ماڭعىستاۋ وبلىسىنداعى «وزەن» كەن ورنىندا جاڭادان مۇناي كەن ورىندارى تابىلدى. بۇل تۋرالى «قازمۇنايگاز» ۇك» اق (قمگ) ءباسپاسوز قىزمەتى حابارلادى.

«ماڭعىستاۋ وبلىسىنداعى وزەن كەن ورنىنان جان-جاقتى بارلاۋ بارىسىندا جاڭا مۇناي شوعىرى تابىلدى. وسىنىڭ ناتيجەسىندە شىعارىلاتىن مۇناي قورىنىڭ ءوسىمى 39,9 ملن توننانى قۇرايدى. كومىرسۋتەك قورىنىڭ ءوسىمى «قازمۇنايگاز» ۇك اق ەكونوميكالىق كورسەتكىشتەرىنە ەلەۋلى اسەر ەتەدى»،- دەدى «قازمۇنايگاز» ۇك» اق (قمگ) ءباسپاسوز قىزمەتى.

قمگ ناقتىلاعانداي، 2017 جىلى ۇلتتىق كومپانيانىڭ، سونداي-اق «وزەنمۇنايگاز» اق، «قمگ ينجينيرينگ» جشس جانە اقتاۋداعى «قمگ ينجينيرينگ» فيليالىنىڭ گەولوگتار توبى وزەن كەن ورنىن بارلاۋدىڭ ەگجەي-تەگجەيلى باعدارلاماسىن جاساۋ ءۇشىن باستاما كوتەردى.

«وسى باعدارلاما شەڭبەرىندە 2017-2021 جىلدارى ىشىندە جوعارى كورسەتكىشتى سەيسموبارلاۋ 3D ءتۇسىرىلىمى (368 شارشى كم) جۇرگىزىلدى، بارلىق ۇڭعىما قورىنا قايتا تالداۋ جاسالدى (7500-دەن استام), گەولوگيالىق تۇجىرىمداماسى قايتا قارالدى جانە گەولوگيالىق 3D-ۇلگىسى قايتا قۇراستىرىلدى.

جۇرگىزىلگەن جۇمىستاردىڭ ناتيجەسىندە كەن ورنىنىڭ قۇرىلىمى ناقتىلاندى جانە جاڭا مۇناي شوعىرى تابىلدى. اتقارىلعان جۇمىستاردىڭ قورىتىندىسى بويىنشا وزەن كەن ورنىنىڭ مۇناي قورى 8%-عا ۇلعايدى، بۇل ءوز كەزەگىندە شىعارىلاتىن قوردىڭ 39,9 ملن تونناسىن قۇراپ وتىر»، - دەپ جازىلعان حابارلامادا.

2021 جىلدىڭ سوڭىندا كومىرسۋتەكتەردىڭ ناقتىلانعان كولەمىن قازاقستان رەسپۋبليكاسىنىڭ قورلار جونىندەگى مەملەكەتتىك كوميسسياسى بالانسىنا العان.

«قازىرگى ۋاقىتتا جاڭا قوردى ەسەپكە الۋ جانە ولاردى ءوندىرۋدى جوسپارلاۋ ماقساتىندا كەن ورىندى يگەرۋ جوباسىنا تۇزەتۋ ەنگىزىلۋدە»،- دەپ مالىمدەدى قمگ.

«وزەنمۇنايگاز» اق – «قازمۇنايگاز» ۇك اق-نىڭ 100 پايىز ەنشىلەس كومپانياسى. 2020 جىلى كاسىپورىنعا قازاقستانداعى مۇناي جانە گاز كوندەنساتىن ءوندىرۋ قۇرىلىمىندا 6%-ى تيەسىلى بولدى. كاسىپورىن ماڭعىستاۋ وبلىسىنداعى وزەن جانە قاراماندىباس كەن ورىندارىندا مۇناي جانە گاز كوندەنساتىن وندىرەدى.

وزەن كەن ورنى – قازاقستان رەسپۋبليكاسىندا عانا ەمەس، سونىمەن قاتار الەم بويىنشا بىرەگەي باستاپقى گەولوگيالىق قورى بار ەڭ ءىرى كەن ورىندارىنىڭ ءبىرى بولىپ تابىلادى. بۇل قۇرىلىمى كۇردەلى كوپقاباتتى كەن ورنى، ونىڭ مۇناي مەن گاز شوعىرلارى يۋرا-بور شوگىندىلەرىنىڭ تەرريگەندىك بولىنىسىندە ورنالاسقان.

Abai.kz