انا ءتىلىمىز جايلى ءسوز قوزعالعاندا قانداي دا يگى ىسكە، ونەگەلى دۇنيەگە ەلەڭ ەتە قالارىمز ءسوزسىز. بۇل، اسىرەسە تۇرعىندارى ءالى دە بولسا قازاق ءتىلىن تولىق يگەرە الماي جۇرگەن، ورىستارى جاقىن ارادا جازىلمايتىن سەپاراتيزم اۋرۋمەن  اۋىرعان قوستاناي سەكىلدى تەرىستىك ولكەدە ورنى وتە بولەك قۇبىلىس. 

بوتەن حالىق، نيەتى بۇزىقتاۋ جۇرتتار تىم ەندەپ كىرىپ كەتكەن ولكەدە انا ءتىلىمىزدى العا سۇيرەۋدىڭ جىلت ەتكەن كورىنىسى «ە، بارەكەلدى» دەپ، شاتتانۋعا اكەلىپ سوعاتىندىعىن تاعى دا جاسىرا المايمىز.

مىنە، وسىناۋ جان جادىراتار كورىنىستى وسىنداعى گوركي اتىنداعى مەكتەپ-گيمنازيادان بايقاپ، ەڭسەمىز ءبىر كوتەرىلىپ قالدى. وسىندا ءوزىنىڭ ۇلتى ۋكراين بولسا دا، قازاق ءتىلىن قايتسەم جاڭا بەلەسكە كوتەرەمىن دەپ بار جان-تانىمەن جاسوسپىرىمدەرگە ساباق بەرىپ جۇرگەن جانى جايساڭ ءبىر جان بار. ول – دميتري روماششەنكو دەگەن مىڭ بولعىر ازامات. ديمەكەڭ مۇقاعالي مەن احاڭنىڭ ەڭبەكتەرىن تۇپنۇسقادان وقىپ ءلاززات الادى. ال اباي حاكىمنىڭ شىعارمالارى بۇل ءۇشىن ومىرقازىق ىسپەتتى.

ءبىر عاجابى، قاسيەتتى انا ءتىلىمىزدى ول جۇرەك قالاۋىمەن تاڭداپ العان. ويتكەنى ول  قوستانايدىڭ رەسەيمەن شەكارالاس، قالىڭ ورىس قونىستانعان ەلدى-مەكەندە ورىس مەكتەبىندە وقىعان. سويتە تۇرا، انا ءتىلىمىزدى قۇلاي ءسۇيىپ، بار ىنتا-ىقىلاسىمەن تەرەڭ ۇيرەنۋگە تىرىسقان. تالاي جىلعى ەڭبەك بوسقا كەتكەن جوق. قازىر وسى وبلىس ورتالىعىنداعى ەڭ ءبىر وزىق مەكتەپتەردىڭ قاتارىنداعى گيمنازيادا بالالارعا قازاق تىلىنەن ساباق بەرەدى.

- مەن ءۇشىن قازاق ءتىلى – مەكتەپتەگى ەڭ قىزىقتى پاندەردىڭ ءبىرى. مۇعالىم بولاتىندىعىمدى ەرتە بىلگەنمىن. ءدال وسى قازاق ءتىلىنىڭ مۇعالىمى بولاتىندىعىما اسا سەنىمدى ەدىم.  مەن ءۇشىن ۇستازدىق ەتۋ وڭاي جول بولعان ەمەس. الايدا بۇل مەنىڭ ەڭ سۇيىكتى ءىسىم، ماڭگىلىك تاڭداۋىم، - دەيدى ول ءومىر جولدارىن ويعا ورالتىپ.

- ول وتە اقىلدى ادام، قايىرىمدى دا ءادىل. ساباق بەرگەندە قالجىڭىن دا ارالاستىرىپ قويادى. الايدا، ءوز ىسىنە اسا ۇقىپتى قارايدى. ۇيگە بەرگەن تاپسىرمانى ورىنداماعاندارعا جۇمساقتىق جاسامايدى، - دەيدى سەگىزىنشى سىنىپ وقۋشىسى الىبەك جاقسىلىقوۆ.

جالپى دميتري مەكتەپتەگى جالعىز ەر ادام. ۇجىم تۇگەلىمەن نازىك جانداردان قۇرالعان.

- بوتەن دە مۇعالىمدەر سەكىلدى ونىڭ دا 25 ساعاتى بار. بۇل - قازىرگى تاڭدا ەڭ جوعارى كورسەتكىش. ساباعىن تەرەڭ مەڭگەرگەن، -دەپ باعا بەرەدى وسى گيمنازيا ديرەكتورىنىڭ ورىنباسارى ورىنكۇل باياحمەتوۆا.

الايدا، دميتري ءوزىن ەلدەن ەرەكشە بىردەڭە تىندىرىپ ءجۇرمىن دەپ ەسەپتەمەيدى. وزىنە دەگەن ەرەكشە كوزقاراستى دا ارتىق سانايدى. ونىڭ تۇجىرىمىنشا، قازاق ءتىلىن ءبىلۋ - ءاربىر قازاقستاندىقتىڭ پارىزى بولىپ تابىلۋى ءتيىس. بۇل ازاماتتىڭ ءدال وسى ءسوزى ءۇشىن دە ايرىقشا قۇرمەتتەۋگە بولار. وزگەلەرگە ونەگە ەتىپ ۇسىنساق تا، ارتىق بولماس تا.

- شىركىن-اي، - دەيسىڭ وسىندايدا. مىنا ۋكراين ازاماتى وسىنداي اسىل ارمانى ەلىمىزدى مەكەندەيتىن وزگە ۇلتتاردىڭ ساناسىنا قاشان قوناقتار ەكەن؟

جايبەرگەن بولاتوۆ

Abai.kz