كەيىنگى ءۇش جىلدا ەلدەگى قىلمىستىق قۋدالاۋ ورگاندارى ءارتۇرلى قىلمىس جاسادى دەگەن كۇدىكپەن 3000-نان استام ادامدى ىزدەۋدە، دەپ حابارلايدى قر باس پروكۋراتۋراسى.

ءباسپاسوز قىزمەتىنىڭ مالىمەتتەرىنە قاراعاندا، شەت مەملەكەتتەردە ۇستاۋ جانە ولاردى كەيىننەن قازاقستانعا ەكستراديتسيالاۋ، سونىڭ ىشىندە پروكۋرورلاردىڭ ۇيلەستىرۋىمەن 500 ادام ۇستالدى.

قازىر 2500-دەن استام ادام ۇستاۋعا جاتادى. نەگىزىنەن ىشكى ىستەر ورگاندارىنىڭ جەلىسى بويىنشا، الاياقتىق جاساعانى ءۇشىن 400, ۇرلىق ءۇشىن 250 ادامعا ىزدەۋ جاريالانعان.

اۋىر جانە اسا اۋىر قىلمىستار جاسادى دەگەن 400 كۇدىكتىنىڭ 250-ءى ىزدەۋ جاريالانعاننان كەيىن ۇستالدى.

شەت مەملەكەتتەرمەن جولعا قويىلعان ىنتىماقتاستىقتىڭ ارقاسىندا قىلمىس جاساپ، ىزدەۋ جاريالانعان 600 كۇدىكتىنىڭ جۇرگەن جەرى انىقتالدى. ولاردىڭ كوپشىلىگى رەسەي فەدەراتسياسىندا، امەريكا قۇراما شتاتتارىندا، تۇركيا رەسپۋبليكاسىندا، بىرىككەن اراب امىرلىكتەرىندە، قىرعىز رەسپۋبليكاسىندا، وزبەكستان رەسپۋبليكاسىندا جانە ۋكراينادا جاسىرىنىپ ءجۇر.

«مىسالى، اعىمداعى جىلى قوعامدىق رەزونانس تۋدىرعان قىلمىس جاسادى دەگەن 6 كۇدىكتى ۇستالدى (4 - كىسى ءولتىرۋ بويىنشا، 2-قارجى پيراميدالارىن ۇيىمداستىرعانى جانە باسقارعانى ءۇشىن).

قالعان تۇلعالار بويىنشا باسقا ەلدەردىڭ قۇقىق قورعاۋ ورگاندارىمەن بىرلەسىپ ولاردى ۇستاۋ بويىنشا ءىس-شارالار جۇرگىزىلۋدە»،-دەلىنگەن باس پروكۋراتۋرانىڭ ءباسپاسوز قىزمەتى تاراتقان حابارلامادا.

Abai.kz