الماتى وبلىسىندا جاڭا وقۋ جىلى باستالعانعا دەيىن 5 اۋىل مەكتەبى پايدالانۋعا بەرىلەدى.

جاڭا 2021-2022 وقۋ جىلىنىڭ باستالۋىنا ساناۋلى كۇندەر قالدى. وبلىس بويىنشا جاڭا جانە ساپالى جابدىقتالعان مەكتەپتەردىڭ قۇرىلىسى جالعاسۋدا. بۇل ماسەلەگە اۋىلدىق جەرلەردە ەرەكشە كوڭىل بولىنەدى.

مىسالى، جاڭا وقۋ جىلىنا قاراي 5 مەملەكەتتىك مەكتەپتىڭ قۇرىلىسىن اياقتاۋ جوسپارلانۋدا.

سونىڭ ءبىرى، ىلە اۋدانى قاروي اۋىلىنداعى ورتا مەكتەپ. جاڭا وقۋ ورنى 900 ورىنعا ەسەپتەلگەن. تاعى ءبىر مەكتەپ ىلە اۋدانىنىڭ وقۋشىلارى ءۇشىن ەسىگىن ايقارا اشادى. ول بورالداي اۋىلىندا ورنالاسقان. مەكتەپكە 300 بالا بارا الادى. تاپسىرىس بەرۋشى-اۋداندىق قۇرىلىس ءبولىمى.

30 تامىزدا قاراساي اۋدانىنىڭ باتان اۋىلىندا 450 ورىندىق ورتا مەكتەپتىڭ قۇرىلىسىن اياقتاۋ جوسپارلانۋدا. مەردىگەر "سپ NEFT"جشس بولىپ تابىلادى.

جاڭا وقۋ جىلىنىڭ باستالۋىنا دەيىن ەسكەلدى اۋدانىنىڭ اباي اۋىلىنداعى 180 ورىندىق ورتا مەكتەپتىڭ قۇرىلىس جۇمىستارى اياقتالۋدا.

پانفيلوۆ اۋدانىندا دا جاڭا مەكتەپ اشىلادى. اققۇدىق اۋىلىندا 120 ورىندىق ورتا مەكتەپ ورىن تەپكەن.

ال 2021 جىلدىڭ سوڭىنا دەيىن 3 300 ورىندىق تاعى 4 مەكتەپتىڭ قۇرىلىسى اياقتالۋى ءتيىس. بۇگىنگى تاڭدا ولاردىڭ قۇرىلىسى ىلە اۋدانىنىڭ قوسوزەن جانە جاپەك باتىر اۋىلدارىندا، قاراساي اۋدانىنىڭ ۇشتەرەك اۋىلىندا جانە تالعار قالاسىندا ءجۇرىپ جاتىر.

بيىلعى جىلى كۇردەلى جوندەۋ 19 مەكتەپتە جۇرگىزىلسە، ونىڭ 10-نىڭ جوندەۋ جۇمىستارى تولىقتاي اياقتالعانىن اتاپ وتكەن ءجون. وقۋ جىلى باستالعانعا دەيىن 9 مەكتەپكە كۇردەلى جوندەۋ جۇمىستارىن اياقتاۋ جوسپارلانۋدا. 2021 جىلدىڭ سوڭىنا دەيىن وبلىستىڭ تاعى 9 مەكتەبىنە كۇردەلى جوندەۋ جۇرگىزۋ جوسپارلانعان.

ايتا كەتەيىك، الداعى وقۋ جىلى قاتاڭ سانيتارلىق تالاپتاردى ساقتاي وتىرىپ  وتەدى. ۆيرۋستىڭ بالالار اراسىندا تارالۋىن بولدىرماۋ ءۇشىن بارلىق مەكتەپتەر قاۋىپسىزدىك شارالارىن ۇستانادى. الماتى وبلىسى ءبىلىم باسقارماسىنىڭ مالىمەتىنشە، 52 مىڭنان استام مۇعالىم كوروناۆيرۋسقا قارسى ۆاكتسينا العان.

Abai.kz