قىتاي باتىسىنداعى شىڭجاڭ ولكەسىنىڭ اكىمشىلىك ورتالىعى ۇرىمجىدە كوروناۆيرۋس شەكتەۋلەرىنە بايلانىستى نارازىلىق ءوتىپ جاتىر. الەۋمەتتىك جەلىلەر مەن مەسسەنجەرلەردە وقيعا ورنىنان تۇسىرىلگەن ۆيدەولار تارادى. ۆيدەولار 25 قاراشادا تۇسىرىلگەن دەپ ايتىلادى.

سونداي ۆيدەولاردىڭ بىرىندە نارازى جۇرتتىڭ ارنايى قورعانىش كيىم كيىپ، ماسقا تاققان قىزمەتكەرلەردىڭ قورشاۋىنان سىتىلۋعا تىرىسىپ جاتقانى كورىنەدى. ۆيدەونىڭ تۇپنۇسقالىعىن تاۋەلسىز دەرەككوزدەر ارقىلى تەكسەرۋ مۇمكىن بولمادى.

بريتاندىق Financial Times باسىلىمىنىڭ جازۋىنشا، نارازىلىق كوپ قاباتتى تۇرعىن ۇيدەگى ورتتەن كەيىن باستالعان. ورتتەن كەمىندە ون ادام قازا بولعان. الەۋمەتتىك جەلىدەگى اقپاراتقا قاراعاندا، ءورت سوندىرۋشىلەر مەن قۇتقارۋشىلار كوروناۆيرۋس شەكتەۋلەرىنە بايلانىستى وقيعا ورنىنا دەر كەزىندە جەتە الماعان.

قىتايدىڭ مەملەكەتتىك سينحۋا اگەنتتىگىنىڭ جازۋىنشا، پەكين ءورت تۋرالى اقپاراتتى تەرىستەپ، ەسىك جابىق بولعانى جايلى ينتەرنەتتە تاراعان سۋرەتتەردىڭ ءبىر بولىگىن فەيك دەپ اتادى.

ۇرىمجىدەگى وقيعاعا بايلانىستى نارازىلىق شامامەن ءۇش جىل ۆيرۋستى تەجەۋگە بەلگىلى ءبىر دارەجەدە كومەكتەسكەن قىتايدىڭ ىندەتكە بايلانىستى قاتاڭ تىيىمدارىنان جۇرتتىڭ كوڭىلى قالعانىن بىلدىرەدى دەپ جازدى Financial Times.

كوروناۆيرۋس كوبەيگەن شاقتا پەكيننىڭ قاتاڭ شارالارى داعدارىس كەزەڭىنە تاپ بولدى. كەيىنگى كۇندەرى قىتاي بيلىگى كوروناۆيرۋس جۇقتىرعانداردىڭ رەكوردتىق كورسەتكىشىن تىركەپ جاتىر. قوعامدا نارازىلىق ارتتى.

Abai.kz