قازاقستان ۇكىمەتى "قازترانسگازعا" ۇلتتىق كومپانيا مارتەبەسىن بەردى. بۇل تۋرالى "قازترانسگاز" اق ۇك ءباسپاسوز قىزمەتى حابارلادى.

"قازاقستان ۇكىمەتىنىڭ 2021 جىلعى 30 قاراشاداعى № 852 قاۋلىسى بويىنشا "قازترانسگاز" اق-قا ۇلتتىق كومپانيا مارتەبەسى بەرىلدى. ءتيىستى تولىقتىرۋ "ۇلتتىق باسقارۋشى حولدينگتەردىڭ، ۇلتتىق حولدينگتەردىڭ، ۇلتتىق كومپانيالاردىڭ تىزبەسىن بەكىتۋ تۋرالى" قر ۇكىمەتىنىڭ قاۋلىسىنا ەنگىزىلدى. سونداي-اق، قر ۇكىمەتىنىڭ №853 قاۋلىسىمەن "قازترانسگاز" اكتسيونەرلىك قوعامى "قازترانسگاز" ۇلتتىق كومپانياسى" اكتسيونەرلىك قوعامى بولىپ قايتا اتالدى", - دەلىنگەن حابارلامادا.

"جەر قويناۋى جانە جەر قويناۋىن پايدالانۋ تۋرالى" قر كودەكسىنىڭ 278-بابى 8-تارماعىنا سايكەس قر ۇكىمەتى جەر قويناۋىن پايدالانۋ سالاسىنداعى ۇلتتىق كومپانيالار قىزمەتىنىڭ اراجىگىن اجىراتۋدى بەكىتتى. وسى قۇجاتقا سايكەس، "قازترانسگازعا" گاز جانە گاز كوندەنساتتى كەن ورىندارىندا بارلاۋ جانە ءوندىرۋ بويىنشا باسىمدىق قۇقىق بەرىلدى.

Abai.kz