بۇگىن  ءماجىلىس دەپۋتاتى سامات مۋساباەۆ «AMANAT» پارتياسىنىڭ ماڭعىستاۋ وبلىستىق فيليالىندا وڭىردەگى قۇرىلىسشىلار مەن جوبالاۋشى ۇيىم وكىلدەرىمەن، مەملەكەتتىك جانە جەكە ساراپتاما قىزمەتىن كورسەتەتىن ۇجىم وكىلدەرىمەن كەزدەستى.

جيىندا قۇرىلىس سالاسىنىڭ ماماندارى جوبالىق، سمەتالىق قۇجاتتىڭ  دۇرىس جاسالمايتىنىن ايتىپ، ءار تاراپ وزدەرىنىڭ ۋاجدەرىن جەتكىزىپ،  قۇرىلىس سالاسىنداعى كەمشىلىكتەردى تالقىعا سالدى.

كومپانيا باسشىلارى قۇرىلىس ماتەريالدارىنىڭ قىمباتتاعانىن، سونىڭ سالدارىنان قۇرىلىس جۇمىستارىنىڭ كەشىگىپ جاتقانىن، سونداي-اق ونى جالعاستىرۋ ءۇشىن بيۋدجەتتەن قوسىمشا قارجى بولىنسە دەگەن ۇسىنىستارىن ايتتى.

«باستى ماسەلە جوبالىق، سمەتالىق قۇجاتتىڭ دۇرىس جاسالماۋى. بۇعان كىم كىنالى: قۇرىلىسشى ما، جوبالاۋشى ۇيىم با، الدە ساراپتاۋ ۇيىمى ما؟ جيىندا وسى ماسەلە ۇزاق تالقىلاندى. بۇدان كەيىنگى ۇلكەن ماسەلە – قۇرىلىس ماتەريالدارىنىڭ قىمباتتاۋى. بۇگىنگى تاڭدا وسى قىمباتشىلىق اسەرىنەن توقتاپ قالعان قۇرىلىستاردى جۇرگىزۋ ءۇشىن بيۋدجەتتى قايتا قاراۋ كەرەك»، – دەدى سامات مۇساباەۆ.

دەپۋتات الداعى ۋاقىتتا اتالعان ماسەلەلەردى باقىلاۋىنا الاتىن جەتكىزدى.

سونىمەن قاتار بۇگىن ءماجىلىس دەپۋتاتى امانجول ءالتاي ۇلىتاۋ وبلىسىنىڭ  جەزقازعان قالاسىنداعى كيىم جانە تۇرمىستىق جانە تەحنيكالىق ماقساتتاعى بۇيىمداردى وندىرەتىن «يۋتاريا» جشس ەڭبەك ۇجىمىمەن كەزدەستى.

جەزقازعان قالاسىنداعى تسەحتا بۇگىنگى تاڭدا 300-دەن اسا قىزمەتكەرلەر ءۇش اۋىسىمدا ەڭبەك ەتەدى. تىگىننەن بولەك، بۇل مەكەمەنىڭ قالا بويىنشا بىرنەشە ساۋدا ورتالىقتارى بار. ونىڭ ءبىرى جەزقازعان جانە ساتباەۆ قالالارىنىڭ ورتاسىندا ورنالاسقان گيپەرماركەت ەكى قالانىڭ تۇرعىندارىن جۇمىس ورنىمەن قامتاماسىز ەتىپ وتىر.

جيىندا دەپۋتات ۇجىم قىزمەتكەرلەرىنىڭ جالاقىعا قاتىستى تالاپ-تىلەكتەرىن تىڭداپ، وندىرىستىك سالادا ەڭبەك ەتىپ جۇرگەن ازاماتتاردىڭ ماسەلەلەرىن الداعى ۋاقىتتا كوتەرەتىنىن جەتكىزدى.

Abai.kz