ۋكراينانىڭ حەرسون وبلىسىنا "اسكەري-ازاماتتىق اكىمشىلىك باسشىسىنىڭ ورىنباسارى" ەتىپ رەسەي بيلىگى تاعايىنداعان كيريلل سترەموۋسوۆ تاسس اقپارات اگەنتتىگىنە "حەرسون وبلىسىنىڭ بيلىگى رەسەيگە قوسىلۋ جونىندە ءبىر كۇندە رەفەرەندۋم وتكىزۋ تۋرالى زاپوروجە وبلىسىنىڭ باستاماسىن قولدايتىنىن" ايتتى.
ءوزىن "زاپوروجە وبلىسىنىڭ اسكەري ازاماتتىق اكىمشىلىگى باس كەڭەسىنىڭ مۇشەسىمىن" دەپ سانايتىن ۆلاديمير روگوۆ "رەفەرەندۋمدى ءبىر كۇندە وتكىزۋ ۋكراينا تاراپىنان ارانداتۋشىلىقتى ازايتادى" دەپ مالىمدەدى.
"رەفەرەندۋمدى ءبىر كۇندە وتكىزسەك جامان بولماس ەدى. قالاي بولاتىنىن جاعدايعا قاراي كورەمىز. ءالى شەشىلمەگەن ماسەلە كوپ" دەدى ول.
بۇعان دەيىن ۋكراينانىڭ حەرسون جانە زاپوروجە وبلىستارىنىڭ رەسەي باسىپ العان ايماقتارىن اننەكسيالاۋ ءۇشىن قىركۇيەكتىڭ العاشقى جارتىسىندا رەفەرەندۋم ءوتۋى مۇمكىن دەگەن حابار تاراعان. رەسەي رەسمي تۇردە ناقتى كۇنىن ايتقان ەمەس، سىرتقى ىستەر ءمينيسترى سەرگەي لاۆروۆ "ۋكراينا ازاماتتارى ءوز تاعدىرىن وزدەرى انىقتايدى" دەۋمەن شەكتەلگەن.
مەليتوپول مەرى يۆان فەدوروۆ رەسەي باسىپ العان قالادا "رەفەرەندۋمعا" قىزۋ دايىندىق ءجۇرىپ جاتقانىن مالىمدەگەن. ونىڭ سوزىنشە، رەسەي اسكەريلەرى تۇرعىن ۇيلەردى جاپپاي ارالاپ، تۇرعىنداردى انىقتاۋمەن شۇعىلدانىپ ءجۇر".
11 ماۋسىمدا اتالعان ەكى وبلىستىڭ رەسەي قولىندا قالعان جەرلەرىندە رەسەي پاسپورتى تاراتىلا باستاعان. ءبىر ايدان كەيىن رەسەي پرەزيدەنتى ۆلاديمير پۋتين ۋكراينانىڭ بارلىق تۇرعىندارىنا رەسەي ازاماتتىعىن جەڭىلدەتىلگەن تارتىپپەن بەرۋ جونىندە جارلىق شىعارعان.
Abai.kz
