2022 جىلعى 1 قىركۇيەكتەگى جاعداي بويىنشا  قازاقستاندا جەرگىلىكتى اتقارۋشى ورگانداردىڭ رۇقساتىمەن جۇمىس ىستەپ جۇرگەن شەتەلدىكتەر سانى – 15 524 ادام.

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، قازىرگى ۋاقىتتا قازاقستاندا شەتەلدىك جۇمىس كۇشىن پايدالاناتىن 1 748 جۇمىس بەرۋشى بار. ولاردا 400 مىڭنان استام قازاقستان ازاماتتارى جۇمىس ىستەيدى، بۇل قىزمەتكەرلەردىڭ جالپى سانىنىڭ 96% - ىن قۇرايدى.

ەڭبەك ميگرانتتارى ەڭ كوپ جۇمىس ىستەيتىن سالا – قۇرىلىس سالاسى. وندا 6 139 ادام ەڭبەك ەتەدى. تاۋ-كەن ونەركاسىبى جانە كارەرلەردى قازۋ سالاسىندا 1 489 ادام; اۋىل، ورمان جانە بالىق شارۋاشىلىعىندا 1 256 ادام; كاسىبي، عىلىمي جانە تەحنيكالىق قىزمەتتە 1 158 ادام; وڭدەۋ ونەركاسىبىندە – 1 154 ادام جۇمىس ىستەيدى.

قازاقستانعا ەڭبەك ميگرانتتارى كەلەتىن نەگىزگى ەلدەر – قىتاي - 3 576 ادام، ءۇندىستان - 1 740 ادام، تۇركيا-1 701 ادام، وزبەكستان-1 535 ادام، ۇلىبريتانيا-1 127 ادام.

ەستەرىڭىزگە سالا كەتەيىك، ىشكى ەڭبەك نارىعىن قورعاۋ ماقساتىندا قر ەڭبەك جانە حالىقتى الەۋمەتتىك قورعاۋ مينيسترلىگى جىل سايىن شەتەلدىك مامانداردى تارتۋعا كۆوتا بولەدى. بيىل قاڭتاردا وتكەن ءىرى وتاندىق بيزنەس وكىلدەرىمەن كەزدەسۋدەگى مەملەكەت باسشىسىنىڭ تاپسىرماسىنان كەيىن، مينيسترلىك ميگرانتتارعا بەرۋگە جوسپارلاعان كۆوتا سانىن 16 پايىزعا قىسقارتتى.

Abai.kz