قىرعىزستان قازاقستاننان شەكارانى اشۋدى سۇرادى. 12 تامىزدا قىرعىزستان سىرتقى ىستەر ءمينيسترى رۋسلان قازاقباەۆ قازاقستاننىڭ قىرعىزستانداعى ەلشىسى راپيل جوشىباەۆپەن كەزدەستى. كەزدەسۋ قازاقستاندىق تاراپتىڭ باستاماسىمەن ءوتتى.

"قىرعىز تاراپى ەكى ەلدىڭ اۋماعى ارقىلى ازاماتتار مەن كولىك قۇرالدارىنىڭ ەركىن قوزعالىسى مەن ءترانزيتى ءۇشىن قىرعىزستان ازاماتتارىنىڭ قازاقستانعا كىرۋىنە شەكتەۋ شارالارىن تەز ارادا الىپ تاستاۋ قاجەتتىلىگىنە ەرەكشە نازار اۋداردى" دەلىنگەن قىرعىزستاننىڭ سىرتقى ىستەر مينيسترلىگىنىڭ مالىمدەمەسىندە.

قىرعىزستان سىرتقى ىستەر مينيسترلىگىنىڭ باسشىسى قازاقستانعا گۋمانيتارلىق كومەك ءۇشىن العىسىن ءبىلدىردى. ەلشى بۇعان جاۋاپ رەتىندە بيىل قازاقستان تاراپى باۋىرلاس ەلگە تاعى دا كومەكتەسىپ، 1000 توننا بيداي بەرمەكشى ەكەنىن ايتتى.

كەزدەسۋ سوڭىندا ديپلوماتتار قىرعىزستان مەن قازاقستان ءوزارا قىزىعۋشىلىق تۋدىراتىن بارلىق سالالاردا تىعىز ىنتىماقتاستىقتى نىعايتا بەرەتىنىنە سەنىم ءبىلدىردى.

Abai.kz