الماتى حالىقارالىق اۋەجايىن كەڭەيتۋ جانە جاڭعىرتۋ ينۆەستيتسيالىق باعدارلاماسىنىڭ جالپى قۇنى 780 ميلليون دوللار بولماق. وعان قاجەتتى قارجىنى حالىقارالىق نەسيە بەرۋشىلەر جانە ينۆەستورلار بولەدى. 

ەۋرازيالىق دامۋ بانكى ءباسپاسوز قىزمەتىنىڭ مالىمەتىنشە كرەديتورلارلار الماتى حالىقارالىق اۋەجايىن كەڭەيتۋ مەن جاڭعىرتۋدى قارجىلاندىرۋ شارتتارى تۋرالى كەلىسىمگە قول قويىپ ۇلگەرگەن. كرەديتورلار تىزىمىنە ەۋرازيالىق دامۋ بانكى، ەۋروپالىق قايتا قۇرۋ جانە دامۋ بانكى، حالىقارالىق قارجى كورپوراتسياسى جانە DEG نەمىس ينۆەستيتسيالىق كورپوراتسياسى بار. ەادب اۋەجايعا 40 ميلليون دوللار بولەدى، ال جوبانىڭ جالپى قۇنى 780 ميلليون دوللارعا باعالانعان.

اۋەجايدىڭ جاڭا يەسى - TAV Kazakhstan كومپانياسى. جاڭعىرتۋ جوباسىنا جاڭا تەرمينال سالۋ، جۇمىس ىستەپ تۇرعان اۋەجايدى جاڭعىرتۋ، وتكىزۋ قابىلەتىنىڭ شەكتەۋلەرىن جويۋ، مارشرۋتتاردى دامىتۋ، رەيستەر سانىن ۇلعايتۋ، كليەنتتەرگە قىزمەت كورسەتۋ ساپاسىن ارتتىرۋ بويىنشا جۇمىستار كىرەتىن بولادى. الماتى اۋەجايى ەكى جىل بۇرىن تۇرىك وكىلدىكتەرىنە ساتىلعان بولاتىن.

Abai.kz