نۇر-سۇلتان قالاسىندا 2023 جىلى امەريكالىق جوعارى وقۋ ورنى Michigan State University اشىلادى. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك مالىمدەدى.

«الەمدىك ءبىلىم بەرۋ ستاندارتتارى مەن وزىق پراكتيكانى ءبىلىم بەرۋ پروتسەسىنە ەنگىزۋ ءۇشىن شەتەلدىك جوعارى وقۋ ورىندارىنىڭ فيليالدارى اشىلۋدا. 2021 جىلى De Montfort Leicester ۋنيۆەرسيتەتىنىڭ فيليالى الماتى قالاسىندا اشىلدى. بيىل پەتروپاۆل قالاسىندا University of Arizona فيليالى اشىلادى. جوو-مەن ىنتىماقتاستىق اياسىندا قوس ديپلومدى ءبىلىم بەرۋ باعدارلامالارى ىسكە قوسىلادى»، - دەدى ساياسات نۇربەك.

ونىڭ ايتۋىنشا، ەلىمىزدە مەملەكەت باسشىسىنىڭ تاپسىرماسىمەن  رەسەي ۋنيۆەرسيتەتتەرىنىڭ فيليالدارى اشىلۋدا. س.وتەباەۆ اتىنداعى اتىراۋ مۇناي جانە گاز ۋنيۆەرسيتەتىنىڭ بازاسىندا بيىل م.گۋبكين اتىنداعى رمۋ فيليالى، الماتى قالاسىندا ءال-فارابي اتىنداعى قازۇۋ بازاسىندا «ميفي» ۇلتتىق يادرولىق زەرتتەۋ ۋنيۆەرسيتەتىنىڭ فيليالى اشىلادى.

«سونداي-اق، كەلەسى جىلى نۇر-سۇلتان قالاسىندا Michigan State University اشۋ جوسپارلانۋدا. فيليالداردىڭ جۇمىس ىستەۋى ءۇشىن ۇكىمەت قاۋلىلارى قابىلداندى. مەملەكەتتىك ءبىلىم بەرۋ تاپسىرىسى بولىنگەن»، - دەدى مينيستر.

Abai.kz