قاڭتار وقيعاسى كەزىندە 232 ادام قازا بولعان، تاعى التى ادام ازاپتاۋدان ولگەن. مۇنى 29 ماۋسىمدا قازاقستان باس پروكۋرورىنىڭ ورىنباسارى اسەت شىنداليەۆ ءماجىلىس دالىزىندە ايتتى. رەسمي مالىمەت بويىنشا، قاڭتار وقيعاسىندا ولگەندەردىڭ جالپى سانى — 238.

اسەت شىنداليەۆ ازاپتاۋعا بايلانىستى قۇقىق قورعاۋ ورگاندارىنىڭ توعىز قىزمەتكەرى ۇستالعانىن، ونىڭ سەگىزى - ۇقك، بىرەۋى - پوليتسيا قىزمەتكەرى ەكەنىن ايتتى. "رۇقسات ەتىلمەگەن ادىستەر قولدانىپ، تەرگەدى" دەگەن ايىپپەن 15 ادام قاماۋعا الىنعان.

بۇعان دەيىن قازاقستان بيلىگى قاڭتار وقيعاسى كەزىندە 230 ادام قازا بولعانىن، تاعى دا سەگىز ادام ازاپتاۋدان ولگەنىن، ول بويىنشا قىلمىستىق ءىس قوزعالعانىن مالىمدەگەن.

20 ماۋسىمدا باس پروكۋراتۋرا وكىلى ۇقك الماتى وبلىستىق دەپارتامەنتىنىڭ ەكى قىزمەتكەرىن تەرگەۋ اياقتالعانىن حابارلاعان. ولارعا "قاماۋداعى ادامدى ۇرىپ-سوعىپ ءولتىردى" دەگەن ايىپ تاعىلعان.

بۇعان دەيىن باس پروكۋراتۋرا قاڭتار وقيعاسى كەزىندە الماتى وبلىسىنداعى تەرگەۋ كەزىندە ىستىق ۇتىكپەن ازاپتالعاندار ءىسى بويىنشا 25 ادام زارداپ شەگۋشى رەتىندە تانىلعانىن حابارلاعان بولاتىن.

قاڭتار وقيعاسى كەزىندە جانە ودان كەيىن مىڭداعان ادام ۇستالىپ، قاماۋعا الىنعان. قاماۋداعى ازاپتاۋلارعا بايلانىستى شاعىم كۇرت كوبەيگەن سوڭ قازاقستان بيلىگى "رۇقسات ەتىلمەگەن ادىستەرمەن تەرگەۋگە" بايلانىستى 200-دەن استام قىلمىستىق ءىس قوزعالعانىن مالىمدەگەن.

Abai.kz