جارتى ساعات اۆتوبۋس كۇتكەن الماتى اكىمى ەربولات دوساەۆ BRT جەلىسى تۋرالى ايتتى. بۇل تۋرالى tengrinews.kz جازدى.  

المالى اۋدانىنىڭ تۇرعىندارىمەن كەزدەسۋدە قالا تۇرعىندارى تيميريازەۆ كوشەسى بويىنداعى BRT جەلىلەرىن شەتكى وڭ جاق جولاققا اۋىستىرماۋدى سۇرادى. جاۋاپ رەتىندە دوساەۆ BRT جەلىلەرىن نەگە وزگەرتۋ جوسپارلانىپ وتىرعانىن ءتۇسىندىردى.

"مەن ونى جامان دەپ ايتپايمىن، ويتكەنى مەنى ايىپتاپ جاتىر، دوساەۆ BRT-گە سالعان ءتورت ميلليارد تەڭگەنى "جوق" قىلماقشى دەپ. بىراق پروبلەمالار بار ەكەنى انىق. بۇل تۋرالى جوبانىڭ باستاماشىلارى دا ايتىپ جاتىر. جوبا بەس جىلدا اياقتالماعان. مىسالى، باستى ماسەلە قازۇۋ ماڭىندا، سەبەبى ول جەردە جاياۋ جۇرگىنشىلەر وتكەلى رەتتەلمەگەن، بۇل كولىك كەپتەلىسىن تۋدىرادى.

سوندىقتان پروبلەمالاردى شەشۋ قاجەت: ەگەر BRT ىسكە قوسىلسا، وندا ءتيىستى ارالىقتار بولۋى كەرەك، جىلجىمالى قۇرام بولۋى كەرەك جانە ت.ب. بىراق بۇگىندە ول جوق. مەن ءوزىم دە ءجۇردىم، №32 اۆتوبۋسپەن BRT ارقىلى تومەن ءتۇستىم. مەن اۆتوبۋستى 33 مينۋت كۇتتىم، سەبەبى ءتورت اۆتوبۋس شىقپاعان. بىزدە كولىك قورى جوق ەكەن. سوندىقتان، كەلەر جىلى ماسەلەنى قالاي دا شەشىپ، قوزعالىس ارالىقتارىن قىسقارتۋ ءۇشىن قوسىمشا 300 جاڭا اۆتوبۋس پەن 100 تروللەيبۋس ساتىپ الامىز", - دەدى قالا اكىمى.

ونىڭ ايتۋىنشا، BRT جەلىسىنىڭ پروبلەماسى باسقا. دوساەۆ اۆتوبۋسپەن كەلە جاتىپ جولعا قانشا ۋاقىت كەتكەنىن ەسەپتەگەنىن ايتتى.

"مەن №32 اۆتوبۋس بويىنشا قانشا جول جۇرگەنىمىزدى ەسەپتەپ كوردىم. بايقاساڭىز، كلاسسيكالىق BRT تەك تيميريازەۆ – بايتۇرسىنوۆتان باستالىپ، ارنايى جولاق ورنالاسقان جەرگە دەيىن جەتەدى. ال بۇگىن اۆتوبۋستار جۇرەتىن وڭ جاق جولاقتا ءار باعدارشامدا تۇرىپ قالامىز. سوندىقتان، پروبلەمالار بار، ولاردى بىرگە شەشەمىز. BRT بويىنشا اتقارىلعان جۇمىستى ەشكىم جوققا شىعارمايدى.

مەنىڭ تۇسىنۋىمشە، بۇل تۋرالى ايتقانداردىڭ وزدەرى اۆتوبۋسپەن ءجۇرىپ كورمەگەن. مەن ولاردىڭ دا اۆتوبۋسپەن ءجۇرىپ، قالاي ەكەنىن بىلگەنىن قالايمىن. كەز كەلگەن ۋاقىتتا كورسىن. جەكە كولىكتىڭ تەرەزەسىنەن ءبارى باسقاشا كورىنەدى ەكەن. سوندىقتان، BRT ماسەلەسىن شەشەمىز", - دەپ تۇيىندەدى ءسوزىن ەربولات دوساەۆ.

Abai.kz