قر ءبىلىم جانە عىلىم ءمينيسترى اسحات ايماعامبەتوۆ پەداگوگتەردى جۇمىسقا قابىلداۋ قاعيدالارىنا قاتىستى وزگەرىستەر ەنگىزىلگەنىن حابارلادى.

مينيستر Facebook پاراقشاسىندا مۇعالىمدەردى جۇمىسقا قابىلداۋ ەندى جاڭا فورماتتا: كونكۋرس جانە ناقتى بەلگىلەنگەن كريتەريلەر ارقىلى جۇزەگە اسىرىلاتىنى تۋرالى جازدى.

ايماعامبەتوۆتىڭ سوزىنشە، بۇعان دەيىن ناقتى ەرەجەلەر بولماعان، ياعني مەكتەپ ديرەكتورى كىمدى جانە قانداي كورسەتكىشتەر بويىنشا جۇمىسقا قابىلداۋ كەرەكتىگى تۋرالى ءوزى شەشەتىن.

«بىرقاتار ايماقتا ساعاتتار سانىن دۇرىس بولمەي، ءۇش-ءتورت مۇعالىم ءبىر ستاۆكاعا قابىلدانعان جاعدايلار تىركەلدى. مۇنداي جاعدايلار قانداي سەبەپتەرگە بايلانىستى ورىن الاتىنىن بولجاۋ قيىن ەمەس. بۇدان بىلاي ءبىلىم بەرۋ ۇيىمدارى بارلىق بوس نەمەسە ۋاقىتشا بوس لاۋازىمدارعا كونكۋرس وتكىزەتىن بولادى. بۇل شاعىن جيناقتى مەكتەپتەرگە قاتىستى ەمەس»، – دەپ جازدى ول.

بايقاۋعا بىلىكتىلىك سيپاتتامالارىنا سايكەس كەلەتىن مۇعالىمدەر قاتىسادى.
جۇمىسقا قابىلداۋ ءتارتىبى مىناداي:

– جۇمىسقا ورنالاسۋ كەزىندە ۇمىتكەر كونكۋرسقا قاتىسۋ تۋرالى ءوتىنىش بەرەدى. وتىنىش بەرۋشى ءوزىنىڭ باعالاۋ پاراعىن قوسا ۇسىنادى. وندا بارلىق جەتىستىگى، ناتيجەلەرى، ەڭبەك ءوتىلى، اكىمشىلىك نەمەسە ادىستەمەلىك قىزمەت تاجىريبەسى، كۋرستىق دايىندىق جانە باسقا دا اقپارات كورسەتىلەدى.

– اربىر باعىت بويىنشا كانديدات بەلگىلەنگەن كريتەريلەر ارقىلى باعالاۋ شكالاسىنا سايكەس ءوز بالدارىن دەربەس قويادى.

– كونكۋرستىق كوميسسيا ءوتىنىش بەرۋشىنىڭ ءوزى قويعان بالداردىڭ، ولاردى راستايتىن قۇجاتتاردىڭ سايكەستىگىن تەكسەرىپ، قورىتىندى ۇپاي شىعارادى. ناتيجەسىندە بوس ورىنعا ەڭ كوپ بالل جيناعان ۇمىتكەر قابىلدانادى. سۋبەكتيۆيزم دەڭگەيى بارىنشا تومەندەيدى.

Abai.kz