وزبەكستان شەكاراشىسى اۋعانستانمەن شەكارالاس ايماقتا بولعان اتىستا قازا تاپتى. بۇل تۋرالى وزبەكستان پرەزيدەنتى شاۆكات ميرزيەەۆ مالىمدەدى. 

رەسمي مالىمەت بويىنشا 26 قىركۇيەك كۇنى اۋعانستان تاراپىنان وزبەكستان شەكاراسىن بۇزىپ وتپەك بولعان ەسىرتكى تاسىمالداۋشىلارمەن ۇرىس بولعان. كەسكىلەسكەن اتىستا وزبەك شەكاراشىسى قازا تاپقان.

"كەشە مەملەكەتتىك شەكارانى بۇزىپ ءوتۋ ارەكەتى جاسالدى. ونى ەسىرتكى تاسىمالداۋشىلار ىسكە اسىرماق بولعان. بىراق ءبىزدىڭ ەل تۇتاستىعىن قورعاۋ پوزيتسيامىز قاشاندا قاتال جانە كەرەك بولسا قارۋعا جۇگىنەمىز. ءبىزدىڭ ءبىر ساربازىمىز ءوز بورىشىن ابىرويمەن اتقارىپ، ەرلىكپەن قازا تاپتى. ول وسى ايماقتىڭ ۇلى ەدى، نامانگاندىق بولاتىن", – دەدى پرەزيدەنت.

ساراپشىلار ورتالىق ازيامەن شەكارالاس ايماقتاردا مۇنداي جاعدايلار ارتۋى مۇمكىن دەپ بولجايدى. وعان اۋعانستانداعى تۇراقسىزدىق اسەر ەتۋى مۇمكىن.

Abai.kz