11 تامىزدا دەنساۋلىق ساقتاۋ ءمينيسترى الەكسەي تسوي ەلدە تامىز باستالعالى بەرى ۆيرۋس باسەڭدەدى دەپ مالىمدەدى. بىراق قازىر سوعان قاراماستان كۇنىنە ورتاشا ەسەپپەن 7 مىڭ اينالاسىندا ناۋقاس تىركەلىپ جاتىر. بارلىق وبلىستار مەن قالالار "قىزىل ايماقتا" تۇر.

تاۋلىك كورسەتكىشى بويىنشا الدىڭعى ورىنداردا الماتى (1493), نۇر-سۇلتان (1153), قاراعاندى وبلىسى (1125), اتىراۋ وبلىسى (618), شىمكەنت (574), اقتوبە وبلىسى (304) تۇر. قالعان وبلىستاردا انىقتالعان ناۋقاستار 300-گە جەتپەيدى.

دەنساۋلىق ساقتاۋ مينيسترلىگىنىڭ مالىمەتىنشە، 9 تامىزدا 588 ادامعا كوروناۆيرۋس پنەۆمونياسى دياگنوزى قويىلعان. سول كۇنى 154 ادام ءولىمى تىركەلگەن: 130 ادام – كوروناۆيرۋستان، 24 ادام كوروناۆيرۋس پنەۆمونياسىنان قايتىس بولدى دەپ ايتىلادى.

دەنساۋلىق ساقتاۋ سالاسىنىڭ ماماندارى ۆيرۋستىڭ كۇشەيۋىن كوروناۆيرۋستىڭ دەلتا ۆاريانتىنىڭ جىلدام تاراۋىمەن بايلانىستىرادى. دارىگەرلەردىڭ ايتۋىنشا، دەلتا "اعزا تاڭدامايدى، ول جىلدام اسقىنادى، سوزىلمالى اۋرۋدىڭ جوقتىعى اۋرۋدىڭ اسقىنباۋىنا كەپىلدىك بولا المايدى".

ىندەت باستالعالى بەرى 656 مىڭ ادامنىڭ كوروناۆيرۋس تەستى وڭ شىققان. 540 مىڭى جازىلعان. 7103-ءى قايتىس بولعان. 2020 جىلدىڭ تامىز ايىنان بەرى 64 مىڭ ادام كوروناۆيرۋس پنەۆمونياسىنا شالدىققان. 3949-ءى قايتىس بولعان.

قازىر 112 مىڭ ادام كوروناۆيرۋستان ەمدەلىپ جاتىر. 30 مىڭ ناۋقاس ستاتسيوناردا جاتىر. 1808 ادامنىڭ جاعدايى اۋىر، 451 ناۋقاستىڭ ءحالى مۇشكىل. 215 ادام جاساندى تىنىس اپپاراتىنا قوسىلعان.

اقپان ايىنان بەرى 4,5 ملن ادامعا كوروناۆيرۋسقا قارسى ۆاكتسينانىڭ ەكى دوزاسى سالىنعان. 1,3 ملن ادام ءبىرىنشى دوزاسىن العان.

Abai.kz