قازاقستان ءماجىلىسىنىڭ دەپۋتاتتارى قىرعىزستان مەن تاجىكستانعا اسكەري كومەك كورسەتۋ تۋرالى بىرنەشە كەلىسىمدى راتيفيكاتسيالادى. قر قورعانىس ءمينيسترىنىڭ ورىنباسارى رۋسلان شپەكباەۆ ءماجىلىستىڭ جالپى وتىرىسىندا ءمالىم ەتكەندەي، سادىر جاپاروۆتىڭ قازاقستانعا مەملەكەتتىك ساپارى اياسىندا 2021 جىلعى 2 ناۋرىزدا قازاقستان مەن قىرعىزستان ۇكىمەتتەرى اراسىندا وتەۋسىز اسكەري-تەحنيكالىق كومەك كورسەتۋ تۋرالى كەلىسىمگە قول قويىلدى.

«كەلىسىم قىرعىزستان تاراپىنا اسكەري مۇلىكتى، وق-دارىلەر مەن ارنايى تەحنيكانى ءبىر رەتتىك نەگىزدە بەرۋدى قاراستىرادى. اسكەري تەحنيكانى قىرعىزستاننىڭ قوي-تاش اۋىلىنا اۆتوكولىكپەن جەتكىزۋ شىعىندارىن قازاقستاندىق تاراپ قامتاماسىز ەتەدى جانە ءوز موينىنا الادى. قىرعىز تاراپى العان اسكەري مۇلىكتى نەمەسە ونى پايدالانۋ قۇقىعىن ءۇشىنشى تاراپقا بەرمەيدى», - دەدى شپەكباەۆ.

قىرعىزستانعا اسكەري تەحنيكانىڭ بەرىلۋى قازاقستاننىڭ جاۋىنگەرلىك ازىرلىگى مەن قورعانىس قابىلەتىنىڭ جاي-كۇيىنە اسەر ەتپەيدى.

2021 جىلدىڭ 17 ساۋىرىندە قازاقستان مەن تاجىكستان ۇكىمەتتەرى اراسىندا وتەۋسىز اسكەري-تەحنيكالىق كومەك كورسەتۋ تۋرالى كەلىسىمگە قول قويىلدى. وندا اسكەري مۇلىكتى، اتاپ ايتقاندا، وق-دارىلەردى تاجىك تاراپىنا ءبىر رەتتىك نەگىزدە بەرۋ قاراستىرىلعان.

«قازاقستاندىق تاراپ اسكەري تەحنيكانى جامبىل وبلىسىنىڭ وتار ستانساسىنان دۋشانبە قالاسىنا تەمىرجول كولىگىمەن جەتكىزۋ شىعىندارىن قامتاماسىز ەتەدى جانە ءوز موينىنا الادى. تاجىك تاراپى الىنعان اسكەري مۇلىكتى نەمەسە ونى پايدالانۋ قۇقىعىن ءۇشىنشى تاراپقا بەرمەيدى», - دەدى شپەكباەۆ.

Abai.kz