ءماجىلىس دەپۋتاتتارى بەرىك بەكجانوۆ، بەرىك وسپانوۆ پەن فاحريددين قاراتاەۆ شىمكەنت قالاسىنا بارىپ، ءال-فارابي اۋداندىق جۇمىسپەن قامتۋ ورتالىعىنىڭ ۇجىمىمەن كەزدەستى.

بۇگىنگى تاڭدا حالىقتى جۇمىسپەن قامتۋ ورتالىعى ەلىمىزدەگى جۇمىسسىز ازاماتتاردى جۇمىسپەن قامتۋعا جاردەم كورسەتىپ، ەڭبەكپەن قامتۋدىڭ بەلسەندى شارالارىن ىسكە اسىرادى. سونداي-اق بوس ورىندار جارمەڭكەسىن ۇيىمداستىرىپ، كاسىپتىك باعدار بەرۋدى جۇرگىزەدى.

شىمكەنت قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى بالمارجان ناربەكوۆا اتاپ وتكەندەي، اۋداندىق ورتالىقتا بۇگىندە 20 قىزمەتكەر قالا تۇرعىندارىنا قىزمەت كورسەتۋدە. مەگاپوليس ستاتۋسىن العالى قالاداعى ءتورت اۋداندا اۋداندىق جۇمىسپەن قامتۋ ورتالىقتارى اشىلىپ، وسى باعىتتا شارالاردى ىسكە اسىرىپ كەلەدى. ورتالىققا 18 جاستان باستاپ زەينەتكەر جاسىنا دەيىنگى جۇمىسسىز ازاماتتار كەلىپ، جۇگىنۋگە قۇقىلى.

ءوز كەزەگىندە ءماجىلىس دەپۋتاتتارى «AMANAT» پارتياسىنىڭ 2021-2025 جىلدارعا ارنالعان سايلاۋالدى باعدارلاماسىن ىسكە اسىرۋ ماقساتىندا دايىندالعان جول كارتاسىن ءتيىمدى جۇزەگە اسىرۋ ماسەلەلەرىن پىسىقتاپ، اتاۋلى الەۋمەتتىك كومەك تاعايىندالعان تۇرعىندار تۋرالى كەڭىنەن اقپارات الدى.

ب.بەكجانوۆتىڭ ايتۋىنشا، ورتالىق ەڭبەك نارىعىندا سۇرانىسقا يە ماماندىقتار بويىنشا قىسقا مەرزىمدى كاسىپتىك وقىتۋدى جوعارى دەڭگەيدە ۇيىمداستىرعان.

جەتىم بالالار، مۇگەدەكتەر، پروباتسيا قىزمەتىنىڭ ەسەبىندە تۇرعان ادامدار مەن باس بوستاندىعىنان ايىرۋ ورىندارىنان بوساتىلعان ازاماتتار جۇمىسپەن قامتىلعان. وسىعان بايلانىستى ەلىمىزدەگى جۇمىسسىز جۇرگەن ازاماتتارعا قولداۋ كورسەتىپ، ەڭبەككە ارالاستىراتىن ورتالىقتاردىڭ جۇمىسىن ارتتىرۋ كەرەك، – دەدى دەپۋتات.

كەزدەسۋ بارىسىندا جول كارتاسىندا جوسپارلانعان اگروكەشەن ايماعىن سالۋ، جىلىجاي، سونداي-اق، ستۋدەنتتەرگە ارنالعان جاتاقحانالاردى ۋاقىتىلى سالۋ ماسەلەلەرى تالقىلاندى.

وسى كۇنى ءماجىلىس دەپۋتاتى تىلەكتەس ادامبەكوۆ قاراعاندى وبلىسىنداعى اباي شاحتاسىنا بارىپ، ەڭبەك ۇجىمىمەن كەزدەستى. جيىندا شاحتەرلەر زەينەتكەرلىك جاستى تومەندەتۋ مەن ەلدەگى ازىق-تۇلىك پەن جىلجىمايتىن مۇلىك باعاسىنىڭ وسۋىنە شاعىمداندى.

تىلەكتەس ادامبەكوۆ زەينەتكەرلىك جاستى وزگەرتۋ ماسەلەسى ۇكىمەتتە دە، دەپۋتاتتىق كورپۋستا دا قارالىپ جاتقانىن جەتكىزدى.

Abai.kz