ۆەدومستۆونىڭ حابارلاۋىنشا، جاۋىن-شاشىن كوپ تۇسۋىنە جانە قاردىڭ ەرۋىنە بايلانىستى 3 اۋدانداعى تاۋلى جەرلەردە، اتاپ ايتقاندا بايدىبەك (شايان، تاڭاتار، ىنتىماق، اقبۇلاق، شاقپاق، بىرلىك), ساۋران (بابايقورعان، اباي، ۇلعىلى، ورانگاي، مايدانتال، شاعا), ورداباسى اۋداندارىندا (شۇبارسۋ، بادام، شۇبار) قاردىڭ قارقىندى ەرۋى سالدارىنان ەرىگەن سۋ تومەن قاراي اققان.

“جەرگىلىكتى اتقارۋشى ورگان قىزمەتكەرلەرىنىڭ كۇشىمەن ۇيلەردى سۋ باسۋعا جول بەرمەۋ ماقساتىندا 2500 بىرلىك كولەمىندە قاپشىقتاردى توسەۋ جۇمىستارى جۇرگىزىلۋدە. مايدانتال اۋىلىندا سۋدى قاشىرتۋ ءۇشىن جاساندى كانالدار قازىپ اۋلا ۋچاسكەلەرىن سۋ باسۋ قاۋپىنىڭ الدىن الدى.

قۇرباندار مەن زارداپ شەككەندەر جوق. جاۋىن-شاشىن وبلىس اۋماعىندا توقتادى. الايدا سۋ ءالى اعىپ جاتىر. سۋدى قاشىرتۋعا بارلىعى 308 ادام، 51 بىرلىك تەحنيكا، 25 موتوپومپا، 1 ءجۇزۋ قۇرالى جۇمىلدىرىلدى. ونىڭ ىشىندە تجد: 68 ادام، 11 بىرلىك تەحنيكا، 20 موتوپومپا، 1 ءجۇزۋ قۇرالى. جاو 240 ادام، 40 بىرلىك تەحنيكا، 5 موتوپومپا»، - دەيدى تجد باستىعىنىڭ ورىنباسارى باقىتجان زاپاروۆ

ەسكە سالايىق، بۇگىن تاڭەرتەڭ تۇركىستان وبلىسىندا بىرنەشە ەلدى مەكەندى سۋ باسىپ قالدى. وڭىردە جەدەل جەلى ىسكە قوسىلدى. ساۋران اۋدانىندا مەكتەپ وقۋشىلارى ونلاين وقۋعا كوشتى. سونداي-اق وسى اۋداندا 7 بالاباقشا جۇمىسىن توقتاتتى.

قىزىلوردا مەن تۇركىستان وبلىستارىندا اۋا رايىنىڭ قولايسىزدىعىنان اۆتوموبيل جولدارىنىڭ بىرقاتار بولىگىندە كولىك قوزعالىسىنا شەكتەۋ قويىلدى.

Abai.kz