«الماتى» تەلەارناسىندا تانىمال رەجيسسەر، ستسەناريست، جازۋشى، مەملەكەتتىك سىيلىقتىڭ لاۋرەاتى، قازاقستان رەسپۋبليكاسىنىڭ ەڭبەك سىڭىرگەن قايراتكەرى، قازاق كينوسىنىڭ مەترى ساتىبالدى نارىمبەتوۆ جايلى دەرەكتى جوبا جارىق كوردى.

كينو جانە ادەبيەت سالاسىندا وزىندىك سۋرەتكەرلىك الەمىن قالىپتاستىرىپ، قوعام بەينەسىن، زاماننىڭ جاڭارعان كەلبەتىن ونەر تىلىمەن جەتكىزگەن حالىق مۇراسىنىڭ جاناشىرى، دارىندى تۇلعا عۇمىرىن كينوعا ارناپ، وزىنەن كەيىنگى ۇرپاقتى ساۋاتتىلىققا جەتەلەدى.

ءار تۋىندىسىن بالاسىنداي كورىپ، حالىقتىڭ تىنىس-تىرشىلىگىن ەكران ارقىلى جەتكىزە ءبىلدى. وتكەن زاماننىڭ بۇلكىلدەگەن تامىرىنا ءدوپ ءتۇستى.

ساتىبالدى نارىمبەتوۆتىڭ مۇستافا شوقاي، كەنەسارى حان تۋرالى جازعان ديسسەرتاتسياسى ءۇشىن قۋعىندالىپ، تۇرمەگە تۇسكەن تاريحشى ەرمۇحان بەكماحانوۆ جايىنداعى «امانات» ءفيلمى دە كورەرمەن ىقىلاسىنا بولەندى. بۇدان وزگە ول – «سوزاقتان شىققان گاملەت»، «بالالىق شاعىمنىڭ دون كيحوتى»، «اۋىلدان كەلگەن كۇيەۋ»، «اس-سالاۋماعالەيكۋم، اتلانتيدا»، «ايعاي» فيلمدەرىنىڭ اۆتورى. كوبىنىڭ ستسەناريىن ءوزى جازىپ، كينو ونەرىنە بۇكىل سانالى عۇمىرىن ارنادى.

Abai.kz