وسىدان بىرەر جىل بۇرىن عانا ەلىمىزدەگى فۋتبولشى اتاۋلىنىڭ بارلىعى «قايراتتىڭ» ساپىندا ونەر كورسەتۋگە اۋەس ەدى عوي. ءتىپتى قارسى كوماندانىڭ قۇرامىندا ويناعاننىڭ وزىندە الماتىلىق كلۋبپەن كەزدەسە قالسا، وزدەرىن بار قىرىنان كورسەتىپ قالۋعا تىرىساتىن. الايدا وكىنىشكە قاراي، بۇگىندە سول ساڭلاقتاردىڭ ەشقايسىسى قازاقستان فۋتبولىنىڭ بويتۇمارىنىڭ ساپىنا ۇمتىلمايدى. ال الماتىلىق كلۋبتىڭ ساپىندا بىلتىر ويناعان ويىنشىلاردىڭ كوبى كوماندانى تاستاپ قاشىپ كەتكەنى جاسىرىن ەمەس.

البەتتە، ءبىزدىڭ ماقساتىمىز - ول ساڭلاقتاردى قارالاپ، كىنالاۋ ەمەس. ولاي ەتە المايمىز دا. ويتكەنى ولار «قايراتتى» تاقىرعا وتىرعىزىپ، تايىپ تۇرعان جوق. سوڭىنا دەيىن شىداپ باقتى. الايدا ناپاقا تابۋ ماقساتىمەن قىزمەت ورنىن اۋىستىرۋعا ءماجبۇر بولدى. مىنە، ءبىز سولاردىڭ كەيبىرىنىڭ «قايراتتان» كەيىنگى قىزمەتتەرى قالاي بولعانىنا توقتالماقپىز.

وسىدان بىرەر جىل بۇرىن عانا ەلىمىزدەگى فۋتبولشى اتاۋلىنىڭ بارلىعى «قايراتتىڭ» ساپىندا ونەر كورسەتۋگە اۋەس ەدى عوي. ءتىپتى قارسى كوماندانىڭ قۇرامىندا ويناعاننىڭ وزىندە الماتىلىق كلۋبپەن كەزدەسە قالسا، وزدەرىن بار قىرىنان كورسەتىپ قالۋعا تىرىساتىن. الايدا وكىنىشكە قاراي، بۇگىندە سول ساڭلاقتاردىڭ ەشقايسىسى قازاقستان فۋتبولىنىڭ بويتۇمارىنىڭ ساپىنا ۇمتىلمايدى. ال الماتىلىق كلۋبتىڭ ساپىندا بىلتىر ويناعان ويىنشىلاردىڭ كوبى كوماندانى تاستاپ قاشىپ كەتكەنى جاسىرىن ەمەس.

البەتتە، ءبىزدىڭ ماقساتىمىز - ول ساڭلاقتاردى قارالاپ، كىنالاۋ ەمەس. ولاي ەتە المايمىز دا. ويتكەنى ولار «قايراتتى» تاقىرعا وتىرعىزىپ، تايىپ تۇرعان جوق. سوڭىنا دەيىن شىداپ باقتى. الايدا ناپاقا تابۋ ماقساتىمەن قىزمەت ورنىن اۋىستىرۋعا ءماجبۇر بولدى. مىنە، ءبىز سولاردىڭ كەيبىرىنىڭ «قايراتتان» كەيىنگى قىزمەتتەرى قالاي بولعانىنا توقتالماقپىز.

الدىمەن كوماندانىڭ باس باپكەرى بولعان ۆاحيد ماسۋدوۆتان باستاساق. 2007 جىلدىڭ شىلدەسىندە «قايرات» تىزگىنىن قولىنا العان ۆاحيد يۋنۋسۇلى كوماندامەن بىرگە ەڭ قيىن شاقتاردى وتكەردى دەسەك، اسىرا سىلتەگەندىگىمىز ەمەس. ويتكەنى «قايراتتىڭ» جاعدايى 2007 جىلى-اق ناشارلاي باستاعان بولاتىن. ال ماسۋدوۆ جاعدايدىڭ قيىندىعى مەن قولدىڭ قىسقالىعىنا قاراماستان، الماتىلىق ۇجىمدى اۋتسايدەرلەر قاتارىنان جوعارى سۇيرەپ، تۋرنير كەستەسىنىڭ 13-ورنىنا ورنالاستىردى. 2008 جىلى ەل فۋتبولىنىڭ بويتۇمارى مۇلدەم السىرەي باستادى. فۋتبولشىلار وزدەرىنە تيەسىلى جالاقىلارىن ايلاپ الا الماي، ابدەن ابىگەرگە ءتۇستى. سوعان قاراماستان، ماسۋدوۆتىڭ ارقاسىندا «قايرات» چەمپيوناتتى العاشقى وندىقتا اياقتادى. البەتتە، ۆاحيد يۋنۋسۇلى بيىل دا كوماندانى جاتتىقتىرا بەرەر ەدى، بىراق اككى باپكەر ءبىرىنشى ليگادا تەر توككىسى كەلمەدى. قىسقى ماۋسىم ارالىعىندا سۋ جاڭا ەلوردالىق «لوكوموتيۆتىڭ» تىزگىنىن ۇستاپ كەتە باردى. دەگەنمەن مۇندا ول ۇزاق تۇراقتاي العان جوق. چەمپيونات باستالماي جاتىپ-اق ەلوردالىقتار بىلىكتى باپكەردى «وتستاۆكاعا» جىبەردى. وسىدان كەيىن ۆاحيد يۋنۋسۇلىنىڭ جۇمىسسىز قالۋ قاۋپى مول بولىپ، ءتىپتى «ونى «قايراتتىڭ» كيەسى ۇردى، تىعىرىققا تىرەلگەن شاقتا كوماندانى تاستاپ نەسى بار ەدى» دەپ وبالىن وزىنە ارتىپ قويعان شاعىمىز دا بولدى.

وسىلاي جۇمىسسىز جۇرە بەرەر مە ەدى، كىم ءبىلسىن، ەگەر ءبىرىنشى تۋردان كەيىن مەزگىلسىز كەلگەن اجالدان «اتىراۋ» باپكەرى انتون شوح قايتىس بولماعاندا؟.. كوپ ۇزاماي ۆاحيد ماسۋدوۆ انتون روحۋسۇلىنىڭ ورنىن باستى. ول جاتتىقتىراتىن «اتىراۋ» بۇگىندە ەل بىرىنشىلىگىندە 6-ورىندا كەلەدى.

تاسقامال قورعاۋشى ءارى بىلتىر كوماندانىڭ كاپيتانى قىزمەتىن اتقارعان رەنات ابدۋللين «قايراتتىڭ» نامىسىن ارتىق-كەمى جوق بەس جىل قورعاپتى. بۇل ءۇشىن وعان الماتىلىق جانكۇيەرلەر تەك العىس ايتۋى كەرەك شىعار. ونىڭ ۇستىنە بىلتىر قيىن شاقتاردا باسشىلىق پەن جانكۇيەرلەر، سونداي-اق باق ورتاسىندا بايلانىس كوپىرى بولعان دا رەنات ەدى. سوڭعى ساتكە دەيىن باسشىلىقتان جاعىمدى حابار كۇتكەن ول اقىرى مەكەنجايىن اۋىستىرۋعا ءماجبۇر بولدى. ناتيجەسى جامان بولعان جوق. بۇگىندە رەنات ابدۋللين - ەلوردالىق «لوكوموتيۆتىڭ» تاسقامال قورعاۋشىسى، سونىمەن قاتار ۇلتتىق قۇرامامىزدىڭ اجىراماس بولشەگى. اشىعىن ايتۋىمىز كەرەك، ەگەر رەنات «قايراتتىڭ» ساپىندا قالىپ قويعاندا، الگى مانساپتارعا جەتە الماس ەدى.

بىلتىر «قايراتتىڭ» ساپىندا ەل فۋتبولىنىڭ ارداگەرى سەرىك جەيلىتباەۆ تا ونەر كورسەتتى. الماتىلىق ۇجىمنىڭ جەيدەسىن بار بولعانى ءبىر-اق جىل كيگەن جەيلىتباەۆ كومانداعا كومەكتەسە الماسىن ءبىلىپ، وسكەمەندىك «ۆوستوكتىڭ» ساپىنا اۋىسىپ كەتتى. ونىڭ بۇل ارەكەتىنە تۇسىنىستىكپەن قاراۋعا بولادى. ويتكەنى سەرىكتىڭ ۇلكەن فۋتبولمەن قوشتاسۋىنا از عانا ۋاقىت قالدى. ءتىپتى وسى جىل ول ءۇشىن ۇلكەن فۋتبولداعى سوڭعىسى بولۋى دا عاجاپ ەمەس. سوندىقتان سوڭعى جىلدى ءبىرىنشى ليگادان گورى، پرەمەر-ليگادا وتكىزگەن الدەقايدا وڭدى شەشىم ەكەنى ايتپاسا دا تۇسىنىكتى. بۇگىندە سەرىك جەيلىتباەۆ ويرات سادۋوۆ ۇجىمىن الاڭعا كاپيتان رەتىندە باستاپ شىعىپ ءجۇر.

كومانداعا ماسۋدوۆپەن بىرگە 2007 جىلدىڭ جازىندا كەلگەن يگور اۆدەەۆ بيىل قىستا ماسۋدوۆپەن بىرگە قايتا كەتىپ قالعان بولاتىن. الايدا باپكەرىنە قاراعاندا اۆدەەۆ ەلوردالىق «لوكوموتيۆتىڭ» ساپىنا ورنىعىپ الدى. بايقاساڭىز، ءوزىنىڭ 36 جاسىنا قاراماستان، يگور اۆدەەۆ قازىرگى باپكەرى سەرگەي يۋراننىڭ سەنىمىنەن شىعىپ ءجۇر.

بىلتىرلارى «قايراتتىڭ» ساپىندا شابۋىلشىلار الىبەك بولەشەۆ پەن رافاەل ءورازباحتيننىڭ دە ونەر كورسەتكەنىن بىلەمىز. الايدا الماتىلىق كلۋبتىڭ ساپىندا ءبىرىنشى ليگادا ويناعىسى كەلمەگەن ولار كوماندانى تاستاپ كەتكەن بولاتىن. بىراق باسقا ۇجىمداردا دا بۇل شابۋىلشىلاردىڭ جولدارى بولمادى. الىبەك الدىمەن «ورداباسىنىڭ» قوسالقى قۇرامىن تولىقتىرعان بولسا، ەكىنشى اينالىمدا «اتىراۋعا» اۋىستى. دەگەنمەن مۇندا دا دارىندى شابۋىلشى سۇرمەرگەندىك قاسيەتىن كورسەتە الار ەمەس. ال رافاەل ءبىرىنشى اينالىمدى پرەمەر-ليگاسىز وتكىزىپ، جازعى ماۋسىمارالىق ۇزىلىستە چەمپيونات اۋتسايدەرى قىزىلوردالىق «قايساردىڭ» ساپىنا اۋىستى.

بۇل اتالعان ساڭلاقتار - بىلتىر كوماندا ساپىندا ونەر كورسەتكەندەردىڭ از عانا بولىگى. ايتپەسە بىلتىر چەمپيونات اياقتالعان ساتتە كوماندادا 21 فۋتبولشى بولعان. بيىل سولاردىڭ تەك ۇشەۋى عانا «قايراتقا» ادالدىعىن كورسەتە الدى.

«الاش ايناسى» گازەتى، 12.08.2009