"يسلام مەملەكەتى" تەرروريستىك ۇيىمى بەيسەنبى كءۇءنى كابۋلدا بولعان ەكى جارىلىستى دا موينىنا الدى.

CNN تەلەكانالىنىڭ مالىمەتىنە قاراعاندا، بىرىنشى جارىلىس اۋەجايعا كىرەبەرىس ماڭدا، ەكىنشىسى اۋەجايعا جاقىن جەردە ورنالاسقان Barron قوناقۇيى جانىندا بولعان. بۇل اقپاراتتى پەنتاگون وكىلى دجون كيربي راستادى.

اۋعانستان دەنساۋلىق سالاسىنىڭ شەنەۋنىكتەرى جارىلىستان كەمى 60 ادام قايتىس بولعانىن، 140 ادام جارالانعانىن مالىمدەدى. قازا بولعانداردىڭ اراسىندا اقش اسكەرىنىڭ 12 مۇشەسى بار.

Reuters اگەنتتىگى اقش اسكەرىندەگى دەرەككوزى سىلتەمە جاساپ، جارىلىستى جانكەشتى جاساعانىن حابارلاعان.

The moment when the explosion occurred at #Kabul airport. pic.twitter.com/m6uB22Yg7p

— Barzan Sadiq (@BarzanSadiq) August 26, 2021

اۋعانستانداعى ToloNews تەلەارناسى جارىلىس بولعان ايماقتان ونداعان ادامنىڭ اۋرۋحاناعا جەتكىزىلگەنىن ايتقان.

رەسمي ۆاشينگتون بۇل شابۋىلدىڭ ارتىندا "يسلام مەملەكەتى" تەرروريستىك توبىنىڭ حوراسان پروۆينتسياسىنداعى وكىلدەرى تۇر دەگەن. جارىلىستان بىرنەشە ساعات وتكەن سوڭ "يسلام مەملەكەتى" كابۋلداعى شابۋىلدى ءوز موينىنا الدى.

اقش اسكەريلەرى كابۋلدا شابۋىل جيىلەي مە دەپ قاۋىپتەنەدى.

كابۋل اۋەجايى ماڭىنداعى جارىلىس اقش، باتىس ەلدەرىنىڭ ازاماتتارى مەن اۋعاندار ەلدەن كەتۋ ءۇشىن جانتالاسىپ جاتقان تۇستا بولدى. "تاليبان" اۋعانستانداعى بيلىكتى قايتا قولعا العان سوڭ ەلدەن كەتۋگە بەل بۋعان شەتەلدىكتەر مەن اۋعانستاندىقتار كابۋل اۋەجايىنا اعىلىپ، دۇرلىگۋ باستالعان.

بۇعان قوسا، "تاليبان" اقش پەن ونىڭ وداقتاستارىنا ادامدارىن 31 تامىزعا دەيىن اۋعانستاننان اكەتۋدى تالاپ ەتكەن.

26 تامىز تاڭەرتەڭ اقش پەن ونىڭ وداقتاستارى "قولدا بار سەنىمدى دالەلدەرىنە" سۇيەنىپ، كابۋل اۋەجايىنا تەررورلىق شابۋىل جاسالۋ قاۋپى بارىن ەسكەرتكەن. بىراق بۇل ەسكەرتۋگە قاراماستان كابۋل اۋەجايىندا كوپ ادام بولعان.

Abai.kz