قازاقستان بالاباقشالاردىڭ قولجەتىمدىلىگى تولىق شەشىلمەگەن مەملەكەت سانالادى. بۇل ءبىر جاعىنان دەموگرافيانىڭ قارقىندى كوبەيۋىمەن تۇسىندىرىلسە، ەكىنشى جاعىنان جۇيەسىز ۋربانيزاتسيامەن دە تۇسىندىرىلەدى. سول سەبەپتى دە قازاقستان بالاباقشا سالۋدى قالالىق ايماقتا بارىنشا جىلدامداتۋعا مۇددەلى. الماتى قالاسى دا بۇل تەندەنتسيادان قالماق ەمەس. بالالار سانى بويىنشا كوش باستاپ تۇرعان قالادا جاڭالىقتار جەتەرلىك.

الماتىدا جىل سوڭىنا دەيىن 560 ورىنعا ارنالعان 2 مەملەكەتتىك بالاباقشا جانە 6 مىڭ ورىندىق 69 جەكەمەنشىك بوبەكجاي اشىلماق. بۇل تۋرالى ءبىلىم باسقارماسى باسشىسىنىڭ ورىنباسارى قايرات جۇمانوۆ مالىمدەدى.

ونىڭ ايتۋىنشا، قازىر قالادا 43 مىڭنان استام ءبۇلدىرشىن بالاباقشا كەزەگىندە تۇر. ايتا كەتەيىك، الماتىدا 866 مەكتەپكە دەيىنگى ۇيىم جۇمىس ىستەپ تۇر. وندا 75 مىڭنان استام بالا تاربيەلەنىپ جاتىر.

«قالادا مەكتەپكە دەيىن ءبىلىم بەرۋ سالاسىنداعى نەگىزگى پروبلەما بالاباقشالارداعى ورىن تاپشىلىعى بولىپ تابىلادى. بۇگىنگى تاڭدا، 1-6 جاسقا دەيىنگى 43 مىڭنان استام بالا كەزەكتە تۇر. 2-6 جاسقا دەيىن بالالار 71,4 پايىز، 3-6 جاسقا دەيىنگى بالالاردى 91,6 پايىز قامتىلعان»، – دەدى ءبىلىم باسقارماسى باسشىسىنىڭ ورىنباسارى قايرات جۇمانوۆ.

ال بالاباقشالاردى ليتسەنزيالاۋ كەزەڭ-كەزەڭىمەن جۇرگىزىلەدى. الدىمەن جاڭادان اشىلعان بوبەكجايلار تەكسەرىلەدى. ەكىنشى، مەملەكەتتىك اتتەستاتتاۋدان وتپەگەن بالاباقشالار، ءۇشىنشى، بارلىق جۇمىس ىستەپ تۇرعان مەكتەپكە دەيىنگى ءبىلىم بەرۋ ۇيىمى تاۋەكەلدەردى باعالاۋ دەڭگەيى بويىنشا ليتسەنزيالاناتىن بولادى.

«ءبىلىم مينيسترلىگى مەكتەپكە دەيىنگى ۇيىمداردا ليتسەنزيالاۋدى ەنگىزۋ بويىنشا جۇمىس جۇرگىزىپ جاتىر. قازىرگى زاڭنامادا بەلگىلەنگەن تارتىپپەن ەنگىزىلگەن ليتسەنزيالاۋدىڭ رەتتەۋشى اسەرىنە تالداۋ جاسالادى. سودان كەيىن ءتيىستى زاڭ جوباسى قابىلدانادى. بۇگىنگى كۇنگە قولدانىستاعى نورمالارعا سايكەس مەكتەپكە دەيىنگى ۇيىمداردا اشۋ كەزىندە قىزمەتتىڭ باستالعانى تۋرالى تەك حابارلاما تۇرىندە جىبەرۋ قاجەت»، – دەدى ءبىلىم بەرۋ ساپاسىن قامتاماسىز ەتۋ دەپارتامەنتى باسشىسىنىڭ ورىنباسارى گۇلدانا وماروۆا.

ەستەرىڭىزگە سالا كەتەيىك، بۇعان دەيىن الماتىنىڭ سايالى شاعىن اۋدانىندا 160 بالاعا ارنالعان بالاباقشانىڭ قۇرىلىسى باستالعانى تۋرالى ايتىلعان بولاتىن. ول تۋرالى الماتى اكىمى ەربولات دوساەۆ حابارلادى.

«قازىرگى ۋاقىتتا زەردەلى شاعىن اۋدانىندا دەنە شىنىقتىرۋ-ساۋىقتىرۋ كەشەنى سالىنىپ جاتىر. 2023 جىلدىڭ ناۋرىز ايىندا اياقتاۋ جوسپار بار. بالالاردى سىنىپتان تىس وقىتۋمەن قامتۋ كولەمىن ودان ءارى ارتتىرۋ ءۇشىن قازىرگى ۋاقىتتا كوپسالالى يننوۆاتسيالىق شىعارماشىلىق ورتالىق (وقۋشىلار سارايى) سالىنۋدا. وعان 5 مىڭنان استام بالا باراتىن بولادى. قۇرىلىسى 2023 جىلدىڭ II توقسانىندا اياقتالادى»، - دەدى قالا اكىمى ەربولات دوساەۆ.

سونىمەن قاتار قاراسۋ تۇرعىندارىنىڭ تىلەكتەرىن ەسكەرە وتىرىپ، شاھار باسشىسى مادەنيەت ءۇيىنىڭ عيماراتىن ساتىپ الۋ تۋرالى تاپسىرما بەردى. قاجەتتى قارجى (483 ملن. تەڭگە) ءبولىندى، عيماراتتى ساتىپ الۋ جۇمىستارى ءجۇرىپ جاتىر.

«جىل سوڭىنا دەيىن وندا كەمىندە 10 شىعارماشىلىق جانە ءبىلىم بەرۋ سەكتسياسىن اشامىز جانە كۇن سايىن 150-گە جۋىق بۇلدىرشىندەرىمىز وسى سەكتسيالارعا قاتىسا الادى»، - دەدى ەربولات دوساەۆ.

Abai.kz