بۇل تۋرالى ەلوردادا ءوتىپ جاتقان الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ ءحىح وتىرىسىندا بۇۇ وركەنيەتتەر اليانسىنىڭ جوعارى وكىلى ميگەل انحەل موراتينوس حابارلادى. 

ول سوزىندە قازاقستان ءوز ىشىندە عانا ەمەس، حالىقارالىق دەڭگەيدە دە دىنارالىق جانە كونفەسسياارالىق ديالوگ ورناتۋعا باسا ءمان بەرىپ، وسى باعىتتا ماڭىزدى جۇمىس اتقارىپ جاتقانىن العا تارتتى.

- بۇل بىرەگەي الاڭ ساياساتكەرلەر، ءدىن ليدەرلەرى، حالىقارالىق جانە وڭىرلىك ۇيىمدار جانە بارلىق مۇددەلى تاراپتارعا الەمدەگى دىنارالىق ديالوگ پەن تۇراقتى دامۋعا قاتىستى پروبلەمالاردى بىرلەسىپ تالقىلاۋعا جاقسى مۇمكىندىك بەرەدى. سوندىقتان بۇۇ وركەنيەتتەر اليانسى الداعى VII سەزد جۇمىسىنا بەلسەندى قاتىسادى، – دەدى ميگەل انحەل موراتينوس.

سونداي-اق بۇۇ وركەنيەتتەر اليانسىنىڭ جوعارى وكىلى تۇراقتى جانە قاۋىپسىز الەم قۇرۋ ءۇشىن ءدىننىڭ قوعامداعى ءرولىن جانە حالىقارالىق دەڭگەيدەگى ءوزارا ءىس-قيمىلدى تالقىلاۋ تۇرعىسىنان سەزدىڭ ماڭىزى زور دەپ وتىر.

ەسكە سالا كەتەيىك، ەلوردادا الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ ءحىح وتىرىسى ءوتىپ جاتىر. سەزد حاتشىلىعىنىڭ وتىرىسىنا 20 ەلدەن كەلگەن الەمدىك دىندەر مەن كونفەسسيالاردىڭ جانە حالىقارالىق ۇيىمداردىڭ وكىلدەرى قاتىسىپ جاتىر.

Abai.kz