ناسيحات بەكارىسقىزى ەۋرازيالىق ينتەگراتسيا ينستيتۋتىنىڭ ەكزەتپۋل جۇمىستارى بويىنشا وكىلى. ول قىزىلوردا قالاسىندا ورنالاسقان №196 سايلاۋ ۋچاسكەسىندە  ينتەرۆيۋەر بولىپ بەكىتىلگەن، دەپ حابارلايدى El.kz اقپاراتتىق اگەنتتىگى.

«جەرگىلىكتى ۋاقىتپەن سايلاۋ ساعات 07:00-دە باستالدى. كەشكى ساعات 08:00-گە دەيىن جالعاسادى. مەنىڭ باستى جۇمىسىم – داۋىس بەرىپ شىققان ءار رەسپوندەنتتەن ەكزيتپۋلدىڭ بەلگىلەنگەن سۇراقتارىن قويۋ ارقىلى وزىمە كەرەكتى اقپاراتتاردى الۋ بولىپ تابىلادى. جاۋاپ بەرۋ نەمەسە بەرمەۋ رەسپوندەنتتىڭ ءوز ەركىندە. ەگەر رەسپوندەنت جاۋاپ بەرۋدەن باس تارتسا، ءبىز ونى ارنايى قاعازعا  ءتۇسىرىپ الامىز. وندا ەشقانداي رەسپوندەنتتىڭ مالىمەتتەرى كورسەتىلمەيدى. تەك قانا  جاسى، جىنىسى جانە ۇلتى جازىلادى. سۇحبات رەسپوندەنتتىڭ ۇلتىنا قاراي جۇرگىزىلەدى. قازاق بولسا قازاق تىلىندە، ورىس بولسا، ورىس تىلىندە سۇراق قويىلادى»، دەدى ەكزەتپۋل وكىلى.

ول سونىمەن قاتار ينتەگراتسيالىق ينستيتۋت قازاقستان بويىنشا بارلىق وڭىرلەردە جۇمىس جاسايتىندىعىن ايتتى.

«قىزىلوردا  وبلىسىنا قاراستى بارلىق اۋىل-ايماقتاردا مەن سەكىلدى ينتەرۆيۋەرلەر جۇمىس جاساۋدا. ولاردىڭ بارلىعىنا ءتارتىپ پەن ەرەجە بىردەي. ءبىز جۇمىس جاساماس بۇرىن، بارلىق بەينە نۇسقاۋلىقتان وتتىك. نۇسقاۋلىق ونلاين قوسىمشا ارقىلى وتكىزىلدى. سۋپەرۆايزەرىمىز بار. سول سۋپەرۆايزەر ارقىلى قاعاز تۇرىندە نۇسقاۋلىق بەرىلگەن. وندا نۇسقاۋلىقپەن تولىق تانىسۋعا بولادى. نۇسقاۋلىقتان تىس نەمەسە قوسىمشا سۇراقتار تۋىنداعان جاعدايدا، ءبىز ءوزىمىزدىڭ جەرگىلىكتى سۋپەرۆايزەرىمىزگە حابارلاسۋ ارقىلى ماسەلەنى شەشە الامىز»، دەدى ناسيحات بەكارىسقىزى.

ينتەرۆيۋەر سايلاۋشىلاردىڭ تاڭنان بەرى سايلاۋعا بەلسەندى تۇردە قاتىسىپ جاتقاندىعىن ايتتى. سونىمەن قاتار ءبىر ۋچاسكەدە بىرنەشە ينستيتۋتتىڭ ادامدارى بولىپ، ەكزيتپۋل جۇمىستارى جۇرگىزىلۋى مۇمكىن. ال ساۋالناما ناتيجەلەرى باق-دا جاريالانادى.

Abai.kz