جىل سايىن ەلىمىزدە 35 مىڭنان استام ادام وبىرعا شالدىعادى. بۇل تۋرالى بۇگىن سەناتتاعى ۇكىمەت ساعاتىندا دەنساۋلىق ساقتاۋ ءمينيسترى اجار عينيات مالىمدەدى.

«رەسپۋبليكادا ءجىتى كورونارلىق سيندرومى بار ناۋقاستارعا كومەك كورسەتۋ ءۇشىن 41 تەرى ارقىلى كورونارلىق ارالاسۋ ورتالىعى، 74 ينسۋلت ورتالىعى جۇمىس ىستەيدى. كورونارلىق ارالاسۋ ورتالىقتارى مەن ينسۋلت ورتالىقتارى جەلىسىن ودان ءارى دامىتامىز. 2-دەڭگەيلى 4 تەرى ارقىلى كورونارلىق ارالاسۋ ورتالىعى تۇركىستان، قاراعاندى، الماتى جانە جامبىل وبلىستارىندا اشىلدى. سونداي-اق 30 ينسۋلت ورتالىعىن اشۋدى جوسپارلاپ وتىرمىز. 2023-2025 جىلدارى قىزىلوردا، ماڭعىستاۋ، شىمكەنت، الماتى قالالارىندا اشىلادى. اتىراۋ، شىعىس قازاقستان، باتىس قازاقستان وبلىستارىندا دا بۇل جۇمىس قولعا الىنعان»، - دەدى مينيستر.

اجار عينيات ونكولوگيالىق اۋرۋلارمەن كۇرەس مەملەكەت باسشىلىعىنىڭ ەرەكشە باقىلاۋىندا تۇرعانىن باسا ايتتى.

«جىل سايىن ەلىمىزدە 35 مىڭنان استام ادام وبىرعا شالدىعىپ، 14 مىڭنان استام ادام قايتىس بولادى، ديسپانسەرلىك ەسەپتە 200 مىڭنان استام قازاقستاندىق تۇر. ونكولوگيادان بولاتىن ءولىم-ءجىتىم ءۇشىنشى ورىنعا شىقتى»، - دەدى ول.

اجار عينيات مينيسترلىك ونكولوگيالىق اۋرۋلارمەن كۇرەس جونىندەگى 2023-2025 جىلدارعا ارنالعان كەشەندى جوسپاردىڭ جوباسىن ازىرلەگەندىگىن اتاپ ءوتتى.

Abai.kz