الەۋمەتتىك جەلىلەردە ومىرزاق شوكەەۆتىڭ جالاقىسى كەڭىرەك تالقىلانىپ جاتىر. Facebook قولدانۋشىسى ءارى جەرگىلىكتى جۋرناليست بالتابەك تۇيەتاەۆ اكىم ايىنا 1 ميلليون 900 مىڭ تەڭگە الاتىنى تۋرالى جازدى.

"قاراپايىم حالىق بۇل جالاقىنى ەستىپ "شوك" بولدى-اۋ دەيمىن. ويتكەنى مۇنداي قوماقتى جالاقى الۋ كوپ ادامعا قول جەتپەس ارمان عوي. ساياباق جۇمىسشىسى مەن اۋلا سىپىرۋشى 45-55 مىڭ تەڭگە توڭىرەگىندە جالاقى الاتىنىن ءوز اۋزىنان كۇندە ەستۋگە بولادى. جالاقىسىز ءومىر ءسۇرىپ، ءوزىن-ءوزى سۇيرەپ، ءبىر ءۇزىم نانعا ارەڭ تيىن — تەبەن تاۋىپ جۇرگەندەر دە بار...", - دەلىنگەن جازبادا.

جەلى قولدانۋشىلارىنىڭ ءبىرى ومىرزاق شوكەەۆ جالاقىسىنا ساي جۇمىس اتقارىپ وتىر دەسە، ەندى ءبىرى ونى سىننىڭ استىنا الدى.

تۇركىستان وبلىسى اكىمىنىڭ ءباسپاسوز حاتشىسى ميرا سۇلەيمەنوۆا ايماق باسشىسىنىڭ جالاقىسى 1 ميلليون 900 مىڭ تەڭگە ەكەنىن راستادى.

بىلتىر ومىرزاق شوكەەۆتىڭ ايلىعى 981 598 تەڭگە بولاتىن. بۇل تۋرالى ەلىمىزدىڭ بىرقاتار باق بەتتەرىندە جاريالاندى.

ايتا كەتەيىك، ەرتەڭ، 19 قاراشادا تۇركىستان وبلىسىنىڭ اكىمى ورتالىق كوممۋنيكاتسيالار قىزمەتىندە مەملەكەت باسشىسىنىڭ جولداۋى اياسىندا ءوڭىردىڭ دامۋى اياسىنداعى جۇمىستارى تۋرالى بريفينگ بەرەدى.

Abai.kz