بۇل تۋرالى ۇلتتىق كەڭەستىڭ مۇشەسى، قوعام بەلسەندىسى ۋايس ەرسايىنۇلى ۇلتتىق قوعامدىق سەنىم كەڭەسىنىڭ التىنشى وتىرىسىندا ايتتى.

- ءوزىڭىزدىڭ ماڭعىستاۋعا ساپارىڭىزدا وڭىرگە ەرەكشە نازار اۋدارىپ، ارنايى تاپسىرما بەرىپ، ءوڭىردى دامىتۋدىڭ كەشەندى جوسپارىن ازىرلەتكەنىڭىزگە ۇلكەن العىسىمدى ايتامىن. دەگەنمەن، الداعى ون جىلدا حالىقتىڭ دەموگرافيالىق ءوسىم ەسەبىنەن كۇرت كوبەيۋ مۇمكىندىگى ءوڭىر بولاشاعى جايلى الاڭداتپاي قويماي تۇر! جوبامەن 2030-2035 جىلداردان باستاپ ماڭعىستاۋداعى مۇناي ءوندىرۋ كولەمى كۇرت ازايا باستايدى، - دەدى ول.

بۇل  كاسىبي تەرمينولوگياداعى «انىقتالعان»، «الىناتىن» -  دەپ بەكىتىلگەن مۇنايدى ءوندىرۋدىڭ تابيعي سارقىلۋ  پروتسەسسى باستالادى دەگەن ءسوز.

- بۇل تۇجىرىم نەمەسە پروبلەما ەنەرگەتيكا مينيسترلىگىنىڭ رەسمي ەسەپتەرىنىڭ نەگىزىندە جانە ءوزىڭىزدىڭ ۇندەۋىڭىزگە بايلانىستى كوتەرىلىپ  وتىر. ءار وتباسىندا 4-5 ادام بار دەپ الساق، مۇناي وندىرىسىنەن ماڭعىستاۋلىقتاردىڭ 200-250 مىڭداي ادامى بۇگىنگى كۇندەرى كۇنەلتىس كوزىن تاۋىپ وتىر. ەرتەڭ، نەمەسە جاقىن بولاشاقتا مۇناي ءوندىرۋ كولەمى ازايا باستاعان شاقتا، ءسوزسىز حالىقتىڭ نەگىزگى بولىگىنە جۇمىسسىز قالۋ قاۋپى تونەدى، - دەدى ۋايس ەرسايىنۇلى.

ءوڭىر حالقىنىڭ تابيعي ءوسۋ مۇمكىندىگى، وسىندا بولاشاق قونىس اۋدارىپ كوشىپ كەلەتىندەردىڭ سانى كەيبىر جەرگىلىكتى باسقا پروفيلدەگى مەكەمەلەردىڭ  ەكونوميكالىق نەمەسە باسقا دا جاعدايلاردان جابىلىپ قالۋ قاۋپى،  جۇمىسسىزدىقتىڭ كوبەيۋ مۇمكىندىگى ەسەپكە الىنسا، الداعى 5-10 جىلدا  جاعدايدىڭ قيىنداپ باستايتىنى قازىردىڭ وزىندە بەلگىلى بولىپ وتىر!

- سول سەبەپتى وسى ماسەلەنى نازارىڭىزعا ۇسىنا وتىرىپ، ماسەلەنى شەشۋدىڭ جولى رەتىندە كەزەڭ-كەزەڭمەن سولتۇستىككە قونىس اۋدارۋدىڭ بىرىڭعاي كەشەندى باعدارلاماسىن ازىرلەۋدى ۇسىنامىن. سولتۇستىككە قونىس اۋدارۋ ماڭعىستاۋلىقتار ءۇشىن باسىم باعىتقا اينالۋى قاجەت. ول ءۇشىن حالىقتى كەزەڭ-كەزەڭمەن كوشىرۋدى جۇمىلدىرۋ قولعا الىنۋ كەرەك. ەڭ اۋەلگى كەزەكتە جۇمىسسىزدار مەن جاستار، ودان كەيىن بولاشاقتا جۇمىسسىز قالۋ قاۋپى بار ازاماتتار ەڭ سوڭىنان جالپى جۇرتشىلىق سولتۇستىككە كوشۋگە ىنتالانۋعا ءتيىس.«وزەنمۇنايگاز» كەنورنىن تولىقتاي ۆاحتالىق ادىسكە اۋىستىرۋ كوشى-قونعا بايلانىستى كوپ ماسەلەنى شەشەتىنى انىق.  بۇل ورايدا ۇكىمەت ۇلكەن ۇگىت-ناسيحات جۇمىستارىن قوسا جۇرگىزۋى كەرەك دەپ ەسەپتەيمىن، - دەدى ول.

Abai.kz