رەسەيدىڭ قازاقستانداعى باس كونسۋلى ەۆگەني بوبروۆ دەگەن ادام جۋىردا رەسەيلىك تاسس اگەنتتىگىنە سۇحبات بەرىپتى. «قازاقستاندا ورىس ءتىلىنىڭ قولدانىس اياسى تارىلىپ كەلە جاتىر»، - دەپ دابىل قاعىپتى.

(سۋرەت: Sputnik / تيمۋر باتىرشين)

ونىڭ سوزىنشە، سوڭعى جىلدارى قازاقستاندا ورىس سىنىپتارىنىڭ ءھام ورىس مەكتەپتەرىنىڭ سانى ەداۋىر قىسقارعان. قازاق تىلىندە وقىتاتىن ءبىرىنشى سىنىپ وقۋشىلارىنا ارنالعان باعدارلامادان «ورىس ءتىلى» ءپانىنىڭ الىنىپ تاستالۋى قوعامدا ءبىراز الاڭداۋشىلىق تۋدىردى دەپ وتىر-مىس.

باس كونسۋل بوبروۆ بۇيدەيدى: قازاقستاندا ورىس ۇلتىنىڭ ۇلەسى 15 پايىزعا دەيىن ازايعان. وعان قوسا قر وقۋ-اعارتۋ مينيسترلىگىنىڭ قازاق تىلىنە نەگىزدەلگەن وقۋ باعدارلاماسى دا ءوز ىقپالىن تيگىزۋدە.

«ءتىل ساياساتى، رەسەي مەن قازاقستاننىڭ ءبىلىم بەرۋ جانە مادەني باستامالاردى قولداۋ سالاسىنداعى ىنتىماقتاستىعى قازاقستانداعى ءورىستىلدى مادەنيەتتىڭ بايلىعىن ساقتاۋعا جانە ۇلت بىرلىگىن نىعايتۋعا كومەكتەسەدى»، – دەيدى بوبروۆ.

اۋىت مۇقيبەك، قوعام قايراتكەرى:

- رەسەيدىڭ قازاقستاندى باس كونسۋلىنا ايتىپ قويىڭىزدارشى، مەن ورىسشا بىلمەيمىن، ەلىمىزدەگى ورىس سىنىپتارىنىڭ ەندى ازايعانى-ازايعان. ول تابيعي پروتسەس!

رەسەيدەگى 1ميلليوننان استام قازاقتىڭ ءبىر مەكتەبى جوق، ءبارى ورىس تىلىندە وقيدى. وعان قازاقستان رەسپۋبليكاسىنىڭ رەسەيدەگى ءبىر ەلشىسى مىڭق ەتكەن ەمەس. كونسۋل مىرزانىڭ ەلدىڭ ىشكى ىسىندە شارۋاسى بولماسىن! مينيستر عاني بەيسەمباەۆ وتە دۇرىس جۇمىس ىستەپ جاتىر!

ەستەرىڭىزگە سالا كەتەيىك، وسىعان دەيىن رەسەيدىڭ قازاقستانداعى باس ەلشىسى الەكسەي بوروداۆكين دە قازاقستاننىڭ ىشكى ىسىنە ارالاسىپ، رەسەيلىك «نەزاۆيسيمايا گازەتاعا» بەرگەن سۇحباتىندا رەسەيدىڭ قازاقستانداعى توتەنشە جانە وكىلەتتى ەلشىسى الەكسەي بوروداۆكين «ورىس ءتىلىن بىلمەيتىن قازاقستاندىقتاردىڭ دەنى – باسقا مەملەكەتتەردەن قونىس اۋدارعاندار، ياعني قانداستار. بۇل ولاردىڭ زاماناۋي قازاقستاندىق قوعامعا تەز سىڭىسۋىنە كەدەرگى كەلتىرەدى، بۇل ەل بيلىگى ءۇشىن ايتارلىقتاي پروبلەمالار تۋعىزادى» دەگەن بولاتىن.

Abai.kz