مەملەكەت باسشىسىنىڭ تاپسىرماسىمەن 2023 جىلى قر قارۋلى كۇشتەرى اسكەري قىزمەتشىلەرىنىڭ لاۋازىمدىق جالاقىسى ورتا ەسەپپەن 60%-عا ارتادى. بۇل تۋرالى  قر قورعانىس ءمينيسترىنىڭ ورىنباسارى سۇلتان كامالەتدينوۆ ايتتى.

«سونداي-اق كەلەسى جىلى قر قارۋلى كۇشتەرىنىڭ ارنايى ماقساتتاعى بولىمشەلەرىندەگى اسكەري قىزمەتشىلەردىڭ لاۋازىمدىق جالاقىسىن 20%-عا ارتتىرۋ جوسپارلانعان»، - دەدى سۇلتان كامالەتدينوۆ.

سپيكەردىڭ ايتۋىنشا، اسكەري قىزمەتشىلەردىڭ الەۋمەتتىك قورعالۋىن جاقسارتۋ جۇمىستارى دا جالعاسۋدا.

«وسىعان بايلانىستى ۇكىمەت 2023 جىلعى 1 قاڭتاردان باستاپ قارۋلى كۇشتەر مەن ۇلتتىق ۇلاننىڭ ۇشۋ قۇرامىنىڭ لاۋازىمدىق جالاقىسىن ارتتىرۋدى، اسكەري مەديتسينا قىزمەتكەرلەرىنىڭ اقشالاي ۇلەسىن ازاماتتىق مەديتسينالىق مەكەمەلەردەگى مەديتسينا قىزمەتكەرلەرىنىڭ جالاقىسى دەڭگەيىنە جەتكىزۋدى، جوعارى اسكەري وقۋ ورىندارى وقىتۋشىلارىنىڭ جالاقىسىن ازاماتتىق جوو دەڭگەيىنە دەيىن ارتتىرۋدى، تج زارداپتارىن جويۋ كەزىندە اقشالاي قاراجاتتىڭ ۇلتتىق ۇلانمەن جانە ءىىم-مەن بىردەي 3 ەسەلەنگەن مولشەرىن ماقۇلدادى»، - دەدى س. قامالەتدينوۆ.

Abai.kz