ۇكىمەت كابينەتى قايتا جاساقتالعاننان كەيىن، ەندىگى كەزەك اكىمدەرگە كەلدى. وبلىس جانە رەسپۋبليكالىق ماڭىزدى قالالاردىڭ اكىمدەرى انە-مىنە اۋىسۋى مۇمكىن. «كىم كەتىپ، كىم قالادى» دەگەن سۇراق قازىرگى تاڭدا كوپشىلىككە قىزىق. ساياساتتانۋشى دانيار اشىمباەۆ اكىمدەردىڭ اۋىس-تۇيىسىنە قاتىستى پىكىر ءبىلدىرءىپتى.

ساياساتتانۋشىنىڭ ويىنشا سوڭعى ەكى جىل ىشىندە اكىمدەردىڭ جۇمىسىنا شىنايى باعا بەرەتىن ءسات كەلدى. كارانتيندىك شەكتەۋلەر مەن كوروناۆيرۋسقا قارسى كۇرەس، ءتۇرلى ماسەلەلەردى دەر كەزىندە شەشە الۋ قابىلەتىنە قاراپ، اكىمدەردىڭ قىزمەتىن ءۇش دەپ باعالاۋعا بولادى.

«بۇگىنگى كۇنى كەز كەلگەن اكىمدى قىزمەتىنەن الىپ تاستاۋعا بولادى جانە ونىڭ نە ءۇشىن كەتكەنىن كوپشىلىك تە ىشتەي سەزەدى. ونىڭ ىشىندە ەكونوميكالىق كورسەتكىشتەر، جەمقورلىق، حالىقپەن بايلانىس پەن مەملەكەتتىك باسقارۋ جانە باسقا دا اقساپ جاتقان سالالار جەتەرلىك»، - دەيدى دانيار اشىمباەۆ.

ساياساتتانۋشى قىزمەتىنەن ءسوزسىز كەتۋگە ءتيىس اكىمدەردىڭ ىشىندە الماتى مەن نۇر-سۇلتان قالاسىنىڭ اكىمدەرى باقىتجان ساعىنتاەۆ پەن التاي كولگىنوۆتءى جانە اتىراۋ وبلىسىنىڭ اكىمى ماحامبەت دوسمۇحامبەتوۆتى جانە قىزىلوردا وبلىسىنىڭ اكىمى گۇلشارا ابدىحالىقوۆانى اتاعان. دانيار اشىمباەۆ حالىقتىڭ اكىم وڭداسىن ورازالينگە دە سۇراعى جينالىپ قالعانىن ايتادى. «ال جامبىل وبلىسىنىڭ اكىمى بەردىبەك ساپارباەۆ بولسا زەينەتتە، ول ءوزىنىڭ بارلىق ەنەرگياسىن تاۋىسقان جانە قىزمەتتەن كەتۋگە ءتيىس اكىمدەردىڭ ءبىرى»، - دەيدى.

ەلىمىزدە كادرلىق تاپشىلىق بار. كوپتەگەن اكىمدەر ۇلكەن تاجىريبەمەن كەلسە دە، كەيدە بەرىلگەن تاپسىرمانى ءساتتى ورىنداي الماي جاتادى. ول شەشىم قابىلداۋدا جانە باسقارۋدا انىق كورىنەدى.

بۇعان دەيىن اتىراۋ قالاسىنىڭ اكىمى قايرات ورازباەۆ قىزمەتىنەن كەتكەن ەدى. ول 30 جەلتوقساننان بەرى دەنساۋلىعىنا بايلانىستى دەمالىستا بولعان. ال 14 قاڭتاردا قىزمەتتەن كەتۋ تۋرالى ءوتىنىش بەرگەن. وبلىس اكىمدىگى قازىر ونىڭ مىندەتىن ۋاقىتشا قالا اكىمىنىڭ ورىنباسارى جۇمابەك قاراجانوۆ اتقاراتىنىن ايتقان ەدى.

«الماتى قالاسىنىڭ اكىمى قىزمەتىنەن كەتسىن» دەگەن پەتيتسيا دا جاريالاندى. پەتيتسياعا ونداعان مىڭ ادام قول قويعان ەدى. جالپى الماتى قالاسىنىڭ تۇرعىندارىنىڭ اراسىندا قالا اكىمىن قولدايتىندار سانى از. حالىق «قاڭتار وقيعاسىنا» دەيىن دە اكىمدى قاتاڭ سىنعا العان بولاتىن. ال قاسىرەتتى «قاڭتار وقياعاسىندا» قالا اكىمى حالىق الدىنا شىعىپ، سويلەمەدى.

الماتى وبلىسىنىڭ اكىمىنە قاتىستى دا جەلىدە نارازىلىق ارتتى. قانات بوزىمباەۆتىڭ حالىقپەن كەزدەسۋدە دورەكى مىنەز كورسەتىپ، بەيادەپ ءسوز ايتۋى ەل نارازىلىعىن تۋدىرۋدا.

Abai.kz