جەتى التىن الىپ جەتى اسقار بيىككە جەتتىك اعايىن! قازاقتىڭ ۇعىمىندا جەتى سانى قانداي قاسيەتتى بولسا، جەتى التىننىڭ دا الار ورنى ايرىقشا! لوندون وليمپياداسى قازاققا وڭىنان بولدى. وندىقتىڭ كۇلتەبەسىنەن كورىنبەسەكتە، جيىرمالىقتىڭ جوعارعى ساپىنا ىلىكتىك. 12-ءشى ورىن. بۇلاي بولار دەپ كىم ويلاپتى.وليمپيادا شىمىلدىعى تۇرىلمەي ءتۇرىپ، «قازاق جەتى التىن الادى» دەگەن ايدالاداعى امەريكالىق باسىلىمنىڭ اۋزىنا اللا سالعان شىعار... ويىمىزداعىنى ايتساق، ءدال وسى التىنعا كەلگەندە الاشتىڭ بالاسى نەسىبەسىز قالا دەپ قاۋىپتەنگەنبىز. قاۋىپتىڭ قارا بۇلتى سەيىلدى. ۇلان-عايىر اتىراپتاعى الاڭ جۇرتتىڭ اتويلاتىپ، توي تويلاتقان سەبەبى سايگۇلىك ۇلى - سەرىك ساپيەۆتىڭ جەڭىسى. بۇل جەڭىس - قازاق دەگەن ەر كەۋدە، ەركىن ەلدىڭ تولايىم تابىسى!

جەتى التىن الىپ جەتى اسقار بيىككە جەتتىك اعايىن! قازاقتىڭ ۇعىمىندا جەتى سانى قانداي قاسيەتتى بولسا، جەتى التىننىڭ دا الار ورنى ايرىقشا! لوندون وليمپياداسى قازاققا وڭىنان بولدى. وندىقتىڭ كۇلتەبەسىنەن كورىنبەسەكتە، جيىرمالىقتىڭ جوعارعى ساپىنا ىلىكتىك. 12-ءشى ورىن. بۇلاي بولار دەپ كىم ويلاپتى.وليمپيادا شىمىلدىعى تۇرىلمەي ءتۇرىپ، «قازاق جەتى التىن الادى» دەگەن ايدالاداعى امەريكالىق باسىلىمنىڭ اۋزىنا اللا سالعان شىعار... ويىمىزداعىنى ايتساق، ءدال وسى التىنعا كەلگەندە الاشتىڭ بالاسى نەسىبەسىز قالا دەپ قاۋىپتەنگەنبىز. قاۋىپتىڭ قارا بۇلتى سەيىلدى. ۇلان-عايىر اتىراپتاعى الاڭ جۇرتتىڭ اتويلاتىپ، توي تويلاتقان سەبەبى سايگۇلىك ۇلى - سەرىك ساپيەۆتىڭ جەڭىسى. بۇل جەڭىس - قازاق دەگەن ەر كەۋدە، ەركىن ەلدىڭ تولايىم تابىسى!

ەگەر، سەرىكتىڭ بۇگىنگە دەيىنگى سپورتتىق عۇمىرىنا كوز جۇگىرتەر بولساق، ايگىلى بوكسشىنىڭ اۋىردىڭ استىمەن، جەڭىلدىڭ ۇستىمەن كۇن كورگەن كەزى جوق ەكەن. ەكى دۇركىن الەم جانە ازيا چەمپيونى ءۇشىن تۇماندى البيونداعى وسى جولعى الامان ونىڭ وليمپيادا چەمپيون اتانۋداعى سوڭعى مۇمكىندىگى ەدى. 69 كەلىدە سىنعا تۇسكەن سەرىك تىرناقالدى كەزدەسۋىندە جاپون ياسۋحيرو سۋزۋكيدى 25:11 ەسەبىمەن جەڭدى، ارتىنشا ۆەنەسۋەلالىق گابريەل پەرەزانى 20:9 ەسەبىمەن ويسىراتتى، جارتىلاي فينالدا رەسەيلىك اندرەي زامكوۆويدى 18:12 ەسەبىمەن تازا ۇتتى. فينال... اقتىق ايقاس. سەرىكتەن ءالى الاوكپە اعىلشىن فرەددي ەۆانس ساباق الدى. «ساباق الدى» دەۋىمىز بەكەر ەمەس، ساپيەۆ ەۆانستى بىقپىر تيگەندەي سابادى. ءۇش راۋند بويىنا بۇعىپ بوكستاسقان اعىلشىن ءوز جانكۇيەرلەرىنىڭ الدىندا سەرىكتىڭ جۇدىرىق سىلتەسىنەن سەسكەنەتىنىن، جەرلەسىمىزدىڭ اتاق-ابىرويىنان قايمىعاتىنىن ءار قيمىلىنان-اق بايقاتتى. ءۇش راۋند بويىنا ورتەكەدەي ويقاستاعان سەرىك 17:9 ەسەبىمەن جەڭىسكە جەتتى. وليمپ بيىگى باعىندى... بەسىكتەگى بالادان اتا ساقالى ومىراۋىنا تۇسكەن قارياعا دەيىن ءبىر-بىرىنەن ءسۇيىنشى سۇراسىپ، بوركىن اسپانعا اتتى. جەتىنشى التىن، جەتى سانى. قازاق ءۇشىن كيەلى. تاعى دا لوندون تورىندە قازاقتىڭ ءانۇرانى شىرقالىپ، كوك تۋى قالىقتادى. كەرەمەت كورىنىس. ۇمىتىلمايدى. جەكپە-جەك اياقتالا سالا، سەرىككە تەڭ سۇرەڭدەرگە عانا تابىس ەتىلەتىن - باركەر كۋبوگى بەرىلدى. ال، ءبىز اتالمىش كۋبوكتى يەلەنۋ جاعىنان كۋبانىڭ ءوزىن ارتقا تاستاپ كەتتىك. ايتا كەتەلىك، ساپيەۆتەن بۇرىن مۇنداي اتاققا ۆاسيلي جيروۆ پەن باقتيار ارتاەۆ قول جەتكىزگەن بولاتىن.
تەك سەرىك ەمەس ادىلبەك پەن بالۋان اقجۇرەكتىڭ دە التىن الۋى ابدەن مۇمكىن ەدى. امال نەشىك. 81 كەلىدە سىنعان تۇسكەن ادىلبەك نيازىمبەتوۆ اقتىق سىندا رەسەيلىك ەگور مەحونتسوۆقا جول بەردى. ءۇش كەزەڭنىڭ جالپى كورسەتكىشى بويىنشا 15:15 ەسەبىمەن تەڭ تۇسكەن سپورتشىلارعا تورەلىك ەتكەن ادىلقازىلار باس جۇلدەگە رەسەيلىك لايىق دەپ تاپتى. ايتار داۋىمىز جوق. كۇمىس قولدا ەدى. الايدا، ادىلبەك قاشا جۇدىرىقتاستى. نەگىزىنەن قورعانىستا بولدى. قازاقتىڭ ۇتىلىپ، ورىستىڭ ۇتۋىنداعى باستى سەبەپ تە سول.
وسى وليمپيادادا ءبىز مەدالدار كۇتكەن گرەك-ريم كۇرەسىنىڭ ورنىنا ءۇمىتىمىزدى، ەركىن كۇرەس شەبەرلەرى اقتادى. ەشكىم كۇتپەگەن جەردەن اقجۇرەك تاڭاتاروۆ لوندون وليمپياداسىنىڭ قولا جۇلدەگەرى اتاندى. مەدال ءۇشىن تالاستا جەرلەسىمىز تۇرىك پالۋانى راماحان ءساحيننىڭ جاۋىرىنىن جەر يىسكەتتى.
ال، جارتى ايعا سوزىلعان وليمپيادا تۋرالى سوزىمىزگە سوڭعى نۇكتە قوياتىن كەز الدا. باستىسى، ۋادە ورىندالدى. «ارىق ايتتىپ، سەمىز شىقتىق». ەندى وسى قارقىندى جوعالتپاي ريو دە جانەيروعا دايىندىقتى باستاعان ءجون.

«دالا مەن قالا» گازەتى