الماتىدا 183 مەكتەپتىڭ جانىندا جازعى دەمالىس كەزىندە 1-4 سىنىپ وقۋشىلارىنا ارنالعان لاگەرلەر ۇيىمداستىرىلدى. سونىمەن قاتار،  قالا سىرتىنداعى ساۋىقتىرۋ لاگەرلەرىن دە بالالارعا ەستەن كەتپەس دەمالىس ۇيىمداستىرىلدى.

بيىل الماتىدا 183 مەكتەپتىڭ جانىندا وقۋشىلارعا ارنالعان جارتى كۇندىك دەمالىس لاگەرلەرى جۇمىس ىستەپ تۇر. بالالارعا ارنالعان دەمالىس لاگەرلەرى تۋرالى الماتى قالاسى ءبىلىم باسقارماسىنىڭ باسشىسى ءلاززات جىلقىباەۆا وكق بريفينگى بارىسىندا ايتىپ بەردى.

"جانۇيا"مامانداندىرىلعان كەشەنىندە تاربيەلەنىپ جاتقان 90-نان استام جەتىم جانە اتا-اناسىنىڭ قامقورلىعىنسىز قالعان بالالار ءبىر اي بويى وقۋشىلار سارايىنىڭ "ورنەك" جازعى لاگەرىندە دەمالدى. تامىز ايىندا الماتى SOS بالالار اۋىلىنىڭ 43 تاربيەلەنۋشىسى "سپۋتنيك" بالالار ساۋىقتىرۋ ورتالىعىندا دەمالادى", - دەدى لاززات جىلقىباەۆا.

ماسەلەن، 1-21 ماۋسىم ارالىعىندا المالى جانە مەدەۋ اۋداندارىندا تۇراتىن 1030 بالا "سپۋتنيك" بالالار ساۋىقتىرۋ ورتالىعىندا دەمالدى. "گاۋھارتاۋ" ساۋىقتىرۋ كەشەنىنە جەتىسۋ مەن ناۋرىزباي اۋداندارىنان تاعى 180 بالا كەلدى.

ءبىلىم باسقارماسى ارنايى باعدارلاما ازىرلەپ، الماتىلىق مەكتەپ وقۋشىلارى ءۇشىن ءتۇرلى ويىندار، قىزىقتى ءىس-شارالار ۇيىمداستىرىلدى.

ايتا كەتەيىك، بۇعان دەيىن "بالالار جىلىنا" وراي جازعى دەمالىس كەزىندە بالالاردىڭ دەمالىسى مەن ۋاقىت وتكىزۋىن ۇيىمداستىرۋ تۇجىرىمداماسىنا سايكەس «الماتى بۇلدىرشىندەرىنىڭ دەمالىسى - ۇلكەن ارمانعا جاسالعان شاعىن قادام!» اتتى جوبا ۇيىمداستىرىلعانى تۋرالى ايتىلعان بولاتىن.

"جازعى دەمالىس كەزىندە بالالاردىڭ جاراقات الۋى، قۇقىق بۇزۋشىلىقتار جاساۋى، جاسوسپىرىمدەردىڭ زياندى ادەتتەرگە ءۇيىر بولۋ قاۋپى ارتادى. جاز كەزىندە بالالار دەمالىسىن ۇيىمداستىرۋدىڭ ماقساتى، ەڭ الدىمەن، ولاردى الەۋمەتتىك قورعاۋ. ۇزدىكسىز ءبىلىم العان بالالاردىڭ جازعى دەمالىسىن ساپالى ۇيىمداستىرۋ ارقىلى، ءبىز ولاردى دامىتىپ، تاربيەلەپ، ساۋىقتىرىپ، كەلەسى وقۋ جىلىنا دايىنداپ جىبەرەمىز»،- دەدى الماتى قالاسى ءبىلىم باسقارماسى باسشىسىنىڭ ورىنباسارى قايرات جۇمانوۆ.

جازعى كەزەڭدە الماتىلىق وقۋشىلاردىڭ ۋاقىت وتكىزۋى كەلەسى باعىتتار بويىنشا ۇيىمداستىرىلدى:

ءبىرىنشىسى – 26 مامىردان باستاپ 17 ماۋسىمعا دەيىن 1-8 سىنىپ وقۋشىلارىنىڭ ۇلگەرىمىن جوعارىلاتۋ ءۇشىن ءبىلىم الاتىن جازعى مەكتەپتەر جۇمىس ىستەدى. جازعى مەكتەپتە سىنىپتاعى ساباقتاردان باسقا دەنە شىنىقتىرۋ ۋاقىتى، ويىندار، فلەشموبتار قاراستىرىلعان.

ەكىنشىسى – 1 ماۋسىمنان 27 تامىزعا دەيىن 7-13 جاستاعى بالالارعا ارنالعان جازعى مەكتەپ جانىنداعى لاگەر ەكى نۇسقادا ۇسىنىلدى: تولىق جانە جارتى كۇندىك .

ءۇشىنشىسى – مەكتەپتەردە سپورتتىق سەكتسيالار، ۇيىرمەلەر، ستۋديالار، وقىرمان كلۋبتارى مەن مەكتەپ كىتاپحانالارى جۇمىس ىستەيتىن بولادى. ءبىلىم بەرۋ ۇيىمدارىندا جازعى كەزەڭدە بارلىعى 1150 ۇيىرمە مەن سەكتسيا (بەينەلەۋ ونەرى، مۇسىندەۋ، توقۋ، قولدانبالى ونەر، سپورت سەكتسيالارى) جۇمىس ىستەيدى.

ءتورتىنشىسى – الماتىدا بالالارعا قوسىمشا ءبىلىم بەرۋ ۇيىمدارى (وقۋشىلار سارايى، التى وقۋشىلار ءۇيى، 44 جەكە قوسىمشا ءبىلىم بەرۋ ۇيىمدارى) جۇمىس ىستەيدى. جازعى دەمالىس كەزەڭىندە بالالارعا ارنالعان قوسىمشا ءبىلىم بەرۋ ۇيىمدارىندا بارلىعى 1200-گە جۋىق ۇيىرمەلەر مەن سەكتسيالار قولجەتىمدى.

بەسىنشىسى – قالالىق جانە قالا سىرتىنداعى بالالارعا ارنالعان جازعى  لاگەرلەر. بالالاردىڭ جازعى دەمالىسى بيۋدجەت قاراجاتى ەسەبىنەن، سونداي-اق كوممەرتسيالىق نەگىزدە ۇيىمداستىرىلدى.

ساۋىقتىرۋ دەمالىسىمەن ءبىرىنشى كەزەكتە الەۋمەتتىك وسال ساناتتاعى بالالار: كوپ بالالى، از قامتىلعان وتباسىلاردان شىققان بالالار، ەرەكشە ءبىلىم بەرىلۋىنە قاجەتتىلىگى بار بالالار قامتىلدى.

Abai.kz