جامبىل وبلىسىنداعى اسكەري بولىمدەگى جارىلىستان 88 ادام زارداپ شەگىپ، 4 اسكەري قىزمەتشى قازا تاپتى. بۇل تۋرالى قازاقپارات مالىمدەدى. 

«ەڭ الدىمەن وسى اپاتتا، ءورت ءسوندىرۋ بارىسىندا قازا تاپقان 4 اسكەري قىزمەتشىنىڭ جاقىن تۋىستارىنا كوڭىل ايتامىز جانە جاراقاتتانعان قىزمەتشىلەرگە تەزىرەك ساۋىعىپ كەتۋلەرىن تىلەيمىز»، - دەدى قر قورعانىس ءمينيسترى.

سونىمەن قاتار، وبلىس اكىمى بەردىبەك ساپارباەۆتىڭ ايتۋىنشا، 88 ادام اۋرۋحاناعا جەتكىزىلىگەن.

«اۋرۋحانالارعا 88 ادام جۇگىندى. ولارعا قالالىق اۋرۋحانادا، بايزاق اۋدانىنىڭ ورتالىق اۋرۋحاناسىندا ءتيىستى مەديتسينالىق كومەك كورسەتىلدى. مەديتسينالىق كومەك كورسەتۋدىڭ ارقاسىندا جەڭىل جاراقات العان 60-قا جۋىق ادام ۇيىنە قايتارىلدى», - دەدى ساپارباەۆ.

ونىڭ دەرەگىنشە، قازىرگى تاڭدا تاراز قالالىق ورتالىق اۋرۋحاناسىندا 28 ادام جاتىر. «ونىڭ التاۋىنىڭ جاعدايى ورتاشا اۋىر. بىراق، ومىرلەرىنە ەشقانداي قاۋىپ جوق. تاڭەرتەڭ ناۋقاستارمەن كەزدەستىك، جاعدايلارىن سۇرادىق. دارىگەرلەردەن ولارعا قانداي كومەك كورسەتەتىندىگىن بىلدىك. ءدارى-دارمەككە قاتىستى ەش ماسەلە جوق. قازىر ولاردىڭ جاعدايى تۇراقتى»، - دەدى بەردىبەك ساپارباەۆ.

Abai.kz