- كىم نە دەسە دە، ءبىز قابىلداعان "بەيبىت شەرۋلەر تۋرالى زاڭ" دەموكراتياعا ماڭىزدى قادام. بەيبىت شەرۋگە، دەمونستراتسياعا ەشكىم قارسى ەمەس. رەسمي رۇقسات الۋدىڭ دا قاجەتى جوق. جينالۋ ءۇشىن تەك ەسكەرتۋ قاجەت. بىراق كەي ازاماتتار وسى تالاپتى دا ورىندامايدى. مەن مۇنداي زاڭعا قايشى ارەكەتكە بارعاندارعا قۇقىقتىق باعا بەرىلەتىنىن ەسكەرتەمىن. باس پروكۋراتۋرانىڭ مىندەتى، ازاماتتارعا زاڭدى ءتۇسىندىرۋ جانە قۇزىرلى ورگاندار زاڭعا سايكەس، قوعام قاۋىپسىزدىگىن قامتاماسىز ەتۋى كەرەك، – دەدى توقاەۆ.

پرەزيدەنت الەۋمەتتىك جاعدايدى كوتەرۋدى تالاپ ەتىپ، شەرۋگە ءجيى شىعاتىن كوپ بالالى انالاردى ء"تارتىپ بۇزادى" دەدى. ول ايەلدەردىڭ شاراسىن "زاڭسىز" دەپ سانايدى.

- قوعامدا اناعا دەگەن قۇرمەتتى جوعارى قويۋىمىز كەرەك. سونىمەن قاتار انالار دا قوعام الدىندا ءوز جاۋاپكەرشىلىگىن تەرەڭ سەزىنۋى كەرەك. كەيبىر كوپ بالالى انالار زاڭسىز ەرەۋىلگە شىعىپ، ايقاي شۋ شىعارىپ، قوعامدىق ءتارتىپتى بۇزىپ جاتىر، – دەدى توقاەۆ ونلاين جيىندا.

توقاەۆتىڭ "زاڭسىز شەرۋلەر جايلى ەسكەرتۋى" ەلدە 23 قازانعا بەلگىلەنگەن قۋعىنداعى بۇرىنعى بانكير "مۇحتار ءابليازوۆتىڭ ميتينگىسى" قارساڭىندا ايتىلىپ وتىر.

قازاقستاندا بىلتىر "بەيبىت جيىن وتكىزۋ تۋرالى" زاڭ قابىلدانعان. الايدا قۇقىق قورعاۋشىلار مەن ساراپشىلاردىڭ پىكىرىنشە، جاڭا زاڭ قابىلدانسا دا ءىس جۇزىندە ەلەۋلى وزگەرىس بولعان جوق. ەلدە ازاماتتاردىڭ كونستيتۋتسيالىق بەيبىت جيىن وتكىزۋ قۇقىعى بۇرىنعىداي بۇزىلىپ جاتىر. جەرگىلىكتى بيلىكتە ميتينگ وتكىزۋ تۋرالى ءوتىنىشتى قاناعاتتاندىرماۋعا مۇمكىندىك بەرەتىن بارلىق تەتىكتەر ساقتالعان. اكىمدىكتىڭ رۇقساتىنسىز نارازىلىق وتكىزگەن ازاماتتار اكىمشىلىك قاماۋعا الىنىپ، ءىرى ايىپپۇلدار سالىنادى.

قازاقستاندا 2019 جىلعى قايعىلى وقيعادان كەيىن كوپ بالالى ايەلدەر الەۋمەتتىك جاعدايدى جاقسارتۋدى، جاردەماقىنى ءوسىرۋدى، باسپانامەن قامتاماسىز ەتۋدى تالاپ ەتىپ، ءجيى نارازىلىق وتكىزىپ كەلەدى. ساراپشىلار قازاقستاندا كوپ بالالى وتباسىلارعا، مۇگەدەكتەرگە، مۇگەدەك بالاسى بار جانۇيالارعا بەرىلەتىن جاردەماقىنىڭ ماردىمسىز ەكەنىن; ەلدە ينفلياتسيا جوعارىلاپ، ازىق-تۇلىك باعاسى قىمباتتاپ، باسپانا الۋ قيىنداپ كەتكەنىن ءجيى ايتادى.

توقاەۆ 2020 جىلعى جولداۋىندا "حالىق اراسىندا ماسىلدىق كوڭىل-كۇي ارتىپ بارا جاتقانىن" ايتقان. ول بيىلعى جولداۋىندا دا "ماسىلدىقتى" ايتقان. ونىڭ ءسوزىن ساراپشىلار تۇرلىشە باعالادى.

Abai.kz