدى ۆەدومستۆودان.

ەسكە سالايىق، بۇدان بۇرىن ءارتىس وزىنىڭ ۇيىمداستىرۋشىلارىمەن بىرگە بىرنەشە ايدان بەرى كونتسەرتتەرىن وتكىزۋگە رۇقسات الۋعا تىرىسىپ جاتقانىن جەتكىزگەن.

«كەيبىر ويدان شىعارىلعان سەبەپتەر، ساحنا سىرتىنداعى تىيىمدار. بيلەتتەردى ساتۋ نە توقتايدى، نە توقتامايدى. تۇسىنەمىن، مەن قانداي دا ءبىر سەبەپتەرمەن قازاقستان بيلىگىنە سونشالىقتى قورقىنىشتى بولسام، ولار مەنىڭ كونتسەرتتەرىمدى وتكىزۋدەن قايمىعاتىن سياقتى. قازىرگى ۋاقىتتا مەنىڭ كونتسەرتتەرىمە تىيىم سالىنعان»، - دەپ شاعىمداندى ماكسيم.

تانىمال ازلىكەش «قازاقستاندى جانە ونىڭ حالقىن جاقسى كورەتىنىن» جانە وسى وقيعاعا وكىنەتىنىن ايتتى.

ايتا كەتسەك، ماكسيم گالكين رەسەي فەدەراتسياسىنىڭ باسشىلىعىن ۋكرايناعا باسىپ كىرگەنى ءۇشىن سىناپ، ەلدەن كەتۋگە ءماجبۇر بولعان. رەسەيدە وعان شەتەلدىك اگەنت مارتەبەسى بەرىلدى.

ءبىر جىلدان استام ۋاقىت بويى گالكين يزرايلدە ونەر كورسەتىپ، رەسەي باسشىلىعىنىڭ كەيبىر شەشىمدەرىن كەلەمەجدەدى.

اللا پۋگاچەۆا كۇيەۋىنىڭ ارتىنان يزرايلگە بارعان. كۇزدە ول بالالارىنا ورالدى.

فوتو: اشىق دەرەككوزدەن

Abai.kz