قازاقستانداعى NewTimes.kz جاڭالىقتار سايتى 14 ساۋىردە "روسكومنادزوردان" ۋكرايناداعى سوعىس تۋرالى ماتەريالدى الىپ تاستاۋ تۋرالى ەسكەرتۋ العان. بۇل تۋرالى حالىقارالىق Internews Network ۇكىمەتتىك ەمەس ۇيىمىنىڭ جوباسى - "جاڭا رەپورتەر" حابارلادى.

NewTimes.kz ديرەكتورى دميتري كيمنىڭ ايتۋىنشا، 14 ساۋىردە باسىلىم رەداكتسياسى رەسەيدەگى باق-تى رەتتەيتىن مەكەمەدەن ەسكەرتۋ العان. "روسكومنادزور" بۇل سايتتا "زاڭدى بۇزاتىن اقپارات جاريالانعانىن" ەسكەرتكەن.

"ناقتى سىلتەمە كورسەتىلگەن. وندا ەۋرووداقتىڭ جاڭا سانكتسيالارى تۋرالى مالىمەت بەرىلگەن. ءبىز ونى BBC News-ءتىڭ ورىس قىزمەتىنە سىلتەمە جاساي وتىرىپ جاريالاعانبىز. ەسكەرتۋدە "رەسەي فەدەراتسياسى قارۋلى كۇشتەرى وتكىزىپ جاتقان ارنايى اسكەري وپەراتسياسىنىڭ قوعامدىق ماڭىزى جونىندە جالعان اقپارات" جاريالانعانى ايتىلعان”، — دەيدى دميتري كيم.

سايت ديرەكتورىنىڭ ايتۋىنشا، "روسكومنادزور" ەسكەرتۋ جولدانعان ۋاقىتتان ءبىر تاۋلىك ىشىندە مالىمەتتى الىپ تاستاۋ كەرەكتىگىن جازعان. تالاپتى ورىنداۋدان "باس تارتقاندا نەمەسە ەشقانداي ارەكەت بولماعاندا" حوستينگ-پروۆايدەر سايتقا شەكتەۋ ەنگىزۋگە مىندەتتى، دەپ مالىمدەگەن رەسەيلىك مەكەمە.

"ەسكەرتۋ بىزگە قازاقستاندىق حوستينگ كومپانيا ارقىلى كەلدى. "روسكومنادزور" وعان ءوز ءۋاجىن جولداپ، "اقپارات رەسۋرسىنا تەز اراداعا حاباردار ەتۋدى" مىندەتتەگەن. "روسكومنادزور" حوستينگ كومپانيا ارقىلى ارەكەت ەتەتىنىن ەسكەرسەك، مۇنداي ەسكەرتۋ بىزدەن باسقالارعا دا جولدانعان دەگەن تۇجىرىم جاساۋعا بولادى", - دەيدى كيم.

NewTimes.kz ديرەكتورىنىڭ حابارلاۋىنشا، 15 ساۋىردە سايتتان "روسكومنادزورعا" ۇناماعان مالىمەت الىنعان. "كوپ ويلانۋعا ۋاقىت بولمادى. بىزگە ءبىر تاۋلىك قانا بەردى. رەسەيدەگى اۋديتوريانىڭ ءبىزدىڭ سايتقا كىرە الماي قالعانىن قالامادىق", - دەيدى كيم.

Abai.kz