ءماجىلىستىڭ جالپى وتىرىسىندا مادەنيەت جانە سپورت ءمينيسترى داۋرەن اباەۆ پەن يندۋستريا جانە ينفراقۇرىلىمدىق دامۋ ۆيتسە-ءمينيسترى ەركەبۇلان داۋىلباەۆ دەپۋتاتتارعا ىشكى تۋريزم مەن ونى كولىكپەن قامتاماسىز ەتۋدىڭ جاي-كۇيى تۋرالى بايانداپ، «AMANAT» فراكتسياسىنىڭ مۇشەسى ەلنۇر بەيسەنباەۆتىڭ 12 قازان كۇنگى دەپۋتاتتىق ساۋالىنا جاۋاپ بەردى.

داۋرەن اباەۆ دەپۋتاتتارعا شەتەلدىك تۋريستەر اعىنىنىڭ ءوسۋى، قازاقستاندا ءتۋريزمدى دامىتۋ جوسپارلارى جانە Kids Go Free باعدارلاماسىن جۇزەگە اسىرۋ بارىسى تۋرالى ايتىپ بەردى.

– بالالاردىڭ دەمالىسىنا جول اقىسىن تولىعىمەن تولەيتىن الەمدەگى جالعىز مەملەكەت – قازاقستان. ەۋروپادا دا، امەريكادا دا، ازيادا دا مۇنداي جوق، – دەدى مينيستر.

وسى رەتتە دەپۋتاتتار باعدارلامانىڭ وزىنە جانە ونىڭ وپەراتورى «Kazakh Tourism» ۇلتتىق كومپانياسىنا بيۋدجەتتەن قىرۋار قارجى ءبولىنىپ جاتقانىن ءمينيستردىڭ ەسىنە سالدى. 2022 جىلى Kids Go Free باعدارلاماسىنا بولىنگەن قارجىنىڭ 16 پايىزى عانا يگەرىلگەن.

دەپۋتاتتاردىڭ ايتۋىنشا، باعدارلاما سۇرانىستىڭ جوقتىعىنان ەمەس، ونى جۇزەگە اسىرۋدىڭ دۇرىس تەتىگى بولماۋىنان اقساپ تۇر. قولدانىستاعى جۇيەگە سايكەس قۇجاتتاردى جيناۋ جانە اقشانى قايتارۋ بويىنشا بارلىق جاۋاپكەرشىلىك تۋروپەراتورعا جۇكتەلسە، مۇددەلى تۇلعا تۇتىنۋشىنىڭ ءوزى بولۋى كەرەك.

دەپۋتاتتار مەملەكەت باسشىسىنىڭ ۇلكەن قولداۋىنا قاراماستان، تۋريزم دامۋىندا ىلگەرىلەۋشىلىك جوق دەپ ەسەپتەيدى. تاعى ءبىر مىسال، تۋريستىك كومپانيالارعا جەتپەي قالا بەرەتىن جابدىقتالعان اۆتوبۋستاردى ساتىپ الۋ باعدارلاماسى. بۇگىندە تاسىمالداۋ اقىسىن قايتارۋ ءبىر، ءتىپتى ەكى جىلدان كەيىن جاسالادى. بۇل – باعدارلامانى ءتيىمىز ەتەدى. بىلتىر سۋبسيديا ارقىلى ەكى اۆتوبۋس قانا ساتىپ الىنعان.

اۋە جانە تەمىرجول تاسىمالىنىڭ ساپاسىنا دا نازار اۋدارىلدى. ماجىلىسمەندەر ەلدەگى ۆاگونداردىڭ 68 پايىزىنىڭ توزىعى جەتسە دە، بيلەت باعاسىنىڭ قۇنى تومەندەمەيتىنىن باسا ايتتى.

– ميللياردتاعان بيۋدجەتتى ەلىمىزدىڭ تۋريستىك الەۋەتىن تالداۋعا، مامانداردىڭ شەتەلدىك ساپارلارىنا وڭدى-سولدى جۇمساپ جاتقان كەزدە ءبىزدىڭ تۋريستىك نارىقتى كورشى ەلدەر يەلەنىپ وتىر. شەتەلدىك تۋريستىك فيرمالار قازاقستانعا تۋرلار ساتاتىن جاعدايعا جەتتىك. ويتكەنى ولاردىڭ اۆياكومپانيالارى جەڭىلدىكتەرگە دايىن. وزبەكستان بولسا، جايلى قۇرامداردى ىسكە قوسىپ، قازاقستان بويىنشا تۋرلار ۇيىمداستىرۋدا. تۋريستىك ءونىم وتكىزىلەتىن جەردە سالىقتىق تۇسىمدەر دە بولاتىنى، نارىقتىڭ دا دامي تۇسەتىنى بەلگىلى. مۇنى ءبارىمىز جاقسى تۇسىنەمىز. وسىنىڭ ءبارىن نەگە ءوز ەلىمىزدە جاساماسقا؟ – دەدى ە.بەيسەنباەۆ.

ءماجىلىس توراعاسى ەرلان قوشانوۆ ارىپتەستەرىن قولدايتىنىن ايتتى.

– جىلدار بويى قوردالانىپ قالعان ماسەلەلەر سالدارىنان ءوزىمىزدىڭ تۋريستىك الەۋەتىمىزدى باسقا مەملەكەتتەرگە بەرىپ قويىپ وتىرمىز. ءبىزدىڭ تۋريستەرىمىزدى شەتەل كولىكتەرى كەلىپ تاسىمالداپ ءجۇر جانە ءبىز ولاردان ەشتەڭە المايمىز. بۇل ماسەلەگە كەلەسى جىلدىڭ باسىندا قايتا ورالىپ، جاعدايدىڭ قالاي تۇزەلەتىنىن كورەمىز، – دەپ تۇيىندەدى ءسوزىن سپيكەر.

Abai.kz