بۇل تۋرالى قر پرەزيدەنتىنىڭ ءباسپاسوز قىزمەتى حابارلادى.

«مەملەكەت باسشىسى 8-9 مامىر كۇندەرى رەسەيگە جۇمىس ساپارىمەن بارادى.

پرەزيدەنت تۆەر وبلىسىنداعى رجەۆ مەموريالىنا بارىپ، 100-ءشى جانە 101-ءشى اتقىشتار ديۆيزيالارىنىڭ قۇرامىندا شايقاسىپ، قازا تاپقان قازاق جاۋىنگەرلەرىنىڭ رۋحىنا تاعزىم ەتەدى. رجەۆ شايقاسى ۇلى وتان سوعىسى كەزىندەگى ەڭ ءىرى ۇرىستاردىڭ ءبىرى سانالادى.

سونىمەن قاتار مەملەكەت باسشىسى ترۋبينو دەرەۆنياسىنداعى باۋىرلاستار زيراتىنا بارادى. وندا پرەزيدەنتتىڭ اكەسىنىڭ اعاسى قاسىم بولتاەۆ تا جەرلەنگەن. رجەۆ تۇبىندەگى شايقاسقا قازاقستاننان 22 مىڭعا جۋىق سارباز بەن وفيتسەر قاتىستى.

قاسىم-جومارت توقاەۆ 9 مامىر كۇنى رەسەي پرەزيدەنتى ۆلاديمير ءپۋتيننىڭ شاقىرۋىمەن ۇلى وتان سوعىسىنداعى جەڭىستىڭ 78 جىلدىعىنا ارنالعان پارادقا قاتىسادى.

بۇل شاراعا رەسەي تاراپى تمد-عا مۇشە ەلدەردىڭ باسشىلارىن شاقىرعان»، - دەلىنگەن حابارلامادا.

وسىعان دەيىن پوست-كەڭەستىك ەلدەر اراسىندا قىرعىزستان پرەزيدەنتى سادىر جاپاروۆتىڭ ماسكەۋگە بارا جاتقانى حابارلانعان ەدى.

Abai.kz