سوتىن كوردى ەل بەسەۋدىڭ
ايكوركەمدەر قانىن قازاق كەشپەيدى!
قۇل-قۇتاندار - ۇلت جاعىنا كوشپەيدى...
2022 جىلعى قاندى قاڭتار قىرعىنى
قازاق باردا ۇلت جادىنان وشپەيدى!..
جالا جاپقىش تاعى نە دەپ وتتادى؟
ول جالاعا ولار نەگە توقتادى؟..
"اۋەجايدى باسىپ الماق!.. " دەگەن سول
ايىپپەنەن بەس قازاقتى سوتتادى!
جالاقورلار - وسىمەنەن توقتاي ما؟
قايران ۇرپاق جوعالتقانىن جوقتاي ما؟
بەس قازاقتى سوتتاعاندار بۇل جولى -
كەلەشەكتە بار قازاقتى سوتتاي ما؟..
قازاق جولى - ويلى-قىرلى ەڭىس پە،
قازاعىما مال قالماپتى-اۋ ورىستە...
سوتتاعاندار ءتورت جىگىت پەن ءبىر قىزدى -
جەتتىك دەي مە، شىنىمەنەن جەڭىسكە؟
سوندا كىمنىڭ يت نيەتى تارىلدى؟
ءزارلى سوزدەر - شىعارارداي جانىڭدى...
ءتورت جىگىتتىڭ ورتاسىندا ايگەرىم -
قايتپاس-قايسار ورلىگىمەن تانىلدى!
كىم بار ەكەن اقتارىلار اعىنان،
كوپ بولدى ءوزى سورى كىمنىڭ باعىنان؟
ءبىر جاعىنان ءوزى بىزگە ارىپتەس،
ەكەن تاعى قالامداستار جاعىنان...
نە قورلىققا كونىپ كەلدىم، كونەم بە،
جەل سوزدەرگە ەرىپ كەلدىم، ەرەم بە؟
باس-اياعى بەس قازاقتىڭ جاسىنا
"اۋەجايدى باسىپ الماق..." دەگەن بە؟
قايران قازاق - جاسىق پا الدە اسقاق پا؟
"اۋىزدارىن جاپ!- دەگەن كىم،- قاقسات پا!؟"
بۇلار مىنا ىسىمەنەن قازاقتىڭ
شىنىمەنەن سوڭعى مىسىن باسپاق پا؟
شىققىر كوزىم - تاعى سۇمدىق كورە مە؟
يت قورلىققاققا كونىپ كەلدى، كونە مە؟
بۇل شىندىقتى مويىنداعىسى كەلمەيتىن
سوندا ولاردى، قازاق دەۋگە كەلە مە؟..
...قازاق تارتقان قىزىل قىرعىن الەگىن،
سان ەستىگەن سۇم زاماننىڭ اۋەنىن،
...1986 جىلعى جەلتوقساننىڭ ايگىلى
نە سۇمدىعىن مەن دە كورگەن جان ەدىم.
كوردىڭ ۇلتىم، كوپ پە ءالى كورەرىڭ،
قالدى ما ءوزى بۇل جالعاندا سەنەرىڭ؟
سول جەلتوقسان تۋراسىندا "زوبالاڭ"
اتتى داستان جازعان تاعى مەن ەدىم...
سول جىلدارى وت بوپ جانعان ارمانى،
بىلەدى ونى جەلتوقساندار تارلانى،
ول "زوبالاڭ" "ازاتتىقتىڭ" تولقىنىن
ءبارى ەسىمدە، قانشاما جىل شارلادى...
قازاعىما جاقسى كۇندەر ارمانداي،
بىقسىپ، كۇيىپ، ىشىمدە شوق قالعانداي...
وسى جولى سوتىن كورىپ "بەسەۋدىڭ"
بولدىم كەنەت ەسىم اۋىپ قالعانداي.
بۇل زاماندا: باسبۇزار كىم، ەسەر كىم؟
الدىن الار جان بار ما ءوزى كەسەلدىڭ؟
حاتىن وقىپ، وسكەن ۇرپاق "بەسەۋدىڭ...",
و سۇمدىق-اي، "سوتىن كوردى ەل بەسەۋدىڭ"!
نۇر تايعانداي جارقىراعان جۇلدىزدان،
و سۇمدىق-اي، مىنا ىستىقتا كۇن قىزعان -
كىم ايتادى اقيقاتىن شىندىقتىڭ -
سەسكەنگەن كىم، ءتورت جىگىت پەن ءبىر قىزدان؟!.
جۇماش كەنەباي-كوكبورى
Abai.kz
