قىرعىزستاندا ءوتىپ جاتقان ەۋرازيالىق ۇكىمەتارالىق كەڭەس وتىرىسى الاڭىندا قر پرەمەر-ءمينيسترى ءاليحان سمايىلوۆ رف ۇكىمەتىنىڭ توراعاسى ميحايل ميشۋستينمەن كەزدەسۋ وتكىزدى. بۇل تۋرالى قر ۇكىمەتىنىڭ ءباسپاسوز قىزمەتى مالىمدەدى، دەپ حابارلايدى "ادىرنا" پورتالى.

كەزدەسۋدە ءاليحان سمايىلوۆ قازاقستان مەن رەسەي ىنتىماقتاستىعىنىڭ نىعايۋىنا جوعارى دەڭگەيدەگى تۇراقتى كەزدەسۋلەردىڭ سەرپىن بەرىپ وتىرعانىن، سونداي-اق ەكى ەل اراسىنداعى مەملەكەتارالىق بايلانىستار بارلىق باعىتتار بويىنشا ءوزارا ءىس-قيمىلدىڭ جوعارى دەڭگەيىنە كوتەرىلگەنىن اتاپ ءوتتى.

سونداي-اق، ول  وتكەن 30 جىل ىشىندە مەملەكەتتەر اراسىندا سەنىمدى جانە سىندارلى ديالوگ ورناتىلعانىن دا ايتا كەتتى.

"رەسەي – ءبىزدىڭ ساۋدا-ەكونوميكالىق سەرىكتەسىمىز. 2021 جىلدىڭ قورىتىندىسى بويىنشا ءوزارا تاۋار اينالىمى ۇشتەن بىرگە ءوسىپ، $24,2 ملرد كولەمىندە رەكوردتىق كورسەتكىشكە قول جەتكىزدىك. 2022 جىلدىڭ ءبىرىنشى جارتىجىلدىعىندا دا ساۋدا 5%-عا ارتتى. جىل قورىتىندىسى بويىنشا وڭ قارقىن ساقتالىپ، داميتىنىنا سەنىم ارتامىز", – دەدى سمايىلوۆ.

ال ميحايل ميشۋستين رەسەيدىڭ قازاقستانمەن تاتۋ كورشىلىگى مەن دوستىعىن باعالايتىنىن ايتتى.

ء"بىز يمپورتتى الماستىرۋ بويىنشا بىرلەسكەن باعدارلامالاردى جۇزەگە اسىرۋدىڭ جاقسى پەرسپەكتيۆالارىن كورىپ وتىرمىز. ونەركاسىپ، ەنەرگەتيكا، ماشينا جاساۋ، كولىك ينفراقۇرىلىمى، بەيبىت اتوم، تسيفرلاندىرۋ سياقتى سالالاردا جاڭا ستراتەگيالىق جوبالاردى ىسكە قوسۋ ءۇشىن مۇمكىندىكتەر بار. اتالعان ماسەلەلەر ءبىزدىڭ تۇراقتى نازارىمىزدا", – دەدى ميحايل ميشۋستين.

ەكى تاراپ كەلىسسوز بارىسىندا ونەركاسىپ ونىمدەرىن جەتكىزۋ جانە ساۋدا-ساتتىق ماسەلەلەرىن تالقىلادى كەلىسسوز بارىسىندا تاراپتار ونەركاسىپتىك كووپەراتسياعا قاجەتتى ونىمدەردى جەتكىزۋ، قازاقستاندىق شيكىزات ءترانزيتى، سونداي-اق تاۋارلاردى كەدەرگىسىز شىعارۋ ماسەلەلەرىن تالقىلادى.

Abai.kz