19 ساۋىردە 214 ادامعا قاتىستى سوت ۇكىم وقىپ، 20 ادامعا تۇرمە جازاسى كەسىلگەنى حابارلانعان ەدى.

باس پروكۋراتۋرانىڭ 25 ساۋىردەگى اقپاراتىنا قاراعاندا، تەرگەۋ يزولياتورلارىندا "تارتىپسىزدىككە قاتىسقان، عيماراتتاردى ورتەپ، قارۋ-جاراق ۇرلاپ، مەملەكەتتىك نىساندار مەن كۇش قۇرىلىمدارى وكىلدەرىنە شابۋىل جاسادى" دەگەن كۇدىككە ىلىنگەن 585 ادام وتىر.

باس پروكۋراتۋرا وكىلى ەلدوس قيلىمجانوۆ بريفينگ كەزىندە اۋەجايعا جاسالعان شابۋىلعا توقتالا كەتتى.

"5 قاڭتاردا ن. ەسىمدى ازامات ادامدار توبىمەن الماتى قالاسى اۋەجايىنىڭ ۇشۋ-قونۋ جولاعىنىڭ جارىعىن ءوشىردى. ن. ءوزىنىڭ ارەكەتىمەن ستراتەگيالىق نىساننىڭ قىزمەتىن توقتاتتى، ناتيجەسىندە ۇشاقتار جولاۋشىلارمەن ۇشىپ كەتە المادى جانە توقتان اجىراتىلعان ۇشۋ-قونۋ جولاعىندا ون ساعات ارتىق تۇرۋعا ءماجبۇر بولدى. وسى ۋاقىتتا قارۋلى توپ الماتى اۋەجايىنىڭ عيماراتىندا قيراتۋلار مەن توناۋلاردى جاسادى" دەدى قيلىمجانوۆ.

پروكۋراتۋرا وكىلىنىڭ سوزىنە قاراعاندا، كۇدىكتىنىڭ ارەكەتى "تەرروريزم اكتىسى" بويىنشا تەرگەلىپ جاتىر.

وتكەن ايدىڭ سوڭىندا كولىكتەگى پوليتسيا دەپارتامەنتى، قاڭتار وقيعاسى كەزىندە الماتى اۋەجايى مەن پوليتسيا عيماراتىنا شابۋىل جاسادى دەگەن كۇدىككە ىلىنگەن ادامنىڭ ۇستالعانىن ايتقان. بۇعان دەيىن، "قىزمەت مىندەتىن ورىنداماعانى، اۋەجايدى كۇزەتسىز قالدىرىپ، اۋەجايدى باسىپ الۋعا جول بەرگەنى ءۇشىن الماتى قالاسى اۋەجايىنىڭ جەلىلىك پوليتسيا ءبولىمىنىڭ باستىعى ۇستالعانى" حابارلانعان ەدى.

دۇيسەنبىدەگى بريفينگتە ەلدوس قيلىمجانوۆ، شىمكەنت قالالىق پروكۋراتۋراسى "قيراتۋلار، مۇلىكتەردى جويۋ جانە كولىكتى ورتەدى" دەگەن سەگىز ادامنىڭ ءىسىن سوتقا جىبەرگەنىن ايتتى.

قىزىلوردا وبلىسىندا وسىنداي ايىپپەن جەتى ادامعا قاتىستى ءىس، كىنانى مويىنداۋ تۋرالى پروتسەسستىك كەلىسىم جاساۋ ارقىلى سوتقا جىبەرىلگەن.

باس پروكۋراتۋرانىڭ 25 ساۋىردەگى اقپاراتىنا سايكەس، قاڭتار وقيعاسىنا قاتىستى 5041 قىلمىستىق ءىس تەرگەلىپ جاتىر. ولاردىڭ ىشىندە "جاپپاي تارتىپسىزدىكتەر" بويىنشا 49, "تەرروريزم اكتىلەرىمەن" 45 ءىس.

Abai.kz