قازاق كۇرەسىنەن  ۇلت كوشباسشىسى - قر پرەزيدەنتى نۇرسۇلتان نازارباەۆتىڭ جۇلدەسى ءۇشىن  وتەتىن «قازاقستان بارىسى» جوباسىنىڭ  فينالىنا جولداما العان بالۋاندار انىقتالۋدا. بۇگىنگە دەيىن ەلىمىزدىڭ 4 وبلىسىندا  ىرىكتەۋ سىنىنىڭ ءۇشىنشى اينالىمى اياقتالدى.

«سارىارقا» ۆەلوترەگىندە وتەتىن فينالدىق باسەكەگە العاش بولىپ اقتاۋلىق سپورتشىلار جولداما الدى. ءساۋىردىڭ 19-21 ارالىعىندا «جاسقانات» سپورت كەشەنىندە وتكەن وبلىستىق كەزەڭدە وتىزعا جۋىق بالۋان باق سىناپ، تەك توپتان وزعان ەكى سپورتشىعا عانا فينالعا قاتىسۋ قۇقىعا بەرىلدى. ماڭعىستاۋداعى تارتىستى باسەكەنىڭ اقتىق ايقاسىندا 18 جاستاعى مەيرامبەك جاڭاباي مەن 30 جاستاعى بولاتبەك توتەنوۆتىڭ جولى ءتۇيىسىپ، جەڭىمپاز باس اياعى 5 سەكۋندتىڭ ىشىندە انىقتالدى. سالماعى 85 كەلى تارتاتىن مەيرامبەك 120 كەلىلىك الىپ بالۋان بولاتبەكتى  جەكپە-جەك باستالعان بەتتە-اق جامباسقا الىپ ۇرعان بولاتىن.

«مەن ءوز كۇشىمە سەنىمدى بولدىم» دەگەن مەيرامبەك جاڭاباي دا، «جاڭىلىپ، قارسىلاستىڭ ادىسىنە بايقاماي ءتۇسىپ قالدىم» دەپ اعىنان جارىلعان بولاتبەك توتەنوۆ تە «قازاقستان بارىسى» دوداسىنىڭ فينالدىق باسەكەسىندە ماڭعىستاۋ وبلىسىنىڭ نامىسىن قورعايدى. بۇگىندە ولار دايىندىق جۇمىستارىن باستاپ كەتتى.

قازاق كۇرەسىنەن  ۇلت كوشباسشىسى - قر پرەزيدەنتى نۇرسۇلتان نازارباەۆتىڭ جۇلدەسى ءۇشىن  وتەتىن «قازاقستان بارىسى» جوباسىنىڭ  فينالىنا جولداما العان بالۋاندار انىقتالۋدا. بۇگىنگە دەيىن ەلىمىزدىڭ 4 وبلىسىندا  ىرىكتەۋ سىنىنىڭ ءۇشىنشى اينالىمى اياقتالدى.

«سارىارقا» ۆەلوترەگىندە وتەتىن فينالدىق باسەكەگە العاش بولىپ اقتاۋلىق سپورتشىلار جولداما الدى. ءساۋىردىڭ 19-21 ارالىعىندا «جاسقانات» سپورت كەشەنىندە وتكەن وبلىستىق كەزەڭدە وتىزعا جۋىق بالۋان باق سىناپ، تەك توپتان وزعان ەكى سپورتشىعا عانا فينالعا قاتىسۋ قۇقىعا بەرىلدى. ماڭعىستاۋداعى تارتىستى باسەكەنىڭ اقتىق ايقاسىندا 18 جاستاعى مەيرامبەك جاڭاباي مەن 30 جاستاعى بولاتبەك توتەنوۆتىڭ جولى ءتۇيىسىپ، جەڭىمپاز باس اياعى 5 سەكۋندتىڭ ىشىندە انىقتالدى. سالماعى 85 كەلى تارتاتىن مەيرامبەك 120 كەلىلىك الىپ بالۋان بولاتبەكتى  جەكپە-جەك باستالعان بەتتە-اق جامباسقا الىپ ۇرعان بولاتىن.

«مەن ءوز كۇشىمە سەنىمدى بولدىم» دەگەن مەيرامبەك جاڭاباي دا، «جاڭىلىپ، قارسىلاستىڭ ادىسىنە بايقاماي ءتۇسىپ قالدىم» دەپ اعىنان جارىلعان بولاتبەك توتەنوۆ تە «قازاقستان بارىسى» دوداسىنىڭ فينالدىق باسەكەسىندە ماڭعىستاۋ وبلىسىنىڭ نامىسىن قورعايدى. بۇگىندە ولار دايىندىق جۇمىستارىن باستاپ كەتتى.

ءساۋىردىڭ 22-24 ارالىعىندا باتىس قازاقستان ءوڭىرى ءوز «بارىسىن» انىقتاپ، بۇكىلحالىقتىق باسەكەگە ۇكىلەپ قوسار جۇيرىكتەرىنىڭ ەسىمىن جاريالادى. ورالداعى «اقجايىق» فۋتبول ستاديونىنىڭ جاسىل الاڭىندا وتكەن جەكپە-جەكتەر جانكۇيەردىڭ دەلەبەسىن قوزدىرىپ، قالا حالقى كەرەمەت بەلدەسۋلەردىڭ كۋاگەرى اتاندى. ستاديوندا تىگىلگەن اقشاڭقان كيىز ۇيلەر دە قازاقتىڭ ءتول كۇرەسىنەن وتكەن تۋرنيردەگى ۇلتتىق ناقىشتى ارتتى تۇسكەن ەدى. باتىس قازاقستان وبلىسىنىڭ ءاربىر اۋدانىندا توپ جارعان 10 بالۋان مەن ورال قالاسىنىڭ نامىسىن قورعايتىن 2 سپورتشى فينالدىق باسەكەدەن سىرت قالماۋ ءۇشىن بارىن سالدى. فينالعا دەيىن  بەيجىڭ جانە لوندون وليمپيادالارىنا قاتىسقان تاجىريبەلى دزيۋدوشى رينات يبراگيموۆ پەن وڭىردەگى قازاق كۇرەسىنىڭ تۋىن تىك ۇستاپ جۇرگەن بالۋانداردىڭ ءبىرى ەدىل ۇسەنوۆ قانا سۇرىنگەن جوق. تارتىستى بەلدەسۋدىڭ اياقتالۋىنا دەيىن بار جوعى  1 مينۋت  ۋاقىت قالعاندا ۇپاي سانىمەن رينات الدا تۇرعان. الايدا، سپورتتا ءاربىر سەكۋندتىڭ ءوزى چەمپيوننىڭ تاعدىرىن شەشەدى ەمەس پە؟! ەدىل  جەكپە-جەك اياقتالار ساتتە قارسىلاسىن تازا جەڭىپ، ورالداعى سىننىڭ چەمپيونى اتاندى. «ورال بۋراسىنىڭ» بۇل «قازاقستان بارىسى» دوداسىنداعى ءۇشىنشى مۇمكىندىگى. بىلتىرعى سىندا جەرەبە ەكى ورالدىق  - ارمان ابەۋوۆ پەن ەدىل ۇسەنوۆتىڭ جولىن ءتۇيىستىرىپ، ەدىل  جۇلدەدەن ءۇمىتى مول جەرلەسىنە جول بەرگەن ەدى. بيىل مۇنداي قۇرباندىققا ەدىل بارمايدى. سەبەبى، ارمان ابەۋوۆ ورال قالاسىنىڭ تۇرعىنى ەمەس. سول سەبەپتى، جارىس ەرەجەسىنە ساي، ارمان ابەۋوۆ ءوزىنىڭ تۇرعىلىقتى مەكەنى استانانىڭ اتىنان بەلدەسىپ كورەدى. وسىلايشا، «قازاقستان بارىسىنىڭ» ءۇشىنشى ماۋسىمىندا ورالدىقتار ەدىل ۇسەنوۆ پەن رينات يبراگيموۆكە سەنىم ارتادى.

قاراعاندى وبلىسىندا اعايىندى شىنكەەۆتەر قارا ءۇزىپ شىقتى. لوندون وليمپياداسىنىڭ قاتىسۋشىسى، «قازاقستان بارىسىنىڭ» بىلتىرعى ماۋسىمىندا ىرىكتەۋ سىندارىنان سىرت قالىپ، تىكەلەي فينالعا جولداما العان ەرجان شىنكەەۆ بيىلعى  باسەكەگە ءىنىسى ولجاستى دا ەرتە كەلىپتى. قاراعاندى ءتورىن دۇبىرگە بولەگەن دودادا ەرجان دا، ولجاس تا قارسىلاس شىداتپادى. «قازاقستان بارىسى» جوباسىنىڭ وتكەن جىلعى اقتىق سىنىندا الىسقا شاپقان بالۋان، قازاق كۇرەسىنەن الەم كۋبوگىنىڭ يەگەرى اسىل بارمەنوۆ تە اعايىندى شىنكەەۆتەردىڭ قارقىنىنا توتەپ بەرە المادى. ال، فينالدا ولجاس اعاسىن وكپەلەتكەن جوق. باستىسى، ەكەۋى دە استانا تورىندە وتەتىن اقتىق باسەكەدە قاراعاندى نامىسىن قولدان بەرمەيدى.

الماتى وبلىسىنىڭ ۇزدىكتەرىن انىقتايتىن سايىس «جاستار» سپورت كەشەنىندە ءوتتى. تالدىقورعانداعى تارتىستى بەلدەسۋلەردى تاماشالاي وتىرىپ، «كۇش اتاسىن تانىمايدى» دەگەن اتالى سوزگە توقتادىق تاعى دا.  20  جاستاعى جانىبەك دۇيسەمباەۆ وزىنەن جاسى دا، سالماعى دا ۇلكەن، جەتىسۋ ءوڭىرىنىڭ تىسقاققان بالۋانى ايدوس قاڭلىباەۆقا  ەش ايلا قالدىرعان جوق. سايىس ۇيىمداستىرۋشىلارى جانىبەككە جەڭىل ماشينانىڭ كىلتىن تابىستاپ،  ايدوسقا 300 مىڭ تەڭگە كولەمىندە سىياقى ۇسىندى.

ەندى «قازاقستان بارىسىنىڭ» العاشقى جەڭىمپازى ۇلان رىسقۇل باستاعان بالۋاندار ايقاسىنا  كۋا بولامىز. 1 مامىر كۇنى  قىزىلوردا وبلىسىنداعى قازاق كۇرەسىنىڭ شەبەرلەرى  فينالعا بەرىلەر جولدامانى ساراپقا سالادى.

«قازاقستان بارىسى» تۋرنيرىنە ىرىكتەۋ اينالىمى ءۇش كەزەڭگە بولىنگەن. الدىمەن اۋىل-ايماقتاردا، كەيىن اۋدان ورتالىقتارى مەن قالالاردان سۇرىپتالىپ شىققان شەبەرلەر ءۇشىنشى كەزەڭدە وبلىستا باق سىنايدى. ءار وبلىستان قارا ءۇزىپ شىققان 2 بالۋان استانادا وتەتىن فينالعا قاتىسۋ قۇقىن الادى.  وبلىستاردان بولەك، استانا مەن الماتى قالاسىنىڭ شىن مىقتىلارى دا شەشۋشى شايقاس جولداماسىنا يە بولماق. ناتيجەسىندە، مىڭداعان بالۋاندار اراسىنان ات وزدىرعان 34 بالۋان «سارىارقا» ۆەلوترەگىندە وتەتىن عالامات فينالدا ەلىمىزدىڭ باس باتىرىن انىقتايدى.

«قازاقستان بارىسى» دوداسىنىڭ فينالى 30 ماۋسىم كۇنى ەلورداداعى «سارىارقا» ۆەلوترەگىندە استانانىڭ 15 جىلدىق مەرەيتويىمەن ورايلاستىرىلىپ وتكىزىلەدى. جۇلدە قورى 150 مىڭ اقش دوللارى مەن التىننان قۇيىلعان «تايتۇياقتى»، تەمىر تۇلپاردى جانە «التىن بەلبەۋدى» قۇرايتىن جوبانىڭ باس دەمەۋشىسى  -  «سامۇرىق - قازىنا» ۇلتتىق ءال-اۋقات قورى. جوبانىڭ باس سەرىكتەسى  - «نۇر وتان» حالىقتىق-دەموكراتيالىق پارتياسى.

«قازاقستان بارىسى» قازاق كۇرەسىن دامىتۋ قورىنىڭ ءباسپاسوز قىزمەتى

Abai.kz