الماتى وبلىسى بيىل 1 ملن. توننادان استام ءداندى داقىل جيناۋدى جوسپارلاپ وتىر.

الماتى وبلىسىندا ستراتەگيالىق ماڭىزى بار قانت قىزىلشاسىن، جۇگەرى جانە كۇرىش داقىلداردىن جيناۋ، ورۋ جۇمىستارى باستالدى. بيىل جەتىسۋلىق شارۋالار اۋىل شارۋاشىلىعى داقىلدارىنىڭ ەگىستىك القابىن 3,7 مىڭ گەكتارعا ۇلعايىپ، 972,2 مىڭ گەكتارعا جەتكىزگەن.

ونىڭ ىشىندە ءداندى داقىلداردى جيناۋ القابى – 485,4 مىڭ گا بولسا، ونداعى داندىك جۇگەرى – 95,8 مىڭ گا ، كۇرىش - 8,2 مىڭ گا، قانت قىزىلشاسى 16,1 مىڭ گا القاپقا سەبىلگەن.

بۇگىندە وبلىستىڭ ءبىراز وڭىرىندە ەگىستىك جيناۋ قارقىندى جۇرۋدە. قاپشاعاي قالاسىنىڭ «ەتەكباەۆ» قوجالىعىنىڭ شارۋالارى بيىل 140 گەكتار جەردىڭ 70 گا-نا ءداندى جۇگەرى، 27 گا-نا قانت قىزىلشاسىن، 15 گا-عا باس پياز ەككەن. تامشىلاتىپ سۋعارۋ جۇيەسىمەن ءونىم الىپ جۇرگەن قوجالىق مەملەكەت قولداۋىن دا سەزىنىپ جاتقاندارىن جاسىرمادى.

«وسى جىلى پياز جانە جۇگەرى ەگىستىگىنەن 40 توننا ءونىم الۋدى جوسپارلاپ وتىرىمىز. مەملەكەت قولداۋىنىڭ ارقاسىندا جىلدان جىلعا ەگىستىك جەردى كەڭەيتىپ، ءداندى-داقىلدار ءتۇرىن مولايتىپ جاتىرمىز. ءبىزدىڭ ءونىم بۇگىندە تمد جانە ەۋروپا ەلدەرىنە دە ەكسپورتقا شىعۋدا»،- دەيدى شارۋاقوجالىق باسشىسى نۇرلان ەتەكباەۆ.

سونداي-اق، بيىل وبلىس بويىنشا ءتاتتى تۇبىردەن 500 مىڭ توننا ءونىم الىپ، 50 مىڭ توننادان استام قانت شىعارۋ جوسپارلانعان. ول ءۇشىن، بارلىق تەحنيكا جوندەلىپ، استىق جيناۋعا 1468 كومباين، 180 مەحانيكالىق قىرمان، 263 استىق تيەگىش، 203 ءدان اتقىش، 164 استىق تازالاۋ ماشينالارى جانە 256 اۆتوتارازى تارتىلدى.

Abai.kz